Seksiyon 34
Pagpadayag nga gihatag pinaagi ni Joseph Smith ang Propeta ngadto kang Orson Pratt, didto sa Fayette, New York, Nobiyembre 4, 1830. Si Brother Pratt nagpanuigon og desinuybe anyos nianang panahona. Nakabig siya ug nabunyagan sa dihang una niyang nadungog ang pagsangyaw sa gipahiuli nga ebanghelyo pinaagi sa iyang magulang nga lalaki, si Parley P. Pratt, sa miagi nga unom ka semana. Kini nga pagpadayag nadawat didto sa panimalay ni Peter Whitmer Sr.
1–4, Ang matinud-anon mahimong mga anak sa Dios pinaagi sa Pag-ula; 5–9, Ang pagsangyaw sa ebanghelyo moandam sa agianan alang sa Ikaduhang Pag-anhi; 10–12, Ang pagpanagna moabot pinaagi sa gahom sa Espiritu Santo.
1 Orson akong anak, patalinghogi ug paminawa ako nga Ginoong Dios, ug tan-awa unsay akong isulti kanimo, gani si Jesukristo nga imong Manunubos;
2 Ang kahayag ug ang kinabuhi sa kalibotan, ang kahayag nga nagdan-ag sa kangitngit ug ang kangitngit wala makasabot niini;
3 Kinsa nahigugma kaayo sa kalibotan nga iyang gihatag ang iyang kaugalingong kinabuhi, nga kutob sa motuo mahimo nga mga anak sa Dios. Mao nga ikaw akong anak;
4 Ug bulahan ka tungod kay ikaw mituo;
5 Ug mas bulahan ka tungod kay ikaw akong gitawag sa pagsangyaw sa akong ebanghelyo—
6 Sa pagpalanog sa imong tingog sama sa tingog sa trumpeta, nga hataas ug lanog, ug mosangyaw og paghinulsol ngadto sa hiwi ug masinupakon nga kaliwatan, mag-andam sa agianan sa Ginoo alang sa iyang ikaduhang pag-anhi.
7 Kay tan-awa, sa pagkatinuod, sa pagkatinuod, sultihan ko ikaw, ang panahon nagkaduol na nga ako moabot sa usa ka panganod uban sa gahom ug dako nga himaya.
8 Ug mahimo kining mahinungdanon nga adlaw sa panahon sa akong pag-abot, kay ang tanang kanasoran mokurog.
9 Apan sa dili pa moabot kanang mahinungdanon nga adlaw, ang adlaw mongitngit, ug ang bulan mahimong dugo; ug ang mga bitoon magdumili sa pagpakita sa ilang kahayag, ug ang uban mangahulog, ug dagko nga kalaglagan ang nagpaabot sa daotan.
10 Mao nga, ipalanog ang imong tingog ug ayaw pagpanagana, kay ang Ginoong Dios ang namulong; busa panagna, ug kini ihatag pinaagi sa gahom sa Espiritu Santo.
11 Ug kon ikaw magmatinud-anon, tan-awa, ako magauban kanimo hangtod sa akong pag-abot—
12 Ug sa pagkatinuod, sa pagkatinuod, sultihan ko ikaw, moabot ako sa kalit lang. Ako ang imong Ginoo ug imong Manunubos. Ug ingon niana ang mahitabo. Amen.