ဧသာ ၁၃

အခန်းကြီး ၁၃

ဧသာသည် အမေရိက၌ ယောသပ်၏အမျိုးအနွယ်တို့အားဖြင့် တည်ဆောက်မည့် ယေရုရှလင်မြို့သစ်အကြောင်းကို ဟောပြော၏—သူသည် ပရောဖက်ပြု၍ဟော၏။ နှင်ထုတ်ခံရ၏။ ယာရက်အမျိုးသားတို့၏ သမိုင်းကြောင်းကိုရေးပြီး၊ ယာရက်အမျိုးသားတို့၏ပျက်စီးခြင်းကို ကြိုတင်ဟောပြော၏—ထိုပြည်တစ်ခုလုံး၌ စစ်တိုက်ခြင်းဖြစ်ပွား၏။

၁ ယခုမူကား၊ ငါမော်ရော်နိုင်းသည် ငါရေးလျက်ရှိသည့် လူမျိုးတို့၏ပျက်စီးခြင်းနှင့်စပ်လျဉ်းသော ငါ၏မှတ်တမ်းကို လက်စသတ်ခြင်းငှာ ဆက်၍ရေး၏။

၂ ရှုလော့၊ သူတို့သည် ဧသာ၏စကားအားလုံးတို့ကို ငြင်းပယ်ကြ၏။ အကြောင်းမူကား၊ သူတို့အား လူသား၏အစကတည်းက ခပ်သိမ်းသောအရာတို့အကြောင်းနှင့် ရေများ ဤပြည်၏မျက်နှာပြင်ပေါ်မှ ပြန်ကျသွားပြီးနောက်၊ အခြားသောပြည်များအားလုံးထက် အမြတ်ဆုံးပြည်၊ ကိုယ်တော်ရှင်ရွေးကောက်ထားသည့်ပြည် ဖြစ်လာကြောင်းကို သူအမှန်ပင်ပြောပြ၏။ သို့ဖြစ်၍၊ ကိုယ်တော်ရှင်သည် ထိုပြည်၏မျက်နှာပြင်ပေါ်၌ နေထိုင်သူလူသားခပ်သိမ်းတို့အား သူ့ကို အစေခံစေရန် အလိုရှိတော်မူ၏။

၃ ကောင်းကင်ဘုံမှကျဆင်းလာမည့် ယေရုရှလင်မြို့သစ်တည်းဟူသော၊ ကိုယ်တော်ရှင်၏ သန့်ရှင်းသောဝတ်ပြုရာနေရာအကြောင်းကိုလည်း သူတို့အား ပြောပြ၏။

၄ ရှုလော့၊ ဧသာသည် ခရစ်တော်၏ကာလတို့ကို မြင်၍၊ ဤပြည်ပေါ်ရှိ ယေရုရှလင်မြို့သစ်အကြောင်းကို ဟောပြော၏။

၅ သူသည် ဣသရေလအမျိုးသားတို့အကြောင်းနှင့် လေဟိလာရာ ယေရုရှလင်အကြောင်းကိုလည်း ဟောပြော၏—ထို့မြို့ ဖျက်ဆီးခံရပြီးမှ ကိုယ်တော်ရှင်အဖို့ သန့်ရှင်းသောမြို့တစ်မြို့ကို တစ်ဖန်တည်ဆောက်လိမ့်မည်။ သို့ဖြစ်၍၊ ယေရုရှလင်မြို့သစ် မဖြစ်နိုင်။ အကြောင်းမူကား၊ ထိုမြို့သည် ရှေးလွန်လေပြီးသောကာလ၌ ရှိနှင့်ပြီးလေပြီ။ သို့ရာတွင်၊ တစ်ဖန်ပြန်၍ တည်ဆောက်ရမည်ဖြစ်ပြီး၊ ကိုယ်တော်ရှင်အဖို့ သန့်ရှင်းသောမြို့တစ်မြို့ ဖြစ်လာ၏။ ထိုမြို့ကိုလည်း ဣသရေလအမျိုးသားတို့အဖို့ တည်ဆောက်ရလိမ့်မည်—

၆ ထို့အတူ သင်္ကေတအဖြစ်ရှိလေသည့်အရာတို့နှင့်စပ်လျဉ်း၍၊ ယောသပ်၏အမျိုးအနွယ်၏ ကျန်ကြွင်းသောသူတို့အဖို့ ဤပြည်ပေါ်၌ ယေရုရှလင်မြို့သစ်ကို တည်ဆောက်ရမည်။

၇ အကြောင်းမူကား၊ ယောသပ်သည် သူ၏အဘကို အဲဂုတ္တုပြည်သို့ ခေါ်ဆောင်ခဲ့ရာ၊ ထိုအရပ်၌ပင် သေ၏။ သို့ဖြစ်၍၊ ကိုယ်တော်ရှင်သည် ယောသပ်၏အဘကို ကရုဏာကြီးတော်မူ၍ မပျက်စီးရသကဲ့သို့ပင်၊ ယောသပ်အမျိုးအနွယ်တို့ကိုလည်း မပျက်စီးရစေရန် ကရုဏာကြီးတော်မူနိုင်ခြင်းငှာ၊ ယောသပ်အမျိုးအနွယ်၏ ကျန်ကြွင်းသောသူတို့ကို ယေရုရှလင်နယ်မြေမှ ဆောင်ယူတော်မူ၏။

၈ သို့ဖြစ်၍၊ ယောသပ်အမျိုးသားတို့၏ ကျန်ကြွင်းသောသူတို့ကို ဤပြည်ပေါ်၌ တည်ထောင်ကြလိမ့်မည်။ ထိုပြည်သည်လည်း သူတို့၏အမွေခံရာပြည် ဖြစ်လိမ့်မည်။ သူတို့သည်လည်း ကိုယ်တော်ရှင်အဖို့ ရှေးယေရုရှလင်နှင့်တူသည့် သန့်ရှင်းသောမြို့တစ်မြို့ကို တည်ဆောက်ကြလိမ့်မည်။ သူတို့သည် မြေကြီးကွယ်ပျောက်၍၊ အဆုံးသို့ရောက်သည်တိုင်အောင်၊ ရောထွေးမခံရ တော့လတ္တံ့။

၉ ကောင်းကင်အသစ်နှင့် မြေကြီးအသစ်လည်း ရှိလိမ့်မည်။ ဟောင်းသောအရာတို့ ကွယ်ပျောက်သွားလေသည်မှတစ်ပါး၊ ထိုအရာတို့သည် ဟောင်းသောအရာတို့နှင့် တူလိမ့်မည်။ ခပ်သိမ်းသောအရာတို့သည်လည်း အသစ်ဖြစ်လာကြလေပြီ။

၁၀ ထို့နောက်တွင် ယေရုရှလင်မြို့သစ်ကို တည်ဆောက်ကြလိမ့်မည်။ ထိုမြို့၌ နေထိုင်ကြသောသူတို့သည် မင်္ဂလာရှိကြ၏။ အကြောင်းမူကား၊ သူတို့သည် သိုးသငယ်၏အသွေးအားဖြင့် အဝတ်တန်ဆာများကို ဖြူစင်စေကြသူများဖြစ်၏။ သူတို့သည် ဣသရေလအမျိုးသားများဖြစ်လေသူ ယောသပ်အမျိုးအနွယ်၏ကျန်ကြွင်းသောသူများ၌ ရေတွက်ခံရကြ၏။

၁၁ ထို့နောက်တွင်၊ ရှေးယေရုရှလင်မြို့ကို တည်ဆောက်လိမ့်မည်။ ထိုမြို့မှာနေထိုင်သောသူတို့သည် မင်္ဂလာရှိကြ၏။ အကြောင်းမူကား၊ သူတို့ကို သိုးသငယ်၏အသွေးဖြင့် ဆေးကြောလေပြီ။ သူတို့သည် ကွဲပြားပြန့်ကျဲလျက်၊ မြေကြီးလေးမျက်နှာနှင့် မြောက်ပိုင်းတိုင်းပြည်တို့မှစုဝေး၍၊ သူတို့အဘ အာဗြဟံနှင့် ဘုရားသခင်ပြုတော်မူသည့် ပဋိညာဉ်၏ ပြီးပြည့်စုံစေခြင်းကို ခံယူသောသူများဖြစ်ကြ၏။

၁၂ ဤအရာများပြီးပြည့်စုံသောအခါ၊ ပထမဦးဆုံးသောသူတို့သည် နောက်ဆုံးသောသူများဖြစ်လိမ့်မည်၊ နောက်ဆုံးသောသူတို့သည် ပထမဦးဆုံးသောသူများ ဖြစ်လိမ့်မည်ဟုဆိုသော ကျမ်းစာပြည့်စုံ၏။

၁၃ ငါသည် နောက်ထပ်၍ရေးတော့မည်ပြုသော်လည်း တားမြစ်ခံရ၏။ သို့ရာတွင်၊ ဧသာ၏ပရောဖက်ပြုဟောချက်တို့သည် ကြီးမြတ်၍ အံ့ဩဖွယ်ကောင်းသော်လည်း သူ့ကို ဘာမျှမဟုတ်ဟု သူတို့ထင်မှတ်၍ နှင်ထုတ်ကြ၏။ သူသည်လည်း နေ့အချိန်၌ သူ့ကိုယ်သူ ကျောက်ဂူထဲမှာ ပုန်းကွယ်၍၊ ညဉ့်အချိန်၌ ထွက်သွားပြီးလျှင် လူတို့အပေါ် ကျရောက်လာမည့်အရာတို့ကို ကြည့်နေ၏။

၁၄ သူသည် ကျောက်ဂူထဲ၌ နေထိုင်စဉ် ဤမှတ်တမ်း၏ကျန်ကြွင်းသောအပိုင်းကို ပြုစုပြီး၊ လူတို့အပေါ်ကျရောက်လာသည့် ဖျက်ဆီးခြင်းကို ညဉ့်အချိန်တွင် ကြည့်နေ၏။

၁၅ ဤသို့အားဖြင့်အချိန်တန်လာသောအခါ၊ လူတို့ထံမှ သူ့ကို နှင်ထုတ်ခံရသည့် ထိုတစ်နှစ်တည်းတွင်၊ လူတို့၌ ကြီးစွာသောစစ်တိုက်ခြင်း ဖြစ်စပြု၏။ အကြောင်းမူကား၊ အားကြီးသောလူများတည်းဟူသော ရှေ့သို့ထွက်လာသည့်လူများစွာတို့သည် ပြောထားသည့် သူတို့ဆိုးညစ်ခြင်း၏လျှို့ဝှက်သောအကြံအစည်များအတိုင်း ကော်ရန္တူမာကို ဖျက်ဆီးခြင်းငှာ ကြိုးစားအားထုတ်ကြ၏။

၁၆ ယခုမူကား၊ ကော်ရန္တူမာသည် စစ်ပရိယာယ်မှန်သမျှနှင့် လောက၏စဉ်းလဲခြင်းမှန်သမျှတို့ကို သူကိုယ်တိုင် သင်ယူ၏။ သို့ဖြစ်၍၊ သူ့ကိုဖျက်ဆီးဖို့ ကြိုးစားအားထုတ်သောသူတို့ကို သူစစ်တိုက်၏။

၁၇ သို့ရာတွင်၊ သူသည် နောင်တရခြင်းမရှိ။ သူ၏ ချောမောသောသားသမီးများသည်လည်း နောင်တမရကြ။ ကောဟော၏ချောမောသောသားသမီးများသည်လည်း နောင်တမရကြ။ ကောရိဟော၏ချောမောသောသားသမီးများသည်လည်း နောင်တမရကြ။ အချုပ်အားဖြင့်၊ မြေကြီးတစ်ခုလုံး၏မျက်နှာပြင်ပေါ်၌ သူတို့၏အပြစ်များမှ နောင်တရသူ၊ ချောမောသည့်သားသမီး တစ်ယောက်မျှမရှိ။

၁၈ သို့ဖြစ်၍၊ အချိန်တန်လာသောအခါ၊ ကျောက်ဂူထဲ၌ ဧသာနေထိုင်သည့်ပထမနှစ်တွင် နိုင်ငံကို ရရှိခြင်းငှာ၊ ကော်ရန္တူမာကို ဆန့်ကျင်တိုက်ခိုက်၍၊ လျှို့ဝှက်ဂိုဏ်းတို့၏ ဓားများဖြင့် ကွပ်မျက်ခံရသောလူ များစွာရှိ၏။

၁၉ ဤသို့အားဖြင့်အချိန်တန်လာသောအခါ၊ ကော်ရန္တူမာ၏သားတို့သည် များစွာတိုက်ခိုက်၍၊ သွေးများစွာ ထွက်ကြ၏။

၂၀ ဒုတိယနှစ်တွင်၊ ကိုယ်တော်ရှင်၏နှုတ်ကပတ်တော် ဧသာထံသို့ ရောက်လာသည်မှာ သူသည် ကော်ရန္တူမာထံသို့သွား၍၊ သူနှင့် သူ၏အိမ်သူအိမ်သားအားလုံး နောင်တရကြမည်ဆိုလျှင် ကိုယ်တော်ရှင်သည် မိမိနိုင်ငံတော်ကို သူ့အား ပေး၍၊ လူတို့အား ချမ်းသာပေးမည်ကို ပရောဖက်ပြု၍ဟောရမည့်အကြောင်းပေတည်း—

၂၁ သို့မဟုတ်လျှင်၊ သူကိုယ်တိုင်မှတစ်ပါး၊ သူတို့နှင့် သူ၏အိမ်သူအိမ်သားအားလုံးသည် ဖျက်ဆီးခံကြရလိမ့်မည်။ သူသည်လည်း တခြားသောလူမျိုးတို့ ထိုပြည်ကို သူတို့၏အမွေခံရာအဖြစ် ရရှိခြင်းအကြောင်း ဟောထားသည့် ပရောဖက်ပြုဟောချက်များ ပြီးပြည့်စုံစေခြင်းကို မြင်ရဖို့သာလျှင် အသက်ရှင်ရလိမ့်မည်။ ကော်ရန္တူမာသည်လည်း သူတို့၏သင်္ဂြိုဟ်ခြင်းကို ခံရလိမ့်မည်။ ကော်ရန္တူမာမှတစ်ပါး၊ လူတိုင်း ဖျက်ဆီးခံရလိမ့်မည်။

၂၂ ဤသို့အားဖြင့်အချိန်တန်လာသောအခါ၊ ကော်ရန္တူမာသည် နောင်တရခြင်းမရှိ။ သူ၏အိမ်သူအိမ်သားတို့သည်လည်း နောင်တမရကြ။ လူတို့သည်လည်း နောင်တမရကြ။ စစ်တိုက်ခြင်းများသည်လည်း ရပ်တန့်ခြင်းမရှိ။ သူတို့သည်လည်း ဧသာကို သတ်ဖို့၊ ကြိုးစားအားထုတ်ကြ၏။ သို့ရာတွင်၊ ထိုသူတို့ရှေ့မှထွက်ပြေးပြီး၊ ကျောက်ဂူထဲ၌ တစ်ဖန်ပုန်းကွယ်ပြန်၏။

၂၃ ဤသို့အားဖြင့်အချိန်တန်လာသောအခါ၊ ရှာရက်ပေါ်ထွက်လာ၍၊ ကော်ရန္တူမာကိုလည်း စစ်တိုက်ပြီး၊ နှိမ်နှင်းအောင်မြင်၍၊ တတိယမြောက်နှစ်တွင် သူ့ကို ဖမ်းဆီးချုပ်နှောင်ခြင်းထဲသို့ ဆောင်ယူသွား၏။

၂၄ ကော်ရန္တူမာ၏သားတို့သည်လည်း စတုတ္တမြောက်နှစ်တွင် ရှာရက်ကို အနိုင်ရပြီး၊ သူတို့၏အဘအဖို့ နိုင်ငံကို တစ်ဖန်ပြန်၍ ရရှိကြ၏။

၂၅ ယခုတွင်၊ ထိုပြည်၏မျက်နှာပြင်တစ်ခုလုံးပေါ်တွင် စစ်တိုက်ခြင်းရှိစပြုပြီး၊ လူတိုင်းသည် ကိုယ့်တပ်ဖွဲ့နှင့် ကိုယ်အလိုရှိသည်ကို တိုက်ခိုက်နေကြ၏။

၂၆ ဓားပြများလည်း ရှိကြ၏။ အချုပ်အားဖြင့် ထိုပြည်၏မျက်နှာပြင်တစ်ခုလုံးပေါ်တွင် အမျိုးမျိုးသောဆိုးညစ်ခြင်းရှိ၏။

၂၇ ဤသို့အားဖြင့်အချိန်တန်လာသောအခါ၊ ကော်ရန္တူမာသည် ရှာရက်ကို လွန်စွာအမျက်ထွက်ပြီး၊ သူ့တပ်များနှင့်အတူသွား၍ စစ်တိုက်၏။ ကြီးစွာသောအမျက်ဖြင့် တိုက်ခိုက်ပြီး၊ ဂိလဂါလချိုင့်ဝှမ်း၌ တိုက်ခိုက်၏။ တိုက်ပွဲသည်လည်း အလွန်ပြင်းထန်လာ၏။

၂၈ ဤသို့အားဖြင့်အချိန်တန်လာသောအခါ၊ ရှာရက်သည် သူ့ကို သုံးရက်ကြာအောင် တိုက်ခိုက်၏။ ဤသို့အားဖြင့်အချိန်တန်လာသောအခါ၊ ကော်ရန္တူမာက သူ့ကို နှိမ်နှင်းအောင်မြင်၍၊ ဟေရှလုန်လွင်ပြင်သို့ ရောက်သည့်တိုင်အောင် သူ့ကို လိုက်၏။

၂၉ ဤသို့အားဖြင့်အချိန်တန်လာသောအခါ၊ ရှာရက်သည် လွင်ပြင်ပေါ်တွင် တစ်ဖန်စစ်တိုက်၏။ ရှုဦးလော့၊ သူသည် ကော်ရန္တူမာကို အနိုင်ရပြီး ဂိလဂါလချိုင့်ဝှမ်းသို့ တစ်ဖန်ပြန်၍ မောင်းထုတ်၏။

၃၀ ကော်ရန္တူမာသည်လည်း ဂိလဂါလချိုင့်ဝှမ်းထဲ၌ ရှာရက်ကို တစ်ဖန်စစ်တိုက်၍၊ ထိုတိုက်ပွဲတွင်၊ ရှာရက်ကို အနိုင်ရပြီး၊ ကွပ်မျက်၏။

၃၁ ရှာရက်က ကော်ရန္တူမာကို ပေါင်မှာ ဒဏ်ရာရစေခဲ့သဖြင့်၊ သူသည် နှစ်နှစ်ကြာအောင် တိုက်ပွဲသို့ တစ်ဖန်မသွား။ ထိုကာလအတွင်း၌ ပြည်၏မျက်နှာပြင်ပေါ်တွင် လူခပ်သိမ်းတို့သည် အသွေးသွန်းလောင်းနေကြပြီး၊ သူတို့ကို ဟန့်တားမည့်သူ တစ်ယောက်မျှမရှိ။