Seksiyon 17
Pagpadayag nga gihatag pinaagi ni Joseph Smith ang Propeta ngadto nila ni Oliver Cowdery, David Whitmer, ug Martin Harris, sa Fayette, New York, Hunyo 1829, sa wala pa nila makita ang kinulit nga mga palid nga naglakip sa talaan sa Basahon ni Mormon. Si Joseph ug ang iyang tigsulat, si Oliver Cowdery, nakakat-on gikan sa paghubad sa mga palid sa Basahon ni Mormon nga kinahanglang adunay tulo ka espesyal nga mga saksi nga itudlo sa katungdanan (tan-awa sa Ether 5:2–4; 2 Nephi 11:3; 27:12). Sila si Oliver Cowdery, David Whitmer, ug Martin Harris natandog sa dinasig nga tinguha nga mahimong tulo ka espesyal nga mga saksi. Ang Propeta nangutana sa Ginoo, ug kini nga pagpadayag gihatag agi og tubag pinaagi sa Urim ug Thummim.
1–4, Pinaagi sa pagtuo ang Tulo ka Saksi makakita sa mga palid ug uban pang sagrado nga mga butang; 5–9, Si Kristo nagpamatuod sa pagkabalaan sa Basahon ni Mormon.
1 Tan-awa, sultihan ko kamo, nga kinahanglan kamong mosalig sa akong pulong, nga kon inyong buhaton pinaagi sa hingpit nga katuyoan sa kasingkasing, makatan-aw kamo sa mga palid, ug usab sa panagang sa dughan, sa espada ni Laban, sa Urim ug Thummim, nga gihatag ngadto sa igsoon ni Jared didto sa bukid, sa dihang nakigsulti siya sa Ginoo nawong sa nawong, ug sa milagroso nga tigtultol nga gihatag ngadto ni Lehi samtang anaa sa kamingawan, sa mga utlanan sa Pulang Dagat.
2 Ug pinaagi sa inyong pagtuo nga kini inyong makita, gani pinaagi niana nga pagtuo nga nabatonan sa karaang mga propeta.
3 Ug human nga nakabaton kamo og pagtuo, ug nakita kini sa inyong mga mata, kamo mopamatuod kabahin niini, pinaagi sa gahom sa Dios;
4 Ug buhaton ninyo kini aron ang akong sulugoon nga si Joseph Smith, Jun., dili malaglag, nga akong mapahitabo ang akong matarong nga katuyoan ngadto sa mga anak sa katawhan niini nga buhat.
5 Ug inyong pamatud-an nga kamo nakakita niini, sama sa akong sulugoon nga si Joseph Smith, Jun., nga nakakita niiini; kay pinaagi sa akong gahom siya nakakita niini, ug tungod kini kay siya adunay pagtuo.
6 Ug iyang gihubad ang basahon, bisan kana nga bahin nga akong gisugo kaniya, ug samtang ang imong Ginoo ug ang imong Dios buhi kini tinuod.
7 Mao nga, nakadawat kamo sa samang gahom, ug sa samang pagtuo, ug sa samang gasa nga anaa kaniya;
8 Ug kon buhaton ninyo kining akong kataposang mga sugo, nga akong gihatag kaninyo, ang mga ganghaan sa impyerno dili magmadaogon batok kaninyo; kay ang akong grasya igo alang kaninyo, ug kamo pagabayawon sa kataposang adlaw.
9 Ug ako, si Jesukristo, ang inyong Ginoo ug inyong Dios, namulong niini nganha kaninyo, nga akong mapahitabo ang matarong nga mga katuyoan ngadto sa mga anak sa katawhan. Amen.