Seksiyon 59
Pagpadayag nga gihatag pinaagi ni Joseph Smith ang Propeta, sa Zion, Lalawigan sa Jackson, Missouri, Agosto 7, 1831. Nag-una niini nga pagpadayag, ang yuta gipahinungod, sigon sa gisugo sa Ginoo, ug ang dapit alang sa umaabot nga templo gipahinungod. Sa adlaw nga nadawat kini nga pagpadayag, si Polly Knight, ang asawa ni Joseph Knight Sr., namatay, ang unang miyembro sa Simbahan nga namatay sa Zion. Ang nag-unang mga miyembro miila niini nga pagpadayag isip “pagtudlo sa mga Santos kon unsaon sa pagbalaan sa igpapahulay ug kon unsaon sa pagpuasa ug sa pag-ampo.”
1–4, Ang matinud-anong mga Santos sa Zion mapanalanginan; 5–8, Sila kinahanglang mohigugma ug moalagad sa Ginoo ug mosunod sa Iyang mga sugo; 9–19, Pinaagi sa pagbalaan sa adlaw sa Ginoo, ang mga Santos mapanalanginan sa temporal ug sa espirituhanon nga paagi; 20–24, Ang matarong gisaaran og kalinaw niini nga kalibotan ug kinabuhing dayon sa kalibotan nga moabot.
1 Tan-awa, bulahan, miingon ang Ginoo, sila nga mianhi niini nga yuta uban sa bug-os nga tumong sa akong himaya, sumala sa akong mga sugo.
2 Kay kadtong mga mabuhi makapanunod sa yuta, ug kadtong mga mamatay makapahulay gikan sa ilang tanang kahago, ug ang ilang mga buhat mosunod kanila; ug makadawat sila og korona didto sa mga mansyon sa akong Amahan, nga akong giandam alang kanila.
3 Oo, bulahan sila kansang mga tiil nagbarog ibabaw sa yuta sa Zion, kinsa nagsunod sa akong ebanghelyo; kay makadawat sila sa ilang ganti sa maayong mga butang sa yuta, ug kini mamunga sa hilabihan.
4 Ug sila pagakoronahan usab og mga panalangin nga gikan sa kahitas-an, oo, ug sa daghang sugo, ug uban sa mga pagpadayag diha sa ilang panahon—sila nga mga matinud-anon ug makugihon sa akong atubangan.
5 Mao nga, hatagan ko sila og usa ka sugo, nga mag-ingon: Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gahom, hunahuna, ug kusog; ug sa ngalan ni Jesukristo kamo moserbisyo kaniya.
6 Higugmaa ang inyong silingan sama sa inyong kaugalingon. Dili kamo mangawat; ni manapaw, ni magpatay, ni magbuhat og bisan unsa nga butang sama niini.
7 Pasalamati ninyo ang Ginoo nga inyong Dios sa tanang butang.
8 Paghalad kamo og usa ka sakripisyo ngadto sa Ginoo nga inyong Dios pinaagi sa pagkamatarong, gani nianang usa ka masulub-on nga kasingkasing ug usa ka mahinulsolon nga espiritu.
9 Ug nga kamo mas mag-amping sa inyong mga kaugalingon nga dili mahugawan sa kalibotan, kamo moadto sa balay nga ampoanan ug mohalad sa inyong mga sakramento sa akong balaan nga adlaw;
10 Kay sa pagkatinuod mao kini ang adlaw nga gitudlo nganha kaninyo sa pagpahulay gikan sa inyong mga paghago, ug mohatag sa inyong mga pag-ampo ngadto sa Labing Halangdon;
11 Bisan pa niana ang inyong ligdong nga mga panaad ihalad diha sa pagkamatarong sa tanang adlaw ug sa tanang panahon;
12 Apan hinumdomi nga dinhi niini, nga adlaw sa Ginoo, kamo mohatag sa inyong mga halad ug sa inyong mga sakramento ngadto sa Labing Halangdon, mokompisal sa inyong mga sala ngadto sa inyong kaigsoonan, ug sa atubangan sa Ginoo.
13 Ug niini nga adlaw ayaw kamo pagbuhat og bisan unsa nga butang, himoa lamang nga ang inyong pagkaon andamon uban sa usa ka katuyoan sa kasingkasing aron ang inyong pagpuasa mahimong hingpit, o, sa laing pagkasulti, aron ang inyong kamaya mapuno.
14 Sa pagkatinuod, mao kini ang puasa ug pag-ampo, o sa laing pagkasulti, paglipay ug pag-ampo.
15 Ug kon kamo mohimo niini nga mga butang uban sa pasalamat, uban sa malipayon nga mga kasingkasing ug mga panagway, dili uban sa sobra nga katawa, kay sala kini, apan uban sa kamaya sa kasingkasing ug malipayon nga panagway—
16 Sa pagkatinuod moingon ako, nga kon kamo nagbuhat niini, ang kahingpitan sa yuta mainyo, ang mga kahayopan sa umahan ug ang mga kalanggaman sa kahanginan, ug kanang mokatkat sa mga kahoy ug molakaw sa yuta;
17 Oo, ug ang hilba, ug ang maayo nga mga butang nga gikan sa yuta, alang sa pagkaon man o alang sa panapot, o alang sa mga balay, o alang sa mga kamalig, o alang sa mga prutasan, o alang sa mga tanaman, o alang sa mga ubasan;
18 Oo, ang tanang butang nga gikan sa yuta, sa panahon niana, gihimo alang sa kaayohan ug sa paggamit sa tawo, aron makapahimuot sa mata ug makapamaya sa kasingkasing;
19 Oo, alang sa pagkaon ug alang sa panapot, alang sa pagtilaw ug alang sa pagsimhot, sa paglig-on sa lawas ug sa pagpabuhi sa kalag.
20 Ug makapahimuot kini sa Dios nga iyang gihatag ang tanan niini nga mga butang ngadto sa tawo; kay tungod niini nga katuyoan gibuhat kini aron gamiton, uban sa paghukom, nga dili magpalabi, ni pinaagi sa pagpugos.
21 Ug walay butang nga ang tawo makapasilo sa Dios, o ang iyang kasuko mapukaw batok ni bisan kinsa, gawas niadtong dili mokompisal sa iyang sayop diha sa tanang butang, ug dili mosunod sa iyang mga sugo.
22 Tan-awa, pinasubay kini sa balaod ug sa mga propeta; mao nga, ayaw na ako pangutan-a mahitungod niini nga butang.
23 Apan hibaloi nga siya nga nagbuhat og mga buluhaton sa pagkamatarong makadawat sa iyang ganti, gani kalinaw niini nga kalibotan, ug kinabuhing dayon sa kalibotan nga moabot.
24 Ako, ang Ginoo, namulong niini, ug ang Espiritu nagpamatuod. Amen.