Seksiyon 31
Pagpadayag nga gihatag pinaagi ni Joseph Smith ang Propeta ngadto kang Thomas B. Marsh, Septiyembre 1830. Ang okasyon nahitabo human dayon sa usa ka komperensiya sa Simbahan (tan-awa sa ulohan sa seksiyon 30). Si Thomas B. Marsh nabunyagan sayo sa bulan, ug na-orden na nga elder sa Simbahan sa wala pa mahatag kini nga pagpadayag.
1–6, Si Thomas B. Marsh gitawag sa pagsangyaw sa ebanghelyo ug gipasaligan sa kaayohan sa iyang pamilya; 7–13, Gitambagan siya nga magmapailobon, mag-ampo sa kanunay, ug mosunod sa Maghuhupay.
1 Thomas, akong anak, bulahan ka tungod sa imong pagtuo sa akong buhat.
2 Tan-awa, daghan ka og naagian nga pag-antos tungod sa imong pamilya; bisan pa niana, panalanginan ka nako og ang imong pamilya, oo, ang imong gagmayng anak; ug moabot ang adlaw nga motuo ug masayod sila sa kamatuoran ug mahiusa uban kanimo sa akong simbahan.
3 Ibayaw ang imong kasingkasing ug pagmaya, kay ang takna sa imong misyon miabot na; ug ang imong dila makasulti, ug mopahayag ka sa makalipay nga mga balita sa dako nga kamaya niini nga kaliwatan.
4 Imong ipahayag ang mga butang nga gipadayag ngadto sa akong sulugoon, nga si Joseph Smith, Jun. Magsugod ka sa pagsangyaw gikan karon, oo sa pag-ani sa umahan nga puti na ug andam nang sunogon.
5 Busa, igalab ang imong sanggot sa tibuok nimo nga kalag, ug ang imong mga sala mapasaylo, ug magpas-an ka og mga binugkos sa imong likod, kay ang mamumuo angayan sa iyang suhol. Mao nga, ang imong pamilya mabuhi.
6 Tan-awa, sa pagkatinuod sultihan ko ikaw, biyai sila sa mubo lamang nga panahon, ug ipahayag ang akong pulong, ug mag-andam ako og dapit alang kanila.
7 Oo, akong ablihan ang mga kasingkasing sa katawhan, ug sila modawat kanimo. Ug magtukod ako og simbahan pinaagi sa imong kamot;
8 Ug ikaw molig-on kanila ug moandam kanila alang sa panahon nga sila pagapundokon.
9 Pagmapailobon sa mga kasakit, ayaw pagbiaybiay batok niadtong nagbiaybiay. Dumalaha ang imong balay pinaagi sa kaaghop, ug pagmalig-on.
10 Tan-awa, sultihan ka nako nga mamahimo ka nga mananambal sa simbahan, apan dili sa kalibotan, kay dili sila modawat kanimo.
11 Padayon sa pag-adto bisan asa nga akong gusto, ug ipadayag kini kanimo pinaagi sa Maghuhupay kon unsa ang imong buhaton ug kon asa ka moadto.
12 Pag-ampo sa kanunay, tingali unya og madala ka sa tentasyon ug mawala ang imong ganti.
13 Pagmatinud-anon hangtod sa kataposan, ug tan-awa, ako magauban kanimo. Kini nga mga pulong dili gikan sa tawo ni gikan sa mga tawo, apan gikan kanako, gani si Jesukristo, nga imong Manunubos, pinaagi sa kabubut-on sa Amahan. Amen.