« ’Eiaha e mata’u, e fa’aro’o noa mai ! », Nō te Pūai o te Feiā ’Āpī, Mē 2022.
Tuha’a purera’a nō te avatea mahana mā’a
’Eiaha e mata’u, e fa’aro’o noa mai !
Fa’ahitira’a parau
’Ia hi’ohia rā tō tātou nei tau, ’ua ta’a iho ā ïa ia tātou nō te aha tē topatopa ri’i ra te ’imira’a i te maita’i nui i roto i te taure’are’a […]
Tā’u tāparura’a i teie mahana i te feiā ’āpī, ’e ia ’outou te mau metua ’e te feiā pa’ari e tauturu ia rātou, ’oia ho’i, e ha’amata i tā ’outou mā’imira’a i te ’oa’oa nā roto i te fāri’ira’a i te ’auhune tei fāri’i-a’ena-hia e tātou nō ’ō mai i te ta’ata hōro’a i te mau hōro’a maita’i ato’a. I te taime iho ā e rave rahi i roto i te ao nei e uiui ra i te mau uira’a hōhonu roa o te vairua, e pāhono atu tātou ma te « parau ’āpī » nō te ’evanelia a Iesu Mesia. Tē pūpū nei Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o tē ’āfa’i i ni’a roa nei i te misiōni ’e te poro’i a te Fa’aora o te ao nei, i te rāve’a rahi roa a’e i te tau mure ’ore ra nō te ’ite mai i te maita’i ’e nō te rave i te maita’i i teie taime i hina’aro-roa-hia […]
I tā tātou feiā ’āpī e tāfifi ra i reira, noa atu ā te mau māna’ona’ora’a ’e te mau fifi, e ’ere mau te pohe ’ōnohi te pāhonora’a. E’ita te reira e tāmarū i te māuiui i roto ia ’outou ’e ’o tā ’outou paha e fa’atupu a’ena ra. I roto i te hō’ē ao tei hina’aro roa ’ino i te māramarama ato’a e noa’a iāna, ’eiaha na e fa’aiti i te māramarama mure ’ore tā te Atua i tu’u i roto i tō ’outou vairua hou teie nei ao. ’A paraparau i te hō’ē ta’ata. ’A ani i te tauturu. ’Eiaha e vāvāhi i te hō’ē ora tā te Mesia i hōro’a i tōna ora nō te fa’aherehere. E nehenehe tā ’outou e fa’a’oroma’i i te mau fifi o teie nei orara’a tāhuti nō te mea e tauturu mātou ia ’outou ’ia amo i te reira. E rahi a’e tō ’outou pūai i tā ’outou e mana’o ra. Tē vai nei te tauturu, tā te ta’ata ’e tā te Atua iho ā rā. E ta’ata herehia ’outou ’e te hina’arohia, ’e ’ua rahi tō mātou fa’ahiahia ia ’outou. Tē hina’aro nei mātou ia ’outou ! « ’Eiaha e mata’u, e fa’aro’o noa mai » […]
’Ua rahi ho’i te mau mea e pōpou atu. Tē vai ra tātou te tahi ’e te tahi, ’e tē vai ra ’oia. ’Eiaha e fa’a’ere ia mātou i te fāna’ora’a ia ’outou.