Seksiyon 77
Pagpadayag nga gihatag ngadto ni Joseph Smith ang Propeta, sa Hiram, Ohio, mga 1832 sa Marso. Ang kasaysayan ni Joseph Smith nag-ingon, “Kalabot sa paghubad sa mga Kasulatan, akong nadawat ang mosunod nga pagpasabot sa Pinadayag ni San Juan.”
1–4, Ang mga mananap adunay mga espiritu ug makapuyo sa mahangtoron nga kalipay; 5–7, Kini nga yuta adunay temporal nga kinabuhi nga 7,000 ka tuig; 8–10, Ang nagkalain-laing mga anghel mopahiuli sa ebanghelyo ug mangalagad sa ibabaw sa yuta; 11, Ang pagselyo sa 144,000; 12–14, Si Kristo moanhi sa sinugdanan sa ikapito nga kaliboan nga tuig; 15, Duha ka propeta ipahimutang ngadto sa nasod sa mga Judeo.
1 P. Unsa ang dagat nga bildo nga gipamulong ni Juan, sa ika-4 nga kapitulo, ug ika-6 nga bersikulo sa Pinadayag?T. Kini mao ang yuta, sa balaan, imortal, ug mahangtoron nga kahimtang.
2 P. Unsay angay natong masabtan bahin sa upat ka mananap, nga gipamulong diha nianang mao gihapon nga bersikulo?T. Mga mahulagwayon kana nga mga pulong, nga gigamit sa Tigpadayag, nga si Juan, sa paghulagway sa langit, sa paraiso sa Dios, sa kalipay sa tawo, ug sa mga mananap, ug sa mga butang nga nagkamang, ug sa mga langgam sa kahanginan; kanang espirituhanon nga binuhat nga susama nianang temporal; ug nianang temporal nga susama nianang espirituhanon; ang espiritu sa tawo susama sa iyang pagkatawo, mao usab ang espiritu sa mananap, ug ang matag lain nga nilalang nga gilalang sa Dios.
3 P. Ang upat ba ka mananap nagpasabot lamang sa piho nga mga mananap, o nagsimbolo kini sa mga pundok o mga kaliwat?T. Nagpasabot lamang kini sa upat ka piho nga mga mananap, nga gipakita kang Juan, nga nagsimbolo sa himaya sa mga pundok sa mga binuhat diha sa gidestino kanila nga kaliwat o kahimtang sa paglalang, sa pagtagamtam sa ilang walay kataposang kalipay.
4 P. Unsay angay natong masabtan bahin sa mga mata ug mga pako, nga anaa sa mga mananap?T. Ang ilang mga mata nagsimbolo sa kahayag ug kahibalo, nga mao, nga puno sila sa kahibalo; ug ang ilang mga pako nagsimbolo sa gahom, sa paglihok, sa pagbuhat, ug uban pa.
5 P. Unsay angay natong masabtan bahin sa upat ug kawhaan ka elder, nga gipamulong ni Juan?T. Kinahanglan natong masabtan nga kining mga elder nga nakita ni Juan, mao ang mga elder nga matinud-anon sa buhat sa pagpangalagad ug patay na; kinsa nahisakop sa pito ka simbahan, ug anaa na sa paraiso sa Dios.
6 P. Unsay angay natong masabtan bahin sa basahon nga nakita ni Juan, nga giselyohan sa luyo og pito ka selyo?T. Kinahanglan nga atong masabtan nga naglangkob kini sa gipadayag nga kabubut-on, sa mga misteryo, ug sa mga buhat sa Dios; sa tinago nga mga butang bahin sa iyang pagdumala kalabot niini nga yuta atol sa pito ka libo ka tuig nga gidugayon niini, o temporal nga pagkaanaa niini.
7 P. Unsay angay natong masabtan bahin sa pito ka selyo diin kini giselyo?T. Kinahanglan nga atong masabtan nga ang unang selyo naglakip sa mga butang sa nag-unang usa ka libo ka tuig, ug ang ikaduha usab sa ikaduha ka libo ka tuig, ug padayon hangtod sa ikapito.
8 P. Unsay angay natong masabtan bahin sa upat ka anghel, nga gipamulong diha sa ika-7 nga kapitulo ug unang bersikulo sa Pinadayag?T. Kinahanglan nga atong masabtan nga sila ang upat ka anghel nga gipadala gikan sa Dios, nga gihatagan og gahom sa ibabaw sa upat ka bahin sa yuta, sa pagluwas sa kinabuhi ug sa paglaglag; kanila gisalig ang walay kataposang ebanghelyo nga itugyan ngadto sa matag nasod, kaliwatan, pinulongan, ug katawhan; naghupot sa gahom sa pagtak-op sa kalangitan, sa pagselyo sa katawhan ngadto sa kinabuhing dayon, o sa pagtambog ngadto sa mga dapit sa kangitngit.
9 P. Unsay angay natong masabtan bahin sa anghel nga misaka gikan sa silangan, sa Pinadayag ika-7 nga kapitulo ug ika-2 nga bersikulo?T. Kinahanglan nga atong masabtan nga ang anghel nga misaka gikan sa silangan mao siya kinsa gihatagan sa selyo sa buhi nga Dios ngadto sa napulog duha ka tribo sa Israel; mao nga, gipahayag niya ngadto sa upat ka anghel nga naghupot sa walay kataposang ebanghelyo, sa pag-ingon: Ayaw pasakiti ang yuta, ni ang dagat, ni ang mga kahoy, hangtod nga atong maselyohan ang mga sulugoon sa atong Dios diha sa ilang mga agtang. Ug, kon inyo kining dawaton, mao kini si Elias nga moanhi aron sa pagpundok sa mga tribo sa Israel ug sa pagpahiuli sa tanang butang.
10 P. Kanus-a ang mga butang nga gihisgotan dinhi niini nga kapitulo matuman?T. Matuman kini sa ikaunom ka libo nga tuig, o sa pagbukas sa ikaunom nga selyo.
11 P. Unsay angay natong masabtan bahin sa pagselyo sa usa ka gatos ug kap-atan ug upat ka libo, gikan sa tanang tribo sa Israel—nga napulog duha ka libo gikan sa matag tribo?T. Kinahanglan nga atong masabtan nga kadtong mga naselyohan mao ang high priest, nga gi-orden ngadto sa balaan nga kapunongan sa Dios, sa pagpangalagad sa walay kataposang ebanghelyo; kay sila mao kadtong gi-orden gikan sa matag nasod, kaliwatan, pinulongan, ug katawhan, pinaagi sa mga anghel nga gihatagan og gahom ibabaw sa kanasoran sa yuta, sa pagdala kutob sa moadto sa simbahan sa Unang Natawo.
12 P. Unsay angay natong masabtan bahin sa pagpatingog sa mga trumpeta, nga gihisgotan diha sa ika-8 nga kapitulo sa Pinadayag?T. Kinahanglan nga atong masabtan nga kay ang Dios mihimo sa kalibotan sulod sa unom ka adlaw, ug sa ikapito ka adlaw iyang gitapos ang iyang buhat, ug mibalaan niini, ug usab mihulma sa tawo gikan sa abog sa yuta, mao usab, sa sinugdanan sa ikapito ka libo ka tuig nga ang Ginoong Dios mobalaan sa yuta, ug mohuman sa kaluwasan sa tawo, ug mohukom sa tanang butang, ug motubos sa tanang butang, gawas niadtong wala niya ibutang ubos sa iyang gahom, sa higayon nga selyohan niya ang tanang butang, ngadto sa kataposan sa tanang butang; ug ang pagtingog sa mga trumpeta sa pito ka anghel mao ang pag-andam ug pagtapos sa iyang buhat, sa pagsugod sa ikapito ka libo ka tuig—nga pag-andam sa agianan sa dili pa moabot ang panahon sa iyang pag-anhi.
13 P. Kanus-a ang mga butang matuman, nga nahisulat diha sa ika-9 nga kapitulo sa Pinadayag?T. Matuman kini human mabuksan ang ikapito nga selyo, sa dili pa moanhi si Kristo.
14 P. Unsay angay natong masabtan bahin sa gamay nga basahon nga gikaon ni Juan, sama sa gihisgotan diha sa ika-10 nga kapitulo sa Pinadayag?T. Kinahanglan natong masabtan nga usa kadto ka misyon, ug usa ka ordinansa, alang kaniya ang pagpundok sa mga tribo sa Israel; tan-awa, kini si Elias, kinsa, sumala sa nahisulat, kinahanglang moanhi ug mopahiuli sa tanang butang.
15 P. Unsay angay natong masabtan bahin sa duha ka saksi, diha sa ikanapulog usa nga kapitulo sa Pinadayag?T. Sila mao ang duha ka propeta nga ipahimutang ngadto sa nasod sa mga Judeo sa kataposang mga adlaw, sa panahon sa pagpahiuli, ug sa pagpanagna ngadto sa mga Judeo human sila mapundok ug makatukod sa siyudad sa Jerusalem sa yuta sa ilang mga amahan.