Seksiyon 117
Pagpadayag nga gihatag pinaagi ni Joseph Smith ang Propeta, didto sa Far West, Missouri, Hulyo 8, 1838, mahitungod sa dinaliang mga katungdanan nila ni William Marks, Newel K. Whitney, ug Oliver Granger.
1–9, Ang mga sulugoon sa Ginoo kinahanglan nga dili maghinakog sa mga temporal nga butang, kay “unsay pulos sa kabtangan ngadto sa Ginoo?”; 10–16, Kinahanglan nga isalikway nila ang kakulang sa pagkaespirituwal, ug ang ilang mga sakripisyo mahimong sagrado ngadto sa Ginoo.
1 Sa pagkatinuod sa ingon niini misulti ang Ginoo sa akong sulugoon nga si William Marks, ug usab sa akong sulugoon nga si Newel K.Whitney, ipaatiman dayon nila ang ilang patigayon ug pabiyahea gikan sa yuta sa Kirtland, sa dili pa ako, ang Ginoo, mopadala pag-usab og mga yelo diha sa yuta.
2 Pamat-a, ug pabaroga, ug palakta sila ug dili maglangay-langay, kay ako, ang Ginoo, nagsugo niini.
3 Busa, kon maglangay-langay sila dili kini maayo alang kanila.
4 Pahinulsola sila sa ilang tanang sala, ug sa ilang tanang hakog nga mga tinguha, sa akong atubangan, nag-ingon ang Ginoo; kay unsay pulos sa kabtangan ngari kanako? miingon ang Ginoo.
5 Ipabaligya ang mga kabtangan sa Kirtland aron ibayad sa mga utang, miingon ang Ginoo. Ayaw kini ipabilin, miingon ang Ginoo, ug ang bisan unsa ang mahibilin, ipabilin kini diha sa inyong mga kamot, miiingon ang Ginoo.
6 Kay dili ba ako ang tag-iya sa mga langgam sa kalangitan, ug usab sa mga isda sa kadagatan, ug sa mga mananap sa kabukiran? Wala ba nako buhata ang kalibotan? Dili ba ako ang naghupot sa mga kapalaran sa tanang kasundalohan sa mga nasod sa yuta?
7 Busa, dili ba ako makahimo sa mga mingaw nga dapit sa pagpangudlot ug sa pagpamulak, ug sa pagpamunga og daghan? miingon ang Ginoo.
8 Wala bay igong luna sa kabukiran sa Adam-ondi-Ahman, ug sa kapatagan sa Olaha Shinehah, o sa yuta diin nagpuyo si Adan, nga kaibgan ninyo ang usa lamang ka gamay nga butang, ug taligam-an ang mas mahinungdanong mga butang?
9 Busa, lakaw ngadto sa yuta sa akong katawhan, gani ang Zion.
10 Sugoa ang akong sulugoon nga si William Marks nga magmatinud-anon sa pipila ka butang, ug siya mahimong tigmando sa daghan. Siya ang magdumala sa taliwala sa akong katawhan sa siyudad sa Far West, ug mapanalanginan siya sa mga panalangin sa akong katawhan.
11 Kinahanglang ikaulaw ni Newel K. Whitney ang pundok sa mga Nicolaitane ug ang ilang tanang tinago nga binuhatan, ug ang ilang tanang kakulang sa pagka-espirituwal sa akong atubangan, miingon ang Ginoo, ug moadto sa yuta sa Adam-ondi-Ahman, ug mahimong usa ka bishop sa akong katawhan, miingon ang Ginoo, dili sa ngalan apan sa buhat, miingon ang Ginoo.
12 Ug usab, sultihan ko kamo, nahinumdom ako sa akong sulugoon nga si Oliver Granger; tan-awa, sa pagkatinuod sultihan ko siya nga ang iyang ngalan pagahinumdoman nga sagrado gikan sa henerasyon ngadto sa henerasyon, hangtod sa kahangtoran, miingon ang Ginoo.
13 Busa, kinahanglan nga maningkamot siya sa pagbayad sa utang sa Unang Kapangulohan sa akong Simbahan, miingon ang Ginoo; ug kon siya mapukan makabangon siya pag-usab, kay ang iyang sakripisyo mas sagrado ngari kanako kay sa iyang paglambo, miingon ang Ginoo.
14 Busa, padalia siya sa pag-adto, sa yuta sa Zion; ug sa tukma nga higayon mahimo siyang usa ka magpapatigayon sa akong ngalan, miingon ang Ginoo, alang sa kaayohan sa akong katawhan.
15 Busa ayaw tugoti nga adunay tawo nga mobiay-biay sa akong sulugoon nga si Oliver Granger, apan madawat niya ang mga panalangin nga nadawat sa akong katawhan hangtod sa kahangtoran.
16 Ug usab, sa pagkatinuod sultihan ko kamo, pahinumdoma sa Ginoo, nga ilang Dios, ang akong tanang sulugoon sa yuta sa Kirtland, ug ang akong balay usab, sa pagbalaan ug pagpatunhay niini, ug sa pagpapahawa sa mga tig-ilis og kwarta sa akong kaugalingong tukma nga panahon, miingon ang Ginoo. Ug mao gayod kana. Amen.