1 Sa ingon niana misulti ang Ginoo nga inyong Dios, gani si Jesukristo, ang Halangdon nga Ako, ang Alpha ug ang Omega, ang sinugdanan ug ang kataposan, siya nga nagtan-aw sa kahalapad sa kahangtoran, ug sa tanang panon sa serapin sa langit, sa wala pa mamugna ang kalibotan;

2 Siya nga nahibalo sa tanan nga butang, kay ang tanan nga butang anaa sa atubangan sa akong mga mata;

3 Ako mao gihapon ang namulong, ug ang kalibotan namugna, ug ang tanan nga butang nalalang pinaagi kanako.

4 Ako mao gihapon ang misakwat sa Zion ni Enoch ngari sa akong dughan; ug sa pagkatinuod, ako moingon, kutob sa nagatuo sa akong ngalan, kay ako si Kristo, ug sa akong kaugalingong ngalan, pinaagi sa dugo nga akong gipaagas, nangamuyo ako sa atubangan sa Amahan alang kanila.

5 Apan tan-awa, ang nahibilin sa mga daotan akong gigaid sa mga kadena sa kangitngit hangtod sa mahinungdanon nga adlaw sa paghukom, nga moabot sa kataposan sa kalibotan;

6 Ug sa mao gihapon nga paagi akong gipagaid ang mga daotan, nga wala maminaw sa akong tingog apan nagpatig-a sa ilang mga kasingkasing, ug ang kaalaotan, kaalaotan, kaalaotan, maoy ilang padulngan.

7 Apan tan-awa, sa pagkatinuod, sa pagkatinuod, sultihan ko kamo nga ang akong mga mata nagtan-aw kaninyo. Anaa ako sa inyong taliwala ug dili kamo makakita kanako;

8 Apan ang adlaw hapit na moabot nga makakita kamo kanako, ug masayod nga Ako anaa; kay ang tabil sa kangitngit sa dili madugay magisi, ug siya nga dili putli dili makalahutay nianang adlawa.

9 Mao nga, baksi ang inyong mga bat-ang ug pangandam. Tan-awa, inyo ang gingharian, ug ang kaaway dili makabuntog.

10 Sa pagkatinuod sultihan ko kamo, kamo mga limpyo, apan dili tanan; ug wala nay lain nga akong gikahimut-an;

11 Kay ang tanan nga unod makasasala sa akong atubangan; ug ang mga gahom sa kangitngit nagpatigbabaw sa yuta, taliwala sa mga anak sa katawhan, sa atubangan sa tanang panon sa langit—

12 Diin maoy hinungdan nga naghari ang kahilom, ug ang tanang kahangtoran gisakit, ug ang mga anghel nagpaabot sa mahinungdanon nga sugo sa pag-ani sa yuta, sa pagpundok sa mga sagbot aron kini pagasunogon; ug, tan-awa, ang kaaway naghiusa.

13 Ug karon ako mopakita kaninyo og misteryo, butang nga anaa sa tinago nga mga lawak, sa pagpahitabo gani sa inyong kalaglagan sa paglabay sa panahon, ug wala kamo masayod niini;

14 Apan karon sultihan ko kamo, ug bulahan kamo, dili tungod sa inyong pagkadaotan, ni sa inyong mga kasingkasing nga walay pagtuo; kay sa pagkatinuod ang uban kaninyo nakasala sa akong atubangan, apan magmaluluy-on ako sa inyong kahuyang.

15 Busa, pagmalig-on kamo gikan karon; ayaw kahadlok, kay inyo ang gingharian.

16 Ug alang sa inyong kaluwasan hatagan ko kamo og sugo, kay akong nadungog ang inyong mga pag-ampo, ug ang mga kabos nagbagulbol sa akong atubangan, ug ang mga adunahan ako ang naglalang, ug ako ang tag-iya sa tanang unod, ug Ako walay pinalabi sa mga tawo.

17 Ug akong gihimo nga buhong ang yuta, ug tan-awa kini ang akong tumbanan, mao nga, sa makausa pa ako mobarog diha niini.

18 Ug ako motunol ug mopaubos sa paghatag kaninyo og mas daghang katigayonan, gani usa ka yutang saad, yuta nga tugob sa gatas ug dugos, nga diha niana walay tunglo nga ipahamtang kon ang Ginoo moabot;

19 Ug ihatag ko kini kaninyo aron mahimong yuta nga inyong panulundon, kon kamo mangita niini sa tibuok ninyong kasingkasing.

20 Ug mao kini ang akong pakigsaad diha kaninyo, oo maangkon ninyo kini aron mahimong yuta nga inyong panulundon, ug aron mahimong panulundon alang sa inyong mga anak sa kahangtoran, samtang ang kalibotan magbarog, ug maangkon ninyo kini pag-usab ngadto sa kahangtoran, nga dili na gayod mahanaw.

21 Apan, sa pagkatinuod sultihan ko kamo nga sa umaabot nga panahon kamo wala nay hari ni magmamando, kay ako ang mahimo ninyong hari ug magbantay kaninyo.

22 Mao nga, paminaw sa akong tingog ug sunod kanako, ug kamo mahimong gawasnon nga katawhan, ug kamo walay mga balaod gawas sa akong mga balaod kon ako moabot, kay ako ang inyong magbabalaod, ug unsa ang makapugong sa akong kamot?

23 Apan, sa pagkatinuod sultihan ko kamo, pagtinudloay kamo sa usag usa sumala sa katungdanan nga akong gihatag kaninyo;

24 Ug tugoti ang matag tawo nga motamod sa iyang igsoon sama sa iyang kaugalingon, ug mag-ugmad og hiyas ug pagkabalaanon sa akong atubangan.

25 Ug usab sultihan ko kamo, tugoti ang matag tawo nga motamod sa iyang igsoon sama sa iyang kaugalingon.

26 Kay unsa nga matang sa tawo taliwala kaninyo nga adunay napulog duha ka anak, ug walay pinalabi kanila, ug nangalagad sila kaniya nga masinugtanon, ug iyang gisultihan ang usa: Pagsul-ob og mga kupo ug lingkod dinhi; ug ngadto sa ikaduha: Pagsul-ob og nuog ug lingkod didto—ug motan-aw sa iyang mga anak ug moingon nga makiangayon ako?

27 Tan-awa, gihatag ko kini kaninyo isip usa ka sambingay, ug gani sama kini kanako. Sultihan ko kamo, paghiusa; ug kon dili kamo maghiusa dili kamo akoa.

28 Ug usab, sultihan ko kamo nga ang kaaway nga anaa sa tinago nga mga lawak nagtinguha sa inyong kinabuhi.

29 Kamo makadungog og mga gubat sa layo nga mga nasod, ug moingon kamo nga sa dili madugay adunay moabot nga dagko nga mga gubat sa layo nga mga nasod, apan wala kamo masayod sa mga kasingkasing sa mga tawo sa inyong kaugalingong yuta.

30 Gisultihan ko kamo niining mga butanga tungod sa inyong mga pag-ampo; mao nga, pagbahandi og kaalam diha sa inyong mga dughan, tingali unya og ang pagkadaotan sa mga tawo mopadayag niini nga mga butang nganha kaninyo pinaagi sa ilang pagkadaotan, sa paagi nga mamulong diha sa inyong mga dunggan pinaagi sa tingog nga kusog pa kay sa nianang makapakurog sa yuta; apan kon andam kamo, dili kamo mahadlok.

31 Ug nga kamo unta makalingkawas sa gahom sa kaaway, ug magpundok ngari kanako isip matarong nga katawhan, nga walay mansa ug walay sala—

32 Mao nga, tungod niini nga hinungdan gihatagan ko kamo og sugo nga moadto kamo sa Ohio; ug didto akong ihatag kaninyo ang akong balaod; ug didto pagatugahan kamo og gahom gikan sa kahitas-an;

33 Ug gikan didto, kon si kinsa man ang akong tugotan moadto sa tanang kanasoran, ug sultihan sila kon unsay ilang buhaton; kay ako adunay dakong buhat nga giandam, kay ang Israel pagaluwason, ug giyahan ko sila bisan asa nga akong gusto, ug walay gahom nga makapugong sa akong kamot.

34 Ug karon, mohatag ako og sugo sa simbahan niini nga mga dapit, nga pipila sa mga tawo uban kanila itudlo ngadto sa katungdanan, ug sila itudlo sa katungdanan pinaagi sa tingog sa simbahan;

35 Ug moatiman sila sa mga kabos ug sa timawa, ug mangalagad alang sa ilang kahupayan aron dili sila mag-antos; ug ipadala sila ngadto sa dapit nga akong gisugo kanila;

36 Ug mao kini ang ilang buhat, ang pagdumala sa mga kalihokan sa kabtangan niini nga simbahan.

37 Ug sila nga adunay mga umahan nga dili mabaligya, ipabilin o paabangan kana sumala sa makaayo kanila.

38 Tan-awa nga ang tanang butang matipigan; ug kon ang mga tawo matugahan og gahom gikan sa kahitas-an ug mapadala, kining tanan nga mga butang pagapundokon ngadto sa dughan sa simbahan.

39 Ug kon magtinguha kamo sa mga bahandi nga mao ang kabubut-on sa Amahan nga ihatag kaninyo, mahimo kamong labing adunahan sa tanan nga katawhan, kay mainyo ang mga katigayonan sa kahangtoran; ug gikinahanglan nga ang mga katigayonan sa yuta akong ihatag; apan paglikay sa garbo, tingali unya og mahisama kamo sa mga Nephita sa karaan.

40 Ug usab, sultihan ko kamo, ako mohatag kaninyo og sugo, nga ang matag tawo, elder, pari, magtutudlo, ug usab mga sakop, moadto sa tibuok niyang gahom, pinaagi sa paghago sa ilang mga kamot; sa pag-andam ug pagtuman sa mga butang nga akong gisugo.

41 Ug himoa nga ang inyong pagsangyaw mahimo nga tingog sa pagpasidaan, sa matag tawo ngadto sa iyang silingan, pinaagi sa kalumo ug kaaghop.

42 Ug pagpalayo kamo gikan sa daotan. Luwasa ang inyong kaugalingon. Pagmalimpyo kamo nga mga sinaligan sa Ginoo. Ug ingon niana ang mahitabo. Amen.