ဧသာ ၇

အခန်းကြီး ၇

ဩရိဟသည် ဖြောင့်မတ်ခြင်းဖြင့် အုပ်စိုး၏—အတင်းအဓမ္မလုယူသိမ်းပိုက်ခြင်းနှင့် ရန်တွေ့ခြင်းတို့ကြားတွင် ရှူလဲနှင့် ကောဟောတို့၏ ပြိုင်ဘက်နိုင်ငံများကို တည်ထောင်ကြ၏—ပရောဖက်တို့သည် လူတို့၏ ဆိုးညစ်ခြင်းနှင့် ရုပ်တုကိုးကွယ်ခြင်းတို့ကို ရှုတ်ချ၏။ ထိုလူတို့သည် နောက်မှ နောင်တရကြ၏။

၁ ဤသို့အားဖြင့်အချိန်တန်လာသောအခါ၊ ဩရိဟသည် ထိုပြည်၌၊ သူ့လက်ထက်တစ်ခုလုံးတွင် ဖြောင့်မတ်ခြင်းဖြင့်တရားစီရင်ပြီး၊ သူ၏နေ့ရက်တို့အလွန်များ၏။

၂ သူသည် သားသမီးများကို ဖွားမြင်စေ၏။ သုံးဆယ့်တစ်ယောက် ဖွားမြင်စေပြီး၊ ထိုသူတို့၌ သားနှစ်ဆယ့်သုံးယောက်ပါ၏။

၃ ဤသို့အားဖြင့်အချိန်တန်လာသောအခါ၊ သူသည် အသက်ကြီးသောအချိန်၌ ကိဗကို ဖွားမြင်ခဲ့၏။ ဤသို့အားဖြင့်အချိန်တန်လာသောအခါ၊ ကိဗသည် သူ၏နေရာ၌ နန်းစံ၏။ ကိဗသည်လည်း ကောရိဟောကို ဖွားမြင်စေ၏။

၄ ကောရိဟောသည်လည်း အသက်သုံးဆယ့်နှစ်နှစ် ရှိသည့်အချိန်၌ သူ့အဘကို ဆန့်ကျင်ပုန်ကန်ပြီး၊ နေဟောပြည်မှာ နေခြင်းငှာ ထွက်သွား၏။ သူသည် သားသမီးများကို ဖွားမြင်စေပြီး သူတို့သည် အလွန်ချောမောလာကြ၏။ သို့ဖြစ်၍၊ ကောရိဟောသည် လူများစွာတို့ကို သူ့နောက်သို့ သွေးဆောင်၍ခေါ်ဆောင်သွား၏။

၅ သူသည် တပ်တစ်တပ်ကိုလည်း အတူတကွစုဝေးပြီးမှ၊ မင်းကြီးနေထိုင်ရာ မော်ရုန်ပြည်သို့ ချီတက်၍၊ မင်းကြီးကို ဖမ်းဆီး၏။ သူတို့သည် ဖမ်းဆီးချုပ်နှောင်ခြင်းထဲသို့ ဆောင်ခြင်းခံရလိမ့်မည်ဟုဆိုသည့် ယာရက်အစ်ကို၏စကားကို ထိုအမှုက ပြည့်စုံစေ၏။

၆ ယခုတွင်၊ မင်းကြီးနေထိုင်ရာ မော်ရုန်ပြည်သည် လူဆိတ်ညံရာအရပ်ဟု နီဖိုင်းအမျိုးသားတို့ ခေါ်သည့် ပြည်အနီးမှာ ရှိ၏။

၇ ဤသို့အားဖြင့်အချိန်တန်လာသောအခါ၊ ကိဗသည် အလွန်အသက်ကြီးလာသည့်တိုင်အောင်၊ မိမိလူများနှင့်အတူ၊ မိမိသား ကောရိဟောအောက်မှာ ဖမ်းဆီးချုပ်နှောင်ခြင်း၌ နေထိုင်၏။ အဘယ်သို့ပင်ဖြစ်စေ၊ ကိဗသည် ဖမ်းဆီးချုပ်နှောင်ခြင်း၌ရှိနေစဉ်မှာပင် အသက်ကြီးချိန်တွင်၊ ရှူလဲကို ဖွားမြင်စေ၏။

၈ ဤသို့အားဖြင့်အချိန်တန်လာသောအခါ၊ ရှူလဲသည် သူ့အစ်ကိုကို အမျက်ထွက်၏။ ရှူလဲသည်လည်း သန်မာလာပြီး၊ အရွယ်ရောက်သူတစ်ယောက်၏ခွန်အားအတိုင်း အားကြီးလာ၏။ သူသည် ဝေဖန်ပိုင်းခြားရာ၌လည်း အားကြီး၏။

၉ သို့ဖြစ်၍၊ သူသည် ဧဖရိမ်တောင်ကုန်းသို့ လာပြီး၊ တောင်မှ သတ္တုရိုင်းတို့ကို ကျိုချက်၍၊ သူနှင့်အတူသွေးဆောင်၍ခေါ်လာသည့် သူတို့အတွက် သံမဏိဖြင့် ဓားများကို ပြုလုပ်၏။ ထိုသူတို့ကို ဓားများစွဲကိုင်စေပြီးမှ၊ နေဟောမြို့သို့ ပြန်လာပြီး၊ သူ၏အစ်ကို ကောရိဟောကို စစ်တိုက်၏။ ထိုနည်းအားဖြင့်၊ သူသည် နိုင်ငံကို ရယူပြီး၊ သူ့အဘကိဗထံသို့ ပြန်ပေး၏။

၁၀ ယခုမူကား၊ ရှူလဲပြုသောအမှုများကြောင့်၊ အဘသည် သူ့အား နိုင်ငံကို ပေး၏။ ထို့ကြောင့်၊ ရှူလဲသည် မိမိအဘနေရာ၌ နန်းစံစပြု၏။

၁၁ ဤသို့အားဖြင့်အချိန်တန်လာသောအခါ၊ သူသည် ဖြောင့်မတ်ခြင်းဖြင့် တရားစီရင်၏။ ထိုပြည်၏မျက်နှာပြင်တစ်ခုလုံးပေါ်တွင်လည်း သူ၏နိုင်ငံကို ကျယ်ပြန့်စေ၏။ အကြောင်းမူကား၊ လူတို့သည် အလွန်များပြားလာကြ၏။

၁၂ ဤသို့အားဖြင့်အချိန်တန်လာသောအခါ၊ ရှူလဲသည် များစွာသော သားသမီးများတို့ကို ဖွားမြင်စေ၏။

၁၃ ကောရိဟောသည်လည်း သူပြုသည့် မကောင်းမှုများစွာတို့မှ နောင်တရ၏။ သို့ဖြစ်၍၊ ရှုလဲသည် မိမိနိုင်ငံ၌ သူ့ကို အခွင့်ပေး၏။

၁၄ ဤသို့အားဖြင့်အချိန်တန်လာသောအခါ၊ ကောရိဟော၌ သားသမီးများစွာရှိ၏။ ကောရိဟော၏သားများ၌ နောဧအမည်ရှိသောသူတစ်ဦးရှိ၏။

၁၅ ဤသို့အားဖြင့်အချိန်တန်လာသောအခါ၊ နောဧသည် ရှူလဲမင်းကြီးနှင့် မိမိအဘ ကောရိဟောတို့ကို ဆန့်ကျင်ပုန်ကန်ပြီး၊ သူ၏ညီကောဟော၊ ထို့အတူ သူ၏ညီအစ်ကိုခပ်သိမ်းနှင့် များစွာသောလူတို့ကိုလည်း သွေးဆောင်၍ခေါ်ဆောင်သွား၏။

၁၆ သူသည် ရှူလဲမင်းကြီးကိုလည်း စစ်တိုက်၍၊ ထိုသို့တိုက်ခြင်းအားဖြင့် သူတို့၏ပထမဦးဆုံးအမွေခံရာပြည်ကို ရရှိပြီး၊ ပြည်၏ထိုဒေသ၌ ရှင်ဘုရင်ဖြစ်လာ၏။

၁၇ ဤသို့အားဖြင့်အချိန်တန်လာသောအခါ၊ သူသည် ရှူလဲမင်းကြီးကို တစ်ဖန်စစ်တိုက်၏။ ရှူလဲမင်းကြီးကိုဖမ်း၍၊ မော်ရုန်ပြည်ထဲသို့ ဖမ်းဆီးချုပ်နှောင်ပြီး ဆောင်ယူသွား၏။

၁၈ ဤသို့အားဖြင့်အချိန်တန်လာသောအခါ၊ ရှူလဲကို သတ်တော့မည်ပြုစဉ်တွင်၊ ရှူလဲ၏သားများသည် ညဉ့်အချိန်၌ နောဧ၏အိမ်ထဲသို့ တိတ်တဆိတ်ဝင်ပြီး သူ့ကို ကွပ်မျက်၍၊ ထောင်တံခါးတို့ကိုလည်း ဖြိုချလျက်၊ သူတို့၏အဘကို ခေါ်ထုတ်ပြီး သူပိုင်ရာသူ့နိုင်ငံရှိ သူ့ပလ္လင်ပေါ်သို့ ပြန်ပို့၏။

၁၉ သို့ဖြစ်၍၊ နောဧ၏သားသည် သူ၏နိုင်ငံကို သူ၏နေရာ၌ တိုးချဲ့၏။ သို့သော်လည်း သူတို့သည် ရှူလဲမင်းကြီးအပေါ်၌ နောက်ထပ်၍ အစိုးရခြင်းမရှိ။ ရှူလဲမင်းကြီး၏အုပ်စိုးမှုအောက်၌ ရှိသောလူတို့သည်လည်း လွန်စွာအောင်မြင်ပြီး၊ ကြွယ်ဝလာကြ၏။

၂၀ တိုင်းပြည်ကိုလည်း ပိုင်းခြား၍၊ ရှူလဲ၏နိုင်ငံနှင့် နောဧ၏သား ကောဟော၏နိုင်ငံဟူ၍ နှစ်နိုင်ငံဖြစ်၏။

၂၁ နောဧ၏သား ကောဟောသည် သူ၏လူမျိုးတို့အား ရှူလဲကို စစ်တိုက်စေ၍၊ ထိုစစ်တိုက်ခြင်းတွင်၊ ရှူလဲသည် သူတို့ကို အနိုင်ရပြီး၊ ကောဟောကို ကွပ်မျက်၏။

၂၂ ယခုမူကား၊ ကောဟော၌ နိမ်ရောဒဟု ခေါ်သည့် သားတစ်ယောက်ရှိ၏။ နိမ်ရောဒသည်လည်း ကောဟော၏နိုင်ငံကို ရှူလဲထံသို့ စွန့်လွှတ်ပြီး၊ သူသည် ရှူလဲ၏မျက်လုံးများ၌ နှစ်သက်ခြင်းကို ခံရ၏။ သို့ဖြစ်၍၊ ရှူလဲက သူ့ကို ကြီးစွာနှစ်သက်သဖြင့်၊ ရှူလဲ၏နိုင်ငံ၌ သူ၏အလိုအတိုင်း ပြု၏။

၂၃ ရှူလဲ၏လက်ထက်တွင်လည်း၊ လူတို့၏ ဆိုးညစ်ခြင်းနှင့် ရုပ်တုကိုးကွယ်ခြင်းတို့သည် ထိုပြည်အပေါ်သို့ ကျိန်ခြင်းကိုဖြစ်စေလျက်ရှိကြောင်းနှင့် သူတို့နောင်တမရလျှင် ဖျက်ဆီးခံရမည့်အကြောင်းတို့ကို ကိုယ်တော်ရှင်ထံမှ စေလွှတ်သော ပရောဖက်များက ပရောဖက်ပြု၍ဟောလျက် လူတို့၌ ရောက်လာကြ၏။

၂၄ ဤသို့အားဖြင့်အချိန်တန်လာသောအခါ၊ လူတို့သည် ပရောဖက်တို့ကိုဆန့်ကျင်၍ ကဲ့ရဲ့ပြောဆိုကြပြီး၊ ပြက်ရယ်ပြုကြ၏။ ဤသို့အားဖြင့်အချိန်တန်လာသောအခါ၊ ပရောဖက်တို့ကို ဆန့်ကျင်၍ ကဲ့ရဲ့ပြောဆိုသောသူခပ်သိမ်းတို့ကို ရှူလဲမင်းကြီးက တရားစီရင်၏။

၂၅ ပရောဖက်တို့အား သူတို့သွားလိုရာအရပ်မှန်သမျှသို့ သွားနိုင်စေဖို့ အခွင့်ပေးသည့် ဥပဒေတစ်ခုကိုလည်း ထိုပြည်တစ်လျှောက်လုံး၌ စီရင်၏။ ဤအမှုကြောင့်၊ လူတို့သည် နောင်တရခြင်းသို့ဆောင်ယူခံရကြ၏။

၂၆ လူတို့သည်လည်း မိမိတို့၏ဒုစရိုက်များနှင့် ရုပ်တုကိုးကွယ်ခြင်းတို့မှ နောင်တရကြသဖြင့် ကိုယ်တော်ရှင်က သူတို့ကို ချမ်းသာပေးတော်မူပြီး၊ ထိုပြည်၌ တစ်ဖန်အောင်မြင်စပြုကြ၏။ ဤသို့အားဖြင့်အချိန်တန်လာသောအခါ ရှူလဲသည် အသက်ကြီးသောအချိန်၌ သားသမီးများကို ဖွားမြင်စေ၏။

၂၇ ရှူလဲ၏လက်ထက်တွင် စစ်တိုက်ခြင်းများလည်း မရှိတော့။ သူ၏ဘိုးဘေးတို့အား မဟာသမုဒ္ဒရာကို ဖြတ်၍ ကတိတော်မြေထဲသို့ ဆောင်ယူရာ၌ သူတို့အတွက် ကိုယ်တော်ရှင်ပြုတော်မူသည့် ကြီးစွာသောအမှုများကို သူအောက်မေ့၏။ သို့ဖြစ်၍၊ သူ၏လက်ထက်တစ်လျှောက်လုံးတွင် ဖြောင့်မတ်ခြင်းဖြင့် တရားစီရင်၏။