Seksiyon 25
Pagpadayag nga gihatag pinaagi ni Joseph Smith ang Propeta, sa Harmony, Pennsylvania, Hulyo 1830 (tan-awa sa ulohan sa seksiyon 24). Kini nga pagpadayag nagpahayag sa kabubut-on sa Ginoo ngadto kang Emma Smith, ang asawa sa Propeta.
1–6, Si Emma Smith, usa ka pinili nga babaye, gitawag sa pagtabang ug paghupay sa iyang bana; 7–11, Siya usab gitawag sa pagsulat, pagpasabot sa mga kasulatan, ug pagpili og mga himno; 12–14, Ang awit sa mga matarong usa ka pag-ampo ngadto sa Ginoo; 15–16, Mga baroganan sa pagkamasulundon niini nga pagpadayag magamit sa tanan.
1 Patalinghogi ang tingog sa Ginoo nga imong Dios, samtang ako mosulti kanimo, Emma Smith, akong anak; kay sa pagkatinuod sultihan ko ikaw, ang tanan nga nakadawat sa akong ebanghelyo sila mga anak nga lalaki ug mga anak nga babaye sa akong gingharian.
2 Usa ka pagpadayag nga akong ihatag kanimo kabahin sa akong kabubut-on; ug kon ikaw magmatinud-anon ug maglakaw sa dalan nga mahiyason sa akong atubangan, akong luwason ang imong kinabuhi, ug ikaw makadawat og kabilin sa Zion.
3 Tan-awa, ang imong mga sala gipasaylo na, ug ikaw ang pinili nga babaye, nga akong gitawag.
4 Ayaw pagbagulbol tungod sa mga butang nga wala nimo makita, kay kini gitago gikan kanimo ug gikan sa kalibotan, sumala sa akong paghukom sa panahon nga moabot.
5 Ug ang katungdanan sa imong balaan nga tawag mao ang paghupay sa akong sulugoon, si Joseph Smith, Jun., nga imong bana, sa iyang mga kasakit, gamit ang makahupay nga mga pulong, diha sa espiritu sa kaaghop.
6 Ug ikaw mouban kaniya sa oras sa iyang paglakaw, ug mahimong iyang tigsulat, samtang wala pay usa ka tigsulat alang kaniya, aron akong mapadala ang akong sulugoon, si Oliver Cowdery, bisan asa nako gusto.
7 Ug ikaw ordinahan pinaagi sa pagpandong sa iyang mga kamot sa pagpasabot sa mga kasulatan, ug pag-awhag sa simbahan, sumala sa ihatag kanimo sa akong Espiritu.
8 Kay siya mopandong sa iyang mga kamot diha kanimo, ug ikaw makadawat sa Espiritu Santo, ug ang imong panahon igahin sa pagsulat, ug sa daghan nga pagtuon.
9 Ug ikaw dili angay nga mahadlok, kay ang imong bana mosuporta kanimo sa simbahan; kay ngadto kanila mao ang iyang balaan nga tawag, aron ang tanan nga butang ikapadayag ngadto kanila, bisan unsa ang akong gusto, sumala sa ilang pagtuo.
10 Ug sa pagkatinuod sultihan ko ikaw nga imong isalikway ang mga butang niini nga kalibotan, ug tinguhaa ang mga butang nga maayo.
11 Ug ihatag kanimo, usab, ang pagpili sa sagrado nga mga himno, kay ihatag kini nganha kanimo, nga makapahimuot kanako, nga maanaa sa akong simbahan.
12 Kay ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako, ug pagatubagon kini sa usa ka panalangin diha sa ilang mga ulo.
13 Mao nga, lipaya ang imong kasingkasing ug pagmaya, ug tumana ang mga pakigsaad nga imong gihimo.
14 Ipadayon ang espiritu sa kaaghop, ug pagmatngon sa garbo. Himoa nga ang imong kalag mahimuot sa imong bana, ug sa himaya nga moabot kaniya.
15 Sunda ang akong mga sugo kanunay, ug ang korona sa pagkamatarong imong madawat. Ug gawas kon ikaw mobuhat niini, kon hain ako ikaw dili makaadto.
16 Ug sa pagkatinuod, sa pagkatinuod, sultihan ko ikaw, nga kini ang akong tingog ngadto sa tanan. Amen.