Seksiyon 110
Mga panan-awon nga gipakita ngadto ni Joseph Smith ang Propeta ug ni Oliver Cowdery sa templo sa Kirtland, Ohio, Abril 3, 1836. Ang okasyon mao ang usa ka panagtigom sa Adlawng Igpapahulay. Ang kasaysayan ni Joseph Smith namahayag: “Pagkahapon, akong gitabangan ang ubang mga Presidente sa pag-apod-apod sa Panihapon sa Ginoo ngadto sa Simbahan, nagdawat niini gikan sa Napulog Duha, kansang kahigayonan mao ang pagpangatungdanan sa sagrado nga lamesa niining adlawa. Human sa paghimo niini nga pag-alagad ngadto sa akong kaigsoonan, miadto ko sa pulpito, kay gipaubos man ang tabil, ug ako miyukbo, uban ni Oliver Cowdery, sa maligdong ug mahilom nga pag-ampo. Sa pagtindog gikan sa pag-ampo, ang mosunod nga panan-awon gipadayag ngari kanamong duha.”
1–10, Ang Ginoong Jehova mipakita uban sa himaya ug midawat sa Templo sa Kirtland isip Iyang balay; 11–12, Sila si Moises ug Elias tagsa-tagsa nga mipakita ug mitugyan sa ilang mga yawe ug mga dispensasyon; 13–16, Si Elijah mibalik ug mitugyan sa mga yawe sa iyang dispensasyon sama sa gisaad ni Malaquias.
1 Ang tabil gitangtang gikan sa among mga hunahuna, ug ang mga mata sa among panabot naablihan.
2 Among nakita ang Ginoo nga nagbarog sa barandilya sa pulpito, sa among atubangan; ug ubos sa iyang mga tiil mao ang usa ka hinlo nga buhat sa lunsay nga bulawan, nga ang bulok sama sa baga.
3 Ang iyang mga mata sama sa siga sa kalayo; ang buhok sa iyang ulo puti sama sa lunsay nga yelo; ang iyang panagway mihayag labaw sa kahayag sa adlaw; ug ang iyang tingog sama sa dahunog sa dagkong katubigan, gani ang tingog ni Jehova, nga nag-ingon:
4 Ako ang sinugdanan ug ang kataposan; Ako mao siya nga nabuhi, Ako mao kadtong gipatay; Ako ang inyong manlalaban ngadto sa Amahan.
5 Tan-awa, ang inyong mga sala napasaylo na kaninyo; limpyo na kamo sa akong atubangan; busa, ihangad ang inyong mga ulo, ug pagmaya.
6 Himoa ang mga kasingkasing sa inyong kaigsoonan nga magmaya, ug himoa ang mga kasingkasing sa tanan kong katawhan nga magmaya, kinsa nakahimo, pinaagi sa ilang kusog, sa pagtukod niini nga balay sa akong ngalan.
7 Kay tan-awa, akong gidawat kini nga balay, ug ang akong ngalan maania dinhi; ug akong ipakita ang akong kaugalingon ngadto sa akong katawhan tungod sa kaluoy dinhi niini nga balay.
8 Oo, mopakita ako sa akong mga sulugoon, ug makigsulti kanila sa akong kaugalingong tingog, kon ang akong katawhan maghupot sa akong mga sugo, ug dili maghugawhugaw niining balaan nga balay.
9 Oo ang mga kasingkasing sa mga kaliboan ug tagnapulo ka kaliboan malipay sa hilabihan tungod sa mga panalangin nga ibu-bo, ug sa pagtuga nga gigasa ngadto sa akong mga sulugoon dinhi niini nga balay.
10 Ug ang pagkabantog niini nga balay mokaylap ngadto sa lagyo nga mga yuta; ug kini ang sinugdanan sa panalangin nga ibu-bo diha sa mga ulo sa akong katawhan. Ug mao gayod kana. Amen.
11 Human matapos kini nga panan-awon, ang kalangitan naabli pag-usab ngari kanamo; ug si Moises mipakita sa among atubangan, ug mitugyan kanamo sa mga yawe sa pagpundok sa Israel gikan sa upat ka bahin sa yuta, ug sa pagdala sa napulo ka tribo gikan sa yuta sa amihanan.
12 Human niini, mipakita si Elias, ug mitugyan sa dispensasyon sa ebanghelyo ni Abraham, nagsulti nga, diri kanamo ug sa among binhi ang tanang henerasyon nga mosunod kanamo pagapanalanginan.
13 Sa pagkatapos niini nga panan-awon, lain na usab nga mahinungdanon ug mahimayaong panan-awon ang miabot kanamo; kay si Elijah ang propeta, kinsa gidala ngadto sa langit nga wala makatilaw og kamatayon, nagbarog sa among atubangan, ug miingon:
14 Tan-awa, ang panahon hingpit nang miabot, nga gipamulong pinaagi sa ba-ba ni Malaquias—nagpamatuod nga siya [si Elijah] ipadala, sa dili pa moabot ang mahinungdanon ug makalilisang nga adlaw sa Ginoo—
15 Aron ipabalik ang mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon pinaagi sa tunglo—
16 Busa, ang mga yawe niini nga dispensasyon gitugyan sa inyong mga kamot; ug pinaagi niini masayod kamo nga ang mahinungdanon ug makalilisang nga adlaw sa Ginoo duol na, gani anaa na sa mga pultahan.