“Na Gagadre Me Dua na Lotu,” Me iSakisaki ni iTabagone, Nove. 2022.
Soqoni ena Mataka ni Vakarauwai
Na Gagadre me Dua na Lotu
Veitikina lavetaki
Nikua, na noqu itukutuku e baleti ira na tamata vinaka dau nanuma na lotu era sa sega ni lakova se vakaitavi tiko ena nodra dui matalotu. Niu kaya nodra “matalotu,” au okata kina na valenilotu, valenilotu ni musulomani, se so tale na isoqosoqo matalotu. Eda sa kauwaitaka tiko na kena sa lutu sara vakalevu na laki lotu vei ira kece oqo ena vanua raraba.
Na noda lakova ka vakaitavi ena dua na lotu ena vukea noda yaco me da tamata vinaka cake ka veivakauqeti vakavinaka cake ena nodra bula na tamata. …
… Ena lotu eda veimaliwai vata kei ira na tamata vakasakiti era segata tu me ra qarava na Kalou. E vakananuma vei keda oqo ni da sega ni tu taudua ena noda vakaitavi ena lotu. Eda gadreva kece na veimaliwai kei ira na tamata, kei na veimaliwai vakalotu eso sa so na veimaliwai vinaka duadua eda rawa ni sotava. …
… O ira na lewenilotu era sa sega ni dau lako i Lotu ka vakararavi ga ki na nona kaukauwa vakayalo sa tawasei ira mai na veitiki yaga ni kosipeli oqo: na kaukauwa kei na veivakalougatataki ni matabete, na taucoko ni ivunau vakalesui mai, kei na veivakauqeti kei na madigi me bulataki na ivunau oya. …
Me ikuri ni kena vakilai na vakacegu kei na reki mai na veitokani ni Yalo, era sa dau marautaka na noda lewe ni Lotu era dau lako i lotu na vua ni bulataki kosipeli, me vaka na veivakalougatataki ni kena bulataki na Vosa ni Vuku kei na yalayala ni sautu vakayago ka vakayalo ni kena bulataki na lawa ni ikatini.
… Na taucoko ni vunau kei na kena cakacaka vakalotu ni veivakabulai kei na bula vakacerecerei sa tu duadua ga ena Lotu vakalesuimai.