Seksyon 4
Pagpadayag nga gihatag pinaagi ni Joseph Smith ang Propeta ngadto sa iyang amahan, Joseph Smith, Sr., sa Harmony, Pennsylvania, Pebrero 1829 (History of the Church, 1:28).
1–4, Ang walay kahadlok nga pag-alagad nagluwas sa mga tigpangalagad sa Ginoo; 5–6, Ang Diosnong kinaiya nakahimo kanila nga takus alang sa pangalagad; 7, Mga butang sa Dios kinahanglan gayud nga pagatinguhaon.
1 Karon tan-awa, usa ka kahibulongan nga buhat hapit na moabut diha sa mga katawhan.
2 Busa, O kamo nga anaa sa pag-alagad sa Dios, tan-awa nga kamo moalagad kaniya sa tibuok ninyo nga kasingkasing, gahum, hunahuna ug kusog, nga kamo magbarug nga walay mansa sa atubangan sa Dios sa katapusan nga adlaw.
3 Busa, kon kamo adunay tinguha sa pag-alagad sa Ginoo, kamo gitawag ngadto sa buhat;
4 Kay tan-awa ang umahan puti ug andam na sa pag-ani; ug tan-awa, siya nga mogalab sa iyang sanggot uban sa iyang kusog, sama ra nga nagtigum og panalangin nga siya dili mahanaw, apan magdala og kaluwasan ngadto sa iyang kalag;
5 Ug hugot nga pagtuo, paglaum, gugma nga putli ug pagmahal, uban ang bug-os nga tinguha ngadto sa himaya sa Dios, nakahimo kanila nga takus alang sa buhat.
6 Hinumdumi ang hugot nga pagtuo, hiyas, kahibalo, pagkamapugnganon, pailub, inigsoon nga pagkamabination, pagkadiosnon, gugma nga putli, pagkamapainubsanon, kakugi.
7 Pangayo, ug kamo makadawat; tuktok, ug kini pagabuksan nganha kaninyo. Amen.