« Fa’afāriura’a i te hina’aro o te Atua », Nō te pūai o te Feiā ’Āpī, Mē 2022.
Tuha’a purera’a nō te avatea mahana mā’a
Fa’afāriura’a i te hina’aro o te Atua
Fa’ahitira’a parau
I te roara’a o te hō’ē orara’a tāvinira’a ’e te mau ’ohipa pae vārua i tupu, ’ua tae mai te hāro’aro’ara’a iā’u ē, te fa’afāriura’a mau ’o te hope’ara’a ïa o te fāri’ira’a ma te ’ā’au tae i te hina’aro o te Atua, ’e e arata’ihia tātou e te Vārua Maita’i i roto i tā tātou mau ’ohipa […]
E aha te mau tītaura’a nō roto mai i te fa’afāriura’a ? […]
Tē ani manihini mai nei te Fa’aora ia tātou ’ia riro ’ei reo nōna ’e ’ei rima nōna. ’Ia riro te here o te Fa’aora ’ei mōrī arata’i nō tātou. ’Ua ha’api’i te Fa’aora i tāna mau pipi, « e haere ’outou e fa’ariro i te mau fenua ato’a ’ei pipi » [Mataio 28:19]. ’E ’ua parau ’oia ia Iosepha Semita, « ’a poro haere i tā’u ’evanelia nei i te mau ta’ata ato’a o tei ’ore i fāri’i i te reira » [Te Ha’api’ira’a Tumu ’e te mau Fafaura’a 112:28] […]
Nō te fa’ariro i te tītaura’a a te Fa’aora ’ia poro i tāna ’evanelia ’ei tuha’a ’o vai mau tātou, e ti’a ia tātou ’ia fa’afāriuhia i te hina’aro o te Atua ; e ti’a ia tātou ’ia here i tō tātou mau ta’ata tupu, ’ia fa’a’ite i te ’evanelia a Iesu Mesia i fa’aho’i-fa’ahou-hia mai, ’e ’ia ani i te mau ta’ata ato’a ’ia haere mai ’e e hi’o […]
I roto i tō tātou iho fa’afāriura’a tē vai ra te hōpoi’a nō te fa’a’ite i te ’evanelia a Iesu Mesia i tō te ao nei.
I roto i te mau ha’amaita’ira’a nō te fa’a’itera’a i te ’evanelia tē vai ra te fa’arahira’a i tō tātou fa’afāriura’a i te hina’aro o te Atua ’e te vaiihora’a i te Atua ’ia upo’oti’a i roto i tō tātou orara’a. E ha’amaita’i tātou ia vetahi ’ē ’ia fāri’i i te hō’ē « tauira’a rahi o te ’ā’au » [Alama 5:14]. Tē vai mau ra te ’oa’oa mure ’ore i roto i te tauturura’a ’ia arata’i mai i te mau vairua i roto i te Mesia. Te ha’ara’a nō te fa’afāriu mai i te hō’ē ta’ata ’e ’ia vetahi ’ē ’o te ’ohipa hanahana ïa.