Zavatra afenina sy zavatra tsy ampoizina
Monina any Iowa, Etazonia ny mpanoratra.
Tsara ve ny nihazona ny tsiambaratelon’i Kate?
“Omena ny olona tsirairay ny Fanahin’i Kristy mba hahazoany manavaka ny tsara amin’ny ratsy” (Môrônia 7:16).
“Jereo ange e!” Naka saribakoly vita amin’ny taratasy niforiporitra teo amin’ny tany tao amin’ny trano fivarotana iray i Kate. “Ito ataovy ao anaty paosinao.”
“Tian’ indry halaiko angaha izany?” Hoy i Maddy nanontany.
“Sady efa tsy azo amidy intsony io,” hoy i Kate. “Harian’izy ireo any amin’ny fanariam-pako fotsiny iny. Asa fanavotana ity ataontsika ity. Manavotra ity saribakoly ity isika!”
Hoy i Kate sady nitsiky tamin’i Maddy. Namaly tamin’ny tsiky koa i Maddy.
“Eny ary.” Natsofok’i Maddy tao am-paosiny ilay saribakoly. Nahatsapa tena ho miavaka aho manao asa fanavotana!
Raha teo am-pivoahana ilay toeram-pivarotana izy ireo dia toy ireny vato mavesatra ireny ilay saribakoly taratasy tao am-paosiny. Tokony ho izany ve no fahatsapana rehefa manao asa fanavotana?
Rehefa niverina tany an-tranon’i Maddy izy ireo dia nasian’i Kate scotch sy nopasohany tsara araka izay azony natao ilay saribakoly taratasy.
“Karazana akanjo toy ny ahoana re no hamboariko ho azy e?” Hoy izy sady naka pensilihazo miloko. “Ahoana raha akanjo tsara tarehy fentina amin’ny lanonana?”
Nanaiky avy hatrany i Maddy sady nanetsika ny lohany. “Avy eo dia azontsika aseho an’i neniko!”
“Tsia ka! Tsy azontsika lazaina na amin’iza na iza izany”, hoy i Kate. “Na oviana na oviana. Tsiambaratelontsika izany, ’zay a? Ampanantenao aho fa tsy hiteny indry.”
“Eny ary…. Tsy hilaza aho,” hoy i Maddy. “Fa maninona no tsy azoko lazaina?”
“Raha lazain’ indry dia ho tezitra i neninareo, ary mety tsy havelany hiaraka hilalao intsony isika.”
“Fa maninona izy no ho tezitra?” Hoy i Maddy nanontany. Nangotika ny kibony sady natahotra izy.
Napetrak’i Kate ny pensiliny. “Raha tsy lazainao dia havelako tazoninao ilay saribakoly sy ireo akanjo rehetra namboariko ho azy.”
Izay vao fantatr’i Maddy ny antony mahatonga azy natahotra. “Na … nangalarintsika io e?” hoy izy nibitsibitsika.
“E, indry ange no nampiditra an’io tao am-paosy sy namoaka azy avy tao amin’ilay fivarotana e!”
“Satria indry no niteny ahy hanao izany!”
“Tsy niteny an’izany aho!” Hoy i Kate. “Andeha hody aho aloha sao hampisy olana ahy eto indry.” Nitsangana izy dia nihazakazaka hivoaka ny varavarana.
Tamin’izay indrindra i Neny no niditra ilay efitrano. “Fa naninona i Kate no nandeha maika be ohatra an’iny?” Hitany ilay saribakoly taratasy teny an-tanan’i Maddy. “Ary avy aiza iny?”
Nanaiki-molotra i Maddy. Tsy nampahazo aina azy ny fanafenana zavatra amin’ny neniny. Saingy ahoana raha marina ny nolazain’i Kate ary ho tezitra i Neny?
Tsy mety lasa mihitsy ilay fahatsapana fitaintainana tao amin’ny kibony. Nisento lalina izy ary namboraka ny tantara iray manontolo.
“Nilaza tamiko i Kate mba hampanantena ny hitazona izay ho tsiambaratelo,” hoy izy. “Saingy ratsy izany.”
Nipetraka teo akaikiny teo am-pandriany i Neny. “Ratsy daholo ny ankamaroan’ny tsiambaratelo. Indrindra fa rehefa tenenina tsy hilaza na amin’iza na iza mihitsy ianao. Kanefa ny zavatra tsy ampoizina, toy ny fanomezana na fety iray, dia afaka ny ho zavatra tsara. Natao hampiala voly ny rehetra izany.”
Nanetsika ny lohany i Maddy. “Misaotra tsy tezitra tamiko,” hoy izy. “Nilaza i Kate fa ho tezitra ianao.”
Nofihinin’i Neny mafy izy. “Tena mahafaly ahy ianao fa nihaino ny Fanahy Masina ka nilaza tamiko ny marina.”
“Azonao entina miverina any amin’ilay toeram-pivarotana ve aho hamerina ilay saribakoly?” Hoy i Maddy nanontany.
“Mazava ho azy!” Nitsiky i Neny. “Dia rehefa miverina isika dia afaka manampy ahy hanamboatra mofo mamy atao tsy ampoizin’i Dada ianao.”
Nihomehy i Maddy. “Izany izao zavatra mampahazo aina ahy!”
Sary nataon’i Devin McSherry