« Te here hanahana i roto i te fa’anahora’a a te Metua », Nō te Pūai o te Feiā ’Āpī, Mē 2022.
Tuhaʼa pureraʼa nō te avatea sābati
Te here hanahana i roto i te fa’anahora’a a te Metua
Fa’ahitira’a parau
I roto i te ’Ēkālesia a Iesu Mesia i te Feiā Mo’a i te mau Mahana Hope’a nei tei fa’aho’i-fa’ahou-hia mai, hō’ē noa iho tō tātou hāro’aro’ara’a i te fa’anahora’a a te Metua i te ao ra. Nā teie e hōro’a mai ia tātou i te hō’ē huru ta’a ’ē ’ia hi’o i te fā o te orara’a tāhuti nei, te ha’avāra’a hanahana i muri mai i te reira, ’e te haere’a hope’a hanahana o te mau tamari’i ato’a a te Atua […]
Tē ha’api’i nei te ha’api’ira’a tumu i heheuhia mai a te ’Ēkālesia a Iesu Mesia ē, te mau tamari’i ato’a a te Atua—’eiaha rā te tahi pae iti roa, e’ita e ferurihia i’ō nei—e vai rātou i roto i te hō’ē bāsileia hanahana […]
Te mea teitei a’e ’o te fa’ateiteira’a ïa i roto i te bāsileia tīrētiēra, i reira ho’i tātou e riro ai mai tō tātou Metua ’e mai tāna tamaiti ’o Iesu Mesia […]
Te ’ohipa a te ’Ēkālesia tei fa’aho’i-fa’ahou-hia mai, ’o te tauturura’a ïa i te mau tamari’i ato’a a te Atua ’ia rātere i te vāhi tāpaera’a hope’a tā te Atua e hina’aro nō rātou […]
E mea faufa’a rahi nō tātou te heheura’a a te Atua ē, te rāve’a e tae’ahia ai te fa’ateiteira’a maori rā nā roto noa i te ha’apa’o-maita’i-ra’a i te mau fafaura’a o te hō’ē fa’aipoipora’a mure ’ore, i rotopū i te hō’ē tāne ’e te hō’ē vahine. Taua ha’api’ira’a tumu hanahana ra ’o te tumu ïa e ha’api’i ai tātou ē, « ’ua riro te ’āpenira’a ’ei tuha’a faufa’a rahi roa nō te ihota’ata hou te tāhuti nei, i te tāhuti nei, ’e te mure ’ore ’e te fā a te ta’ata tāta’itahi » [« Te utuāfare : E Poro’i i tō te Ao nei », ChurchofJesusChrist.org] […]
Tē ha’apāpū nei tātou ē, te poro’i nō ni’a i te ’utuāfare tei niuhia i ni’a i te ha’api’ira’a tumu, tē fa’ata’a nei i te huru aura’a ’utuāfare i reira e tupu ai te tuha’a faufa’a roa a’e o tō tātou hotura’a mure ’ore […]
E mea ti’a ia tātou ’ia ’imi i te rāve’a nō te fa’a’ite i teie mau parau mau mure ’ore ia vetahi ’ē. Nā roto rā i te here i tītauhia ia tātou nō tō tātou mau ta’ata tupu, e fāri’i noa tātou i tā rātou mau fa’aotira’a. Mai tā te hō’ē peropheta nō te Buka a Moromona i ha’api’i, ’ia haere māite tātou i mua, ma te « here i te Atua ’e te ta’ata ato’a » [2 Nephi 31:20].