Seksiyon 9
Pagpadayag nga gihatag pinaagi ni Joseph Smith ang Propeta ngadto kang Oliver Cowdery, didto sa Harmony, Pennsylvania, Abril 1829. Si Oliver gitambagan nga magpailob ug giawhag nga makontento sa pagsulat, sa pagkakaron, sa unsay gidikta sa tighubad, kay sa mosulay sa paghubad.
1–6, Ang uban nga karaang mga talaan pagahubaron pa; 7–14, Ang Basahon ni Mormon gihubad pinaagi sa pagtuon ug pinaagi sa espirituhanon nga pagpamatuod.
1 Tan-awa, sultihan ko ikaw, akong anak, tungod kay ikaw wala mohubad sumala sa imong gihangyo kanako, ug misugod na usab sa pagsulat alang sa akong sulugoon nga si Joseph Smith, Jun., bisan pa niana naglaom ako nga imong padayonon hangtod nga imong mahuman kining talaan nga akong gisalig kaniya.
2 Ug human niana, tan-awa, adunay uban pang mga talaan, nga ania kanako, nga ikaw hatagan ko og gahom sa paagi nga makatabang ikaw sa paghubad.
3 Pagmapailobon, akong anak, kay sumala kini sa akong kaalam, ug dili pa angay nga ikaw mohubad niini nga panahon.
4 Tan-awa, ang buhat diin ikaw gitawag sa pagbuhat mao ang pagsulat alang sa akong sulugoon nga si Joseph.
5 Ug, tan-awa, tungod kay ikaw wala mopadayon sumala sa imong nasugdan, dihang nagsugod ka sa paghubad, nga akong gikuha kini nga kahigayonan gikan kanimo.
6 Ayaw pagbagulbol, akong anak, kay sumala kini sa akong kaalam nga ikaw gitratar nako sa ingon niini nga paagi.
7 Tan-awa, wala ikaw makasabot; nagdahom ka nga kini akong ihatag kanimo, samtang ikaw wala maghunahuna gawas sa pagpangayo kanako.
8 Apan, tan-awa, sultihan ko ikaw, nga kinahanglan gayod nga imo kining tun-an og maayo sa imong hunahuna; dayon ikaw kinahanglan nga mangutana kanako kon husto ba kini, ug kon husto kini akong ipabati ang kainit sulod sa imong dughan; busa, imong mabati nga husto kini.
9 Apan kon dili kini husto ikaw dili makabaton niana nga mga pagbati, apan makabaton ka og kasamok sa hunahuna nga makapahimo kanimo nga makalimot sa butang nga sayop; busa, ikaw dili makasulat niana nga sagrado gawas kon kini ihatag kanimo gikan kanako.
10 Karon, kon ikaw nakahibalo pa unta niini ikaw nakahubad unta; bisan pa niana, dili tukma nga ikaw maghubad karon.
11 Tan-awa, tukma kadto sa diha nga ikaw nagsugod; apan ikaw nahadlok, ug ang panahon milabay na, ug dili na tukma karon;
12 Kay, wala ba nimo makita nga ako naghatag ngadto sa akong sulugoon nga si Joseph og igong kalig-on, mao nga nahimo kini? Ug walay usa kaninyo nga akong gipanghimaraot.
13 Buhata kini nga butang nga akong gisugo kanimo, ug ikaw mouswag. Pagmatinud-anon, ug ayaw pagpadala sa bisan unsa nga tentasyon.
14 Pagpabiling matinud-anon sa buhat diin ikaw akong gitawag, ug bisan usa ka buhok sa imong ulo dili mawala, ug ikaw pagabayawon sa kataposang adlaw. Amen.