Seksiyon 89
Pagpadayag nga gihatag pinaagi ni Joseph Smith ang Propeta, sa Kirtland, Ohio, Pebrero 27, 1833. Isip sangpotanan sa unang kaigsoonan nga migamit og tabako sa ilang mga tigom, ang Propeta nagiyahan sa pagpamalandong sa maong butang; agig sangpotanan, nangutana siya sa Ginoo kabahin niini. Kini nga pagpadayag, nga nailhan nga Pulong sa Kaalam, mao ang resulta.
1–9, Ang paggamit sa bino, isog nga ilimnon, tabako, ug init nga ilimnon gidili; 10–17, Mga hilba, mga bunga, unod, ug mga lugas giandam aron gamiton alang sa tawo ug sa mga mananap; 18–21, Ang pagkamasulundon sa balaod sa ebanghelyo, naglakip sa Pulong sa Kaalam, modala og temporal ug espirituhanong mga panalangin.
1 Ang Pulong sa Kaalam, alang sa kaayohan sa konseho sa mga high priest, nga nagtigom sa Kirtland, ug sa simbahan, ug usab sa mga santos sa Zion—
2 Ipadala isip katahoran; dili pinaagi sa sugo o pagpugos, apan pinaagi sa pagpadayag ug sa pulong sa kaalam, mopakita sa mga pamaagi ug kabubut-on sa Dios sa temporal nga kaluwasan sa tanang santos sa kataposang mga adlaw—
3 Gihatag isip usa ka baroganan inubanan og saad, gipahiangay sa kapasidad sa huyang ug sa labing huyang sa tanang santos, kinsa mao o mahimong tawagon nga mga santos.
4 Tan-awa, sa pagkatinuod, sa ingon niana ang Ginoo miingon kaninyo: Isip sangpotanan sa mga daotan ug mga laraw nga anaa ug maanaa sa mga kasingkasing sa nagkunsabong mga tawo sa kataposang mga adlaw, nagpasidaan ako kaninyo, ug mopasidaan kaninyo, pinaagi sa paghatag kaninyo niini nga pulong sa kaalam pinaagi sa pagpadayag—
5 Nga kutob adunay tawo nga moinom og bino o isog nga ilimnon uban kaninyo, tan-awa dili kini maayo, ni angay sa panan-aw sa inyong Amahan, gawas lamang sa panagtigom sa inyong kaugalingon sa paghalad sa inyong mga sakramento sa iyang atubangan.
6 Ug, tan-awa, kinahanglan nga bino gayod kini, oo, lunsay nga bino sa ubas, nga inyong kaugalingong binuhat.
7 Ug, usab, ang isog nga mga ilimnon dili alang sa tiyan, apan alang sa paghugas sa inyong lawas.
8 Ug usab, ang tabako dili alang sa lawas, ni alang sa tiyan, ug dili maayo alang sa tawo, apan usa ka hilba alang sa mga pangos ug sa tanang masakiton nga baka, gamiton sa tukmang paghukom ug kahanas.
9 Ug usab, ang init nga ilimnon dili alang sa lawas o sa tiyan.
10 Ug usab, sa pagkatinuod sultihan ko kamo, ang tanang maayo nga hilba giandam sa Dios alang sa panglawas, kinaiyahan, ug paggamit sa tawo—
11 Ang matag hilba sa panahon niini, ug matag bunga sa panahon niini; kining tanan angay nga gamiton uban sa pagmatngon ug pagpasalamat.
12 Oo, ang unod usab sa mga mananap ug sa mga langgam sa kahanginan, ako, ang Ginoo, miandam niini aron gamiton sa tawo uban sa pagpasalamat; bisan pa niana gamiton kini sa panagsa;
13 Ug akong ikahimuot nga dili kini gamiton, gawas sa mga panahon sa tingtugnaw, o sa katugnaw, o sa kagutom.
14 Ang tanang lugas giandam aron gamiton alang sa tawo ug sa kahayopan, nga mahimo nga sangkap sa kinabuhi, dili lamang alang sa tawo apan alang sa kahayopan sa umahan, ug sa mga langgam sa kalangitan, ug sa tanang ihalas nga mga mananap nga nagdagan o nagkamang sa yuta;
15 Ug gihimo kini sa Dios aron gamiton sa tawo sa mga panahon lamang sa kagutom ug hilabihan nga kagutom.
16 Ang tanang lugas maayo nga pagkaon sa tawo; sama usab ang bunga sa bagon; kana nga namunga, bisan diha sa yuta o sa ibabaw sa yuta—
17 Hinuon, ang trigo alang sa tawo, ug ang mais alang sa baka, ug ang mga abena alang sa kabayo, ug ang gahi nga mga lugas alang sa mga langgam ug alang sa baboy, ug alang sa tanang kahayopan sa umahan, ug ang sebada alang sa tanang mapuslanong mga hayop, ug alang sa dili maisog nga mga ilimnon, ingon usab ang ubang mga lugas.
18 Ug ang tanang santos kinsa mohinumdom sa pagsunod ug mobuhat niining mga panultihon, maglakaw nga masulundon sa mga sugo, makadawat og kahimsog sa ilang pusod ug uyok sa ilang mga bukog;
19 Ug makakaplag og kaalam ug dagkong mga bahandi sa kahibalo, gani tinago nga mga bahandi;
20 Ug modagan ug dili kapoyon, ug molakaw ug dili maluya.
21 Ug ako, ang Ginoo, mohatag ngadto kanila og saad, nga sila labyan ra sa tiglaglag nga anghel, sama sa nahitabo sa mga anak ni Israel, ug dili mopatay kanila. Amen.