Neno la Mwisho

Kutimiza Ahadi Zetu

Na Mzee Ronald A. Rasband

Wa Akidi ya Mitume Kumi na Wawili

Kutoka kwenye hotuba ya mkutano mkuu wa Oktoba 2019.

Vielelezo na Emily Davis

Jioni moja katika ujana wangu, mama yangu aliketi pamoja nami kwenye mguu wa kitanda chake na kuzungumza kwa unyenyekevu kuhusu umuhimu wa kuishi Neno la Hekima. Aliniangalia moja kwa moja machoni mwangu, na nilihisi maneno yake yakipenya moyoni mwangu: “Niahidi, Ronnie, leo, kwamba daima utaishi Neno la Hekima.” Kwa dhati nilifanya ahadi hiyo kwake, na nimeishikilia kwa miaka hii yote.

Pia nilifanya uamuzi mapema wa kufuata sheria za Mungu, na kamwe sikuhitaji kufikiria upya juu ya hilo. Bwana amesema, “Mimi, Bwana, ninafungwa wakati ninyi mnapofanya ninayosema; lakini msipofanya ninayosema, ninyi hamna ahadi.” (Mafundisho na Maagano 82:10).

Kama Mtume wa Bwana Yesu Kristo, ninakualikeni ninyi kuzingatia ahadi na maagano mliyofanya na Bwana, na watu wengine kwa uadilifu mkubwa, mkijua kwamba neno lako ni dhamana yako. Ninakuahidini, mfanyapo hivi, Bwana ataimarisha maneno yenu na kukubali matendo yenu kadiri mnavyojitahidi kwa bidii bila kuchoka kujenga maisha yenu, familia zenu, na Kanisa la Yesu Kristo la Watakatifu wa Siku za Mwisho. Yeye atakuwa pamoja na ninyi, nanyi mnaweza, kwa kujiamini, kutarajia “kupokelewa mbinguni, kwamba huko [ninyi] mpate kukaa pamoja na Mungu katika hali ya furaha isiyo na mwisho” (Mosia 2:41).

Uadilifu inamaanisha kuwa mwaminifu. Pia inamaanisha kufanya kitu sahihi hata kama hakuna mtu anayekuangalia. Tunakuwa na uadilifu tunapotimiza ahadi zetu.

Kukubali inamaanisha kutoa idhini kwa ajili ya kitendo.

Bidii bila kuchoka inamaanisha kuendelea kujaribu, hata kama ni vigumu.

Je, ni ahadi gani wewe umefanya kwa Bwana na kwa watu wanaokuzunguka? Je, ni ahadi gani unazopaswa kufanya?