« ’Āueue ’ore i roto i te vero », Nō te Pūai o te Feiā ’Āpī, Mē 2021.
Tuha’a purera’a nō te po’ipo’i mahana mā’a
’Āueue ’ore i roto i te vero
Fa’ahitira’a parau
Nō rātou i rotopū ia tātou nei e ha’ape’ape’a nei nō tātou iho ’e nō te feiā tā tātou e here nei, tē vai ra te ti’aturira’a i roto i te parau fafau tā te Atua i parau nō te hō’ē vāhi pāpū i roto i te mau vero i muri nei […]
E tano te mau parau tohu a te ari’i Bēniāmina nō tātou i teie mahana […]
’Ua ani ’oia i tōna mau ta’ata ’e ia tātou ’ia patu i ni’a i te papa pāpū hō’ē roa, ’oia ho’i, te Fa’aora. ’Ua ha’apāpū ’oia ē, e ti’amāra’a tō tātou ’ia mā’iti i te maita’i ’aore rā i te ’ino, ē, e’ita tā tātou e nehenehe e ’ape i te mau hope’ara’a o tā tātou mau mā’itira’a […]
E taui tō tātou huru ’ia riro mai mai te hō’ē tamari’i ri’i, te ha’apa’o i te parau a te Atua ’e te here rahi a’e. Nā taua tauira’a ra e tauturu ia tātou ’ia fāna’o i te mau hōro’a nō roto mai i te Vārua Maita’i. Nā te fāri’ira’a i te auhoara’a o te Vārua e tāmāhanahana, e arata’i, ’e e ha’apūai ia tātou […]
’Ia tae ana’e mai te vero o te orara’a, e nehenehe ’outou e vai pāpū noa nō te mea tē ti’a ra ’outou i ni’a i te papa o tō ’outou fa’aro’o ia Iesu Mesia. Nā te reira fa’aro’o e arata’i ia ’outou i te tātarahapara’a i te mau mahana ato’a, ’e i te ha’apa’ora’a tāmau i te mau fafaura’a. ’Ei reira ho’i ’outou e ha’amana’o ai iāna i te mau taime ato’a. ’E i roto i te mau vero o te riri ’e te ’ino, ’e ’ite ’outou i te vai-pāpū-ra’a ’e te ti’aturira’a […]
Mai te hō’ē tamari’i māmahu ’e te here, ’a fāri’i i tāna tauturu. ’A rave ’e ’a fa’atura i te mau fafaura’a tāna e pūpū nei i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei. E ha’apūai te reirq ia ’outou. ’Ua ’ite te Fa’aora i te mau vero ’e i te mau vāhi pāpū i ni’a i te ’ē’a e tae atu ai iāna ra ’e i tō tātou Metua i te ao ra. ’Ua ’ite ’oia i te ’ē’a. ʼO ʼoia te ’ēʼa.