Seksiyon 4
Pagpadayag nga gihatag pinaagi ni Joseph Smith ang Propeta ngadto sa iyang amahan nga si Joseph Smith Sr., sa Harmony, Pennsylvania, Pebrero 1829.
1–4, Ang maisogon nga pag-alagad moluwas sa mga tigpangalagad sa Ginoo; 5–6, Ang diosnong kinaiya mohimo kanila nga takos alang sa pangalagad; 7, Ang mga butang sa Dios kinahanglan nga pagatinguhaon.
1 Karon tan-awa, ang katingalahan nga buhat hapit na moabot ngadto sa mga anak sa mga tawo.
2 Busa, O kamo nga magsugod sa pag-alagad sa Dios, tan-awa nga kamo moalagad kaniya sa tibuok ninyong kasingkasing, gahom, hunahuna ug kusog, nga kamo magbarog nga walay kasaypanan sa atubangan sa Dios sa kataposang adlaw.
3 Busa, kon kamo adunay tinguha sa pag-alagad sa Dios, kamo gitawag ngadto sa buhat;
4 Kay tan-awa ang umahan puti ug andam na nga anihon; ug tan-awa, siya nga mogalab sa iyang sanggot nga makusganon, sama ra nga nagtipig siya aron dili siya malaglag, apan magdala og kaluwasan ngadto sa iyang kalag;
5 Ug ang pagtuo, paglaom, gugmang putli ug gugma, inubanan sa panan-aw nga nakatutok sa himaya sa Dios, mohimo kaniya nga takos alang sa buhat.
6 Hinumdomi ang pagtuo, hiyas, kahibalo, pagpugong sa kaugalingon, pailob, inigsoon nga pagkamabination, pagkadiosnon, gugmang putli, pagkamapainubsanon, kakugi.
7 Pangayo, ug makadawat kamo; panuktok, ug kini pagaablihan nganha kaninyo. Amen.