« ព្រះគម្ពីររបស់សាមី » ទស្សនាវដ្តី ប្រិយមិត្ត ខែ មករា ឆ្នាំ ២០២៤ ទំព័រ ១០–១១ ។
ព្រះគម្ពីររបស់សាមី
សាមី ក៏ចង់អានដែរ ។
ដំណើររឿងនេះបានកើតឡើងនៅ បូលីវៀ ។
ប៉ាពី បានទះដៃនៅពេលចប់រាត្រីជួបជុំក្រុមគ្រួសារ ។ គាត់បាននិយាយថា « ខ្ញុំមានយោបល់មួយសម្រាប់គោលដៅគ្រួសារ » ។ « តោះ អានព្រះគម្ពីរមរមនជាមួយគ្នាជារៀងរាល់ថ្ងៃ » ។
បងប្រុសរបស់សាមី ដែលមានឈ្មោះថា អាន់ឌ្រីស៍ និងជូអាន បានងក់ក្បាលដោយមានស្នាមញញឹមដ៏ធំពីគំនិតនេះ ។
អាន់ឌ្រីស៍ បាននិយាយថា « យល់ព្រម ! » ។
សាមីក៏រំភើបចិត្តផងដែរ ។ ប៉ុន្តែបន្ទាប់មកគាត់បានចងចាំអ្វីមួយ ។ គាត់បានលើកដៃឡើង ។ « ខ្ញុំមិនចេះអានអក្សរផង ។ តើខ្ញុំជួយបានដោយរបៀបណា ? »
ជូអាន បានញាក់ស្មា ។ « ឯងគ្រាន់តែអង្គុយស្តាប់បានហើយ » ។
បងប្រុសរបស់សាមី ចេះអានរួចទៅហើយ ។ ប៉ុន្តែ សាមី ទើបមានអាយុប្រាំឆ្នាំប៉ុណ្ណោះ ។ គាត់មិនទាន់បានរៀនអានអក្សរនៅឡើយទេ ។
« ប៉ុន្តែខ្ញុំក៏ចង់ជួយដែរ ! » សាមី បាននិយាយទាំងជ្រួញចិញ្ចើម ។
ម៉ាក់បានឱបសាមី ។ គាត់បានមានប្រសាសន៍ថា « ហើយកូននឹងអាចធ្វើបាន » ។ « តែងតែមានវិធីដើម្បីធ្វើនូវអ្វីដែលព្រះបានបញ្ជាយើង » ។
នៅយប់ស្អែក គ្រួសាររបស់សាមី បានជួបជុំគ្នាអានព្រះគម្ពីរមរមន ។ ពួកគេគ្រប់គ្នាយកព្រះគម្ពីររបស់ពួកគេមក លើកលែងតែ សាមី ។ ម៉ាក់បានឲ្យសៀវភៅរូបភាពដំណើររឿងព្រះគម្ពីរមរមនដល់គាត់ ។
គាត់បានមានប្រសាសន៍ដោយស្នាមញញឹមថា « កូនអត់ទាន់ចេះអានវា ។ ប៉ុន្តែកូនអាចអានរូបភាពបាន » ។
សាមី បានកាន់សៀវភៅយ៉ាងជាប់ ។ ឥឡូវនេះគាត់អាចអានជាមួយក្រុមគ្រួសារគាត់ហើយ !
ពួកគេបានឆ្លាស់វេនគ្នាអាន ។ សាមី បានមើលទៅរូបភាពដែលបង្ហាញពីដំណើររឿងនេះ ។ នៅពេលដល់វេនរបស់គាត់ គាត់បានប្រាប់អ្នកផ្សេងពីអ្វីដែលគាត់បានឃើញនៅក្នុងរូបភាព ។ គាត់បានប្រាប់ព័ត៌មានលម្អិតជាច្រើនដែលគាត់អាចប្រាប់បាន ។
នៅពេលជាច្រើនថ្ងៃកន្លងទៅ សាមី ចង់អានកាន់តែខ្លាំងឡើងៗ ។ ម៉ាក់ បានបង្រៀនគាត់ពីសំឡេងដែលអក្សរនីមួយៗបញ្ចេញ ។ បន្ទាប់មក គាត់បានបង្ហាញសាមីពីរបៀបប្រកបពាក្យ ។ ជាច្រើនខែក្រោយមក សាមី មិនសូវត្រូវការសៀវភៅរូបភាពទៀតទេ ។ ផ្ទុយទៅវិញ គាត់បានអានពាក្យចុងក្រោយដែលក្រុមគ្រួសាររបស់គាត់បានអាន ។ ម៉ាក់អានពាក្យមុន ហើយសាមី អានពាក្យតាមក្រោយ ។
ដំបូងឡើយ ពួកគេអានយឺតៗ ។ ដើម្បីអានឲ្យចប់ជំពូកនីមួយៗ ត្រូវចំណាយពេលយូរ ។ អាន់ឌ្រីស៍ និងជូអាន ថ្ងូរនៅពេលដល់វេនរបស់សាមី ។ ប៉ុន្តែពួកគេនៅតែអានជាគ្រួសារដដែល ។
បន្តិចម្តងៗ សាមី អានបានកាន់តែច្រើន ។ គាត់អានពាក្យមួយពីខ នីមួយៗ បន្ទាប់មកពីរពាក្យ បន្ទាប់មក បីពាក្យ ។ បន្ទាប់មក គាត់ចាប់ផ្ដើមអានខគម្ពីរទាំងមូល !
នៅពេលគោលដៅពួកគេជិតចប់ សាមី អាចអានពីរបីខគម្ពីរដោយខ្លួនគាត់បាន ។ ការអានរបស់គាត់បានរីកចម្រើនកាន់តែប្រសើរឡើង ។ សេចក្តីស្រឡាញ់របស់គាត់ចំពោះព្រះគម្ពីរមរមនក៏កាន់តែច្រើនឡើងផងដែរ ។
នៅទីបំផុត គ្រួសាររបស់សាមី បានអានព្រះគម្ពីរមរមនចប់ ។ វាចំណាយពេលពីរឆ្នាំ ! ឥឡូវនេះ សាមី មានអាយុប្រាំពីរឆ្នាំហើយ ហើយគាត់រៀនអានបានយ៉ាងល្អ ។
« សូមអបអរសាទរ ! » ប៉ាពី បានតប ។ « យើងធ្វើបានសម្រេចហើយ ! »
សាមី បានស្រែកអបអរជាមួយគ្រួសាររបស់គាត់ ។ គាត់បានជួយពួកគេអានព្រះគម្ពីរមរមនចប់ !
ជូអាន បានឱបសាមី ។ « តើឯងមានគោលដៅអ្វីសម្រាប់រយៈពេលពីរឆ្នាំខាងមុខ ? »
សាមី បានញញឹម ។ គាត់ក្រោកឈរ ហើយបាននិយាយថា « ខ្ញុំនឹងអានព្រះគម្ពីរមរមនម្ដងទៀត ! »
រចនារូបភាពដោយ មេលីសា ម៉េនវីល កាស៊ីវ៉ាហ្គី