I teienei te taime

Fa’ahitira’a parau

Peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Hōho’a

Russell M. Nelson

E mea pāpū ’ore noa ā te a muri a’e. E taui te huru o te reva. E mea tāuiui noa te terera’a o te fa’arava’ira’a faufa’a. E nehenehe te ’ati nātura, te mau ’ati, ’e te mau ma’i e taui ’oi’oi noa i te orara’a. E’ita teie mau ’ohipa e roa’a i tā tātou araira’a. Tē vai nei rā te tahi mau ’ohipa e nehenehe tātou e arai, mai tō tātou fa’a’ohipara’a i tō tātou taime i te mahana tāta’itahi […]

’Oia mau, e ti’a ia tātou ’ia ha’api’i mai nō ni’a i te tau nō mūta’a iho ra, ’e ’oia mau, e ti’a ia tātou ’ia fa’aineine nō te tau a muri a’e. ’Ia rave rā i te reira i teienei e ti’a ai. I teienei te taime e nehenehe ai tātou e ha’api’i mai. I teienei te taime e nehenehe ai tātou e tātarahapa. I teienei te taime e nehenehe ai tātou e ha’amaita’i ia vetahi ’ē ’e « e ’āfa’i i nā rima i fa’atautauhia i raro ra i ni’a » [Hebera 12:12] […]

Tē fa’ahiti fa’ahou nei au i tā’u fa’aitoitora’a i teie po’ipo’i ’ia rave i te mau mea e ha’amara’a i tō ’outou haerera’a maita’i i mua i te pae vārua, terā mara’ara’a tā Elder Dieter F. Uchtdorf i parau, ’o te tauturu ia ’outou ’ia haere i mua i roto i te mau tāmatara’a ’e te mau rāve’a e fā mai.

E mara’a te haerera’a maita’i i mua i te pae vārua ’ia ha’amori ana’e tātou i roto i te hiero, ’e e tupu rahi tō tātou māramarama nō te ’ā’ano ’e te hōhonu nehenehe o te mau ha’amaita’ira’a tā tātou e fāri’i i reira. Tē tāparu nei au ia ’outou ’ia pāto’i i te mau rāve’a a tō te ao nei ma te fa’atumu i ni’a iho i te mau ha’amaita’ira’a mure ’ore o te hiero […]

’Ua here au ia ’outou, e tō’u mau taea’e ’e mau tuahine here. Te mea faufa’a roa atu, tē here nei te Fatu ia ’outou. ’O ’oia tō ’outou Fa’aora ’e tō ’outou Tāra’ehara. Nāna e fa’atere nei ’e e arata’i nei i tāna ’Ēkālesia. E mata na tātou ’ia riro ’ei mau ta’ata ti’amā nō te Fatu, tei parau ē, « ’ei ta’ata ’outou nō’u ’e ’ei Atua vau nō ’outou » [Ieremia 30:22].