« Tō tātou tā’amura’a i te Atua », Nō te Pūai o te Feiā ’Āpī, Mē 2022.
Tuha’a purera’a nō te po’ipo’i sābati
Tō tātou tā’amura’a i te Atua
Fa’ahitira’a parau
’Eiaha tātou e mana’o i te fa’anahora’a a te Atua mai te hō’ē mātini ho’oho’ora’a nō te ao teitei, ’e e (1) mā’iti tātou i te hō’ē ha’amaita’ira’a, (2) e pātia tātou i te tino ’ohipa tei tītauhia, ’e (3) i reira ra e topa mai ai te mea i poro’ihia […]
E mea faufa’a mau tā tātou tātarahapara’a ’e te ha’apa’ora’a i te parau, tā tātou tāvinira’a ’e te fa’atusiara’a. E ’imi tātou i te ti’a i rotopū i te feiā tā Etera i parau ē tei « tāmau noa i roto i te mau ’ohipa maitata’i » [Etera 12:4]. E ’ere rā ho’i nō te mea e nūmerara’a tei ha’apa’ohia i roto i te tahi mau buka i te ra’i ra. E mea faufa’a te reira nō te mea e fa’aō te reira ia tātou i roto i te ’ohipa a te Atua ’e e rāve’a ho’i nō tātou nō te rave ’āmui ’e ’ōna i tō tātou iho tauira’a mai te ta’ata tino nei ’ei ta’ata mo’a. Te mea tā tō tātou Metua i te ao ra e pūpū nei ia tātou ’o ’ōna iho ïa ’e tāna Tamaiti, e tā’amura’a piri mau ’e te tāmau ’e rāua nā roto i te maita’i rahi ’e te āraira’a a tāna Tamaiti Iesu Mesia, tō tātou Tāra’ehara […]
’Ua ineine tō tātou Metua nō te arata’i ia tātou tāta’itahi i ni’a i tōna ’ē’a nō te fafaura’a ma te ta’ahira’a tei hāmanihia i ni’a tō tātou mau hina’aro ta’ata hō’ē ’e tei nirahia i ni’a i tāna fa’anahora’a nō tō tātou ’oa’oa rahi hope i pīha’i iho iāna […]
Noa atu rā, e’ita te reira ’ē’a e ’ōhie noa mai nō tātou, noa atu ā ’o vai tātou. Tītau-rahi-hia ho’i te tāmāra’a ia tātou, e’ita ïa e ’ōhie noa […]
Nō reira, i roto i teie auahi tāmāra’a, ’eiaha na tātou e riri i te Atua, e ha’afātata ra i te Atua. E pi’i i te Metua nā roto i te i’oa o te Tamaiti. E ’āpe’e ia rāua nā roto i te Vārua, terā mahana ’e terā mahana. E vaiiho i te taime hau ia rāua nō te fa’a’ite mai i tō rāua ha’apa’o ia ’outou. E ha’amātau mau ia rāua ’e ha’amātau mau ia ’outou iho. E vaiiho i te Atua ’ia upo’oti’a.