Seksiyon 23
Nagsunod-sunod nga lima ka pagpadayag nga gihatag ngadto ni Joseph Smith ang Propeta, sa Manchester, New York, Abril 1830, ngadto nilang Oliver Cowdery, Hyrum Smith, Samuel H. Smith, Joseph Smith Sr., ug Joseph Knight Sr. Isip sangpotanan sa kinasingkasing nga tinguha sa lima ka tawo nga ginganlan aron mahibalo sa ilang tagsa-tagsa ka katungdanan, ang Propeta nangutana sa Ginoo ug nakadawat og pagpadayag alang sa matag tawo.
1–7, Kining unang mga disipulo gitawag sa pagsangyaw, pag-awhag, ug pagpalig-on sa Simbahan.
1 Tan-awa, sultihan ko ikaw, Oliver, og pipila ka pulong. Tan-awa, ikaw bulahan, ug ikaw dili ubos sa panghimaraot. Apan pagbantay sa garbo, tingali unya og ikaw matental.
2 Himoa nga mahibaloan ang imong balaan nga tawag ngadto sa simbahan, ug usab sa atubangan sa kalibotan, ug ang imong kasingkasing maablihan sa pagsangyaw sa kamatuoran gikan karon ug sa kahangtoran. Amen.
3 Tan-awa, sultihan ko ikaw, Hyrum, sa pipila ka pulong; kay ikaw usab dili ubos sa panghimaraot, ug ang imong kasingkasing nagmaluluy-on, ug ang imong dila larinong makasulti; ug ang imong balaan nga tawag mao ang pag-awhag, ug pagpalig-on sa simbahan kanunay. Mao nga ang imong katungdanan alang sa simbahan sa kahangtoran, ug kini tungod sa imong pamilya. Amen.
4 Tan-awa, sultihan ko ikaw og pipila ka pulong, Samuel; ikaw usab dili ubos sa panghimaraot, ug ang imong balaan nga tawag mao ang pag-awhag, ug pagpalig-on sa simbahan; ug ikaw wala pa matawag sa pagsangyaw ngadto sa kalibotan. Amen.
5 Tan-awa, sultihan ko ikaw og pipila ka pulong, Joseph; kay ikaw usab dili ubos sa panghimaraot, ug ang imong balaan nga tawag usab mao ang pag-awhag, ug pagpalig-on sa simbahan; ug kini mao ang imong katungdanan gikan karon ug sa kahangtoran. Amen.
6 Tan-awa, ipaila nako kanimo, Joseph Knight, pinaagi niini nga mga pulong, nga ikaw gayod mopas-an sa imong krus, nga ikaw kinahanglan nga mag-ampo sa dayag sa atubangan sa kalibotan ug usab sa tago, ug sa imong pamilya, ug sa imong mga higala, ug sa tanang dapit.
7 Ug, tan-awa, kini mao ang imong katungdanan sa pagpakighiusa sa tinuod nga simbahan, ug ihatag ang imong pag-awhag kanunay, nga ikaw unta makadawat sa ganti sa mamumuo. Amen.