« E fa’aora i te māuiui o te ao », Nō te Pūai o te Feiā ’Āpī, Mē 2022.
Tuha’a purera’a nō te po’ipo’i sābati
E fa’aora i te māuiui o te ao
Fa’ahitira’a parau
E aha te ti’amāra’a pae fa’aro’o ?
’O te ti’amāra’a nō te ha’amori i tōna mau huru ato’a : te ti’amāra’a ’ia putuputu, te ti’amāra’a ’ia parau, te ti’amāra’a ’ia rave nā ni’a i tōna iho mau ti’aturira’a ’e te ti’amāra’a nō vetahi ’ē ’ia nā reira. Maoti te ti’amāra’a pae fa’aro’o e ti’a ai ia tātou tāta’itahi ’ia fa’aoti nō tātou iho e aha tā tātou e ti’aturi nei, ’e nāhea i te ora ’e e aha tē rave ’ia au i tō tātou fa’aro’o, ’e e aha ho’i tā te Atua e tīa’i nei ia tātou […]
I roto i te ’ārepurepura’a nō te matahiti 1842, ’ua ha’aparare Iosepha [Semita] e 13 ti’aturira’a tumu o te ’Ēkālesia e tupu rahi ra, ’o teie ato’a ho’i : « Tē ti’aturi nei mātou ē, e ti’ara’a tō mātou ’ia ha’amori i te Atua Mana-Hope mai te au i tō mātou iho hina’aro, ’e e ti’ara’a ho’i tō te mau ta’ata ato’a ’ia ha’amori rātou noa atu te huru, te vāhi ’e te mea tā rātou i hina’aro » [Mau Hīro’a Fa’aro’o 1:11].
E fa’ahitira’a e fa’aō, e fa’ati’amā ’e e fa’atura i te ta’ata. ’O te iho teie nō te ti’amāra’a pae fa’aro’o […]
E hi’o na tātou e maha hi’ora’a te sōtaiete ’e te ta’ata hō’ē e fāna’o nei i te ti’amāra’a pae fa’aro’o.
’A tahi. Tē fa’atura nei te ti’amāra’a i te pae fa’aro’o i te fa’auera’a rahi mātāmua ’e te piti, ma te tu’u i te Atua i te pū o tō tātou nei orara’a […]
Te piti. E fa’aitoito te ti’amāra’a pae fa’aro’o i te fa’a’itera’a nō te ti’aturi, te tīa’ira’a ’e te hau […]
Te toru. E fa’auru te ha’apa’ora’a fa’aro’o ’ia tauturu ia vetahi ’ē […]
’E te maha. ’Ua riro te ti’amāra’a ’ia rave i te mau ’ohipa pae fa’aro’o, mai te hō’ē pūai fa’atāhō’ē ’e te ha’aputuputu, nō te ha’apa’ari i te mau tumu faufa’a ’e te mōrare […]
Tē ani nei au ia ’outou ’ia pāruru i te ti’amāra’a pae fa’aro’o. E fa’a’itera’a te reira nō te parau tumu nō te ti’amāra’a ’ia mā’iti, i hōro’ahia mai e te Atua.