“Na Loloma ni Kalou,” Me iSakisaki ni iTabagone, Nove. 2022.
Soqoni ena Mataka ni Vakarauwai
Na Loloma ni Kalou
Veitikina lavetaki
Na Tamada Vakalomalagi e lomani keda vakalevu ka vakataucoko sara. …
E tiko vei Jisu Karisito na loloma uasivi vata oqo ka tiko vua na Tamana. …
Na loloma vakalou oqo e dodonu me solia vei keda na veivakacegui kei na nuidei levu ni da masu vua na Tamada ena yaca i Karisito. …
… Eso e dau nodra i valavala mera kaya, “Na iVakabula e lomani au ena kequ ituvaki ga,” ka sa dina sara. Ia ena sega ni kauta o Koya e dua vei keda ki na Nona matanitu ena keda ituvaki oqo, “ni sa sega na ka tawasavasava sa tiko rawa kina, se tiko rawa e matana.” [Mosese 6:57. …
… Ni sa vakamatatataka oti na Turaga ni sega ni rawa ni vakalaiva se tokona na ivalavala ca, e vakadeitaka na Turaga vei keda:
“Ia, ko koya sa veivutuni ka muria na vunau ni Turaga ena vosoti” [Vunau kei na Veiyalayalati 1:32. …
… Na noda lotu e sega ni lotu ni soli ulubale se na lotu ni tamata era sa taucoko tu, ia na lotu ga ni veivueti—vueti ena vuku i Jisu Karisito. …
Au sa dau qoroya tu mai vakabalavu, ka vakila talega, na nodra loloma titobu na parofita ni Kalou ena nodra veivakasalataki me baleta na ivalavala ca. Era sega ni uqeti ena gagadre mera veivakacacani. E nodra gagadre dina mera vakaraitaka na loloma ni Kalou, ka dina sara, ni sa loloma ga ni Kalou. …
Ni da vakatusa ni Kalou e lomani keda vakataucoko, eda rawa ni taroga yadua, “E vakacava sara mada na levu ni noqu lomana na Kalou? E rawa beka ni nuitaka o Koya na noqu loloma me vaka na noqu nuitaka na Nona loloma?”…
Au vakadinadinataka ni Rau bula dina tiko na Tamada Vakalomalagi kei na noda Dauniveivueti, o Jisu Karisito, ka vakakina na Nodrau loloma tudei, ka sega ni oti rawa.