« ការអភ័យទោសដូចជានីហ្វៃ » ទស្សនាវដ្តី ប្រិយមិត្ត ខែ មករា ឆ្នាំ ២០២៤ ទំព័រ ៤–៥ ។
ការអភ័យទោសដូចជានីហ្វៃ
អៃស្សា មិនចង់ចងកំហឹងនឹង ចូស ជារៀងរហូតទេ ។
ដំណើររឿងនេះបានកើតឡើងនៅ ស.រ.អា. ។
អៃស្សា បានរត់ ហើយទាត់បាល់ទៅមិត្តរួមក្រុមរបស់គាត់ដែលមានឈ្មោះថា ធីម៉ូធី ។ គាត់បានមើលពេល ធីម៉ូធី យារជើងទៅក្រោយ ហើយទាត់បាល់ចូលទៅក្នុងទី ។
« ចូលហើយ ! » ធីម៉ូធី បានស្រែកនៅពេលដែលគ្រាប់បាល់ចូលក្នុងសំណាញ់ ។
អៃស្សា បានស្រែកអបអរ ។ ពួកគេបានឈ្នះការប្រកួតនោះ ។
នៅពេលដែលគាត់បានដើរចេញពីទីលានប្រកួត គាត់មានអារម្មណ៍ល្អណាស់ ! ប៉ុន្តែបន្ទាប់មកក្មេងម្នាក់ក្នុងក្រុមផ្សេងទៀតដែលមានឈ្មោះថា ចូស បានហៅឈ្មោះគាត់ដ៏អាក្រក់ ។
អៃស្សា មានអារម្មណ៍ភ្ញាក់ផ្អើល និងឈឺចាប់ ។ គាត់មិនដឹងថាត្រូវនិយាយអ្វីនោះទេ ។ គាត់បានមើលទៅដី ហើយបានដើរមួយៗទៅកាន់មិត្តរួមក្រុមរបស់គាត់ ។
ធីម៉ូធីបាននិយាយថា « យើងបានឈ្នះហើយ ! » « អៃស្សាបោះបាល់បានល្អណាស់ » ។
ប៉ុន្តែ អៃស្សាពុំមានអារម្មណ៍ល្អនោះទេ ។ ក្រោយពី ចូស បាននិយាយឲ្យគាត់ ! គាត់បានមានអារម្មណ៍សោកសៅ និងខឹង ។
អស់ពេញមួយថ្ងៃ អៃស្សា មានអារម្មណ៍ថា អារម្មណ៍បាក់ទឹកចិត្តកំពុងទាញគាត់ចុះ ។ គាត់ មិន ចូលចិត្ត ចូស ទៀតនោះទេ ។
នៅយប់នោះ អៃស្សា បានអង្គុយជាមួយគ្រួសាររបស់គាត់អំឡុងពេលអានព្រះគម្ពីរ ។ គាត់ព្យាយាមស្តាប់ទៅបងប្អូនស្រីរបស់គាត់អាន ។ ប៉ុន្តែគាត់មិនអាចឈប់គិតអំពីអ្វីដែល ចូស បាននិយាយនោះទេ ។
អៃស្សា បានមើលទំព័រនៃព្រះគម្ពីរមរមនរបស់គាត់ ។ គាត់បានឈប់នៅខគម្ពីរមួយក្នុង នីហ្វៃទី ១ ។ វានិយាយអំពីគ្រាដែលបងៗរបស់នីហ្វៃ ធ្វើមិនល្អដាក់គាត់ ។
ខគម្ពីរនោះបាននិយាយថា « ហើយហេតុការណ៍បានកើតឡើងថា ខ្ញុំបានអភ័យទោសដល់ពួកគេ ដោយស្មោះអស់ពីចិត្តនូវអ្វីៗដែលពួកគេបានប្រព្រឹត្ត » ។*
នីហ្វៃបានអភ័យទោសឲ្យបងៗរបស់គាត់ ? អៃស្សាបានគិត ។ សូម្បីតែបន្ទាប់ពីពួកគេធ្វើអាក្រក់ដាក់គាត់យ៉ាងខ្លាំងក្តី ?
អៃស្សា បានគិតអំពី ចូស ។ គាត់មិនចង់មានអារម្មណ៍មិនល្អចំពោះ ចូស ជារៀងរហូតនោះទេ ។ គាត់មានអាយុតែ ១០ ឆ្នាំប៉ុណ្ណោះ !
អៃស្សា ចង់ធ្វើដូចជានីហ្វៃ ។ គាត់អាចអភ័យទោសឲ្យ ចូស ដូចជានីហ្វៃ បានអភ័យទោសឲ្យបងៗគាត់ដែរ ។ ហើយបើ ចូស និយាយអ្វីមួយមិនល្អម្តងទៀត គាត់នឹងប្រាប់គាត់មិនឲ្យធ្វើដូច្នោះទេ ។
គាត់មានអារម្មណ៍កក់ក្តៅ និងសុខសាន្តនៅក្នុងចិត្ត ។ វាដូចជាព្រះវិញ្ញាណបរិសុទ្ធមានបន្ទូលថា « ឯងកំពុងធ្វើរឿងត្រឹមត្រូវហើយ » ។
ម៉ាក់បានសួរថា « អៃស្សា តើកូនបានរៀនអ្វីមកពីខគម្ពីរនេះ ? »
អៃស្សា បានងើបមុខឡើង ។ គាត់បាននិយាយថា « សូមទោស កូនអានខគម្ពីរផ្សេងទេ » ។ គាត់បានប្រាប់ទៅគ្រួសារគាត់ពីអ្វីដែលបានកើតឡើងនៅឯកន្លែងលេងបាល់ទាត់ ។
ម៉ាក់ និងប៉ាបានឱប អៃស្សា ។ ប៉ាបានមានប្រសាសន៍ថា « ប៉ាសោកស្តាយណាស់ដែល ចូស ធ្វើមិនល្អដាក់កូន ។ អ្វីដែលគាត់និយាយនោះមិនពិតទេ ។ ប៉ុន្តែវាមិនថ្វីទេ ដែលមានអារម្មណ៍ឈឺចាប់ពីការនិយាយនោះ » ។
អៃស្សា បានញញឹម ។ « អរគុណ ។ កូនបានខឹងខ្លាំងអស់មួយរយៈហើយ ។ ប៉ុន្តែឥឡូវនេះ ពេលដែលកូនបានអានខគម្ពីរនេះហើយ កូនមិនចង់ខឹងនឹងគាត់ទៀតទេ ។ កូនចង់អភ័យទោសឲ្យគាត់ ។ ហើយកូនមានអារម្មណ៍ល្អរួចទៅហើយ ! »
« នោះពិតជាល្អណាស់ ! » ម៉ាក់បានញញឹមដែរ ។ « ការអភ័យទោសមិនមែនងាយស្រួលជានិច្ចនោះទេ ។ ប៉ុន្តែកូនបានធ្វើត្រឹមត្រូវហើយ ។ វាស័ក្ដិសមនឹងធ្វើណាស់ » ។
អៃស្សា បានឈ្ងោកមើលទៅព្រះគម្ពីររបស់គាត់ ។ វាបានជួយដល់គាត់ ។ ទម្ងន់ដ៏ធ្ងន់ពីមុនបានរសាយបាត់ទៅ ។ បេះដូងរបស់គាត់បានមានភាពកក់ក្តៅ និងពេញដោយសេចក្តីសុខសាន្តវិញ ។
រចនារូបភាពដោយ អាលីស្សា ថាលិនថ៍