“Lav we I Kam long Heven Insaed long Plan blong Papa,” Blong Ol Yut Oli Kam Strong, Mei 2022.
Sandei Aftenun Sesen
Lav we I Kam long Heven Insaed long Plan blong Papa
Samfala Pat
Insaed long Jos Ia blong Jisas Kraes blong Ol Lata-Dei Sent we i kambak, yumi gat wan andastaning abaot plan ia blong Papa long Heven, we i no gat narawan i gat. Hemia i givim yumi wan defren wei blong lukluk long stamba tingting blong laef ia long wol, jajmen blong heven we i kam wetem, mo las fiuja ples blong glori blong evri pikinini blong God. …
Doktrin we i kam tru long revelesen insaed long Jos Ia we i kambak blong Jisas Kraes, i stap tijim se evriwan long ol pikinini blong God—be sam nomo we bae yumi no tokbaot long ples ia—bae oli kasem wan kingdom blong glori. …
… Hemia we i hae evriwan, i blong kam wan god insaed long selestial kingdom, wan ples we bae yumi save kam olsem Papa blong yumi, mo olsem Pikinini blong Hem, Jisas Kraes. …
… Misin blong Jos ia we i kambak i blong helpem ol pikinini blong God blong kwalifae blong wanem God i wantem se bae i las ples we bae oli stap long hem. …
Wanem i impoten long yumi, i revelesen ia blong God se, fasin blong kam olsem wan god, bae oli save kasem nomo taem wan i fetful long ol kavenan blong wan mared we i no save finis, bitwin wan man mo wan woman. Tabu doktrin ia i risen from wanem yumi stap tijim se “blong stap olsem man o woman, hem i wan stamba samting we i save talem stret huia nao yumi olsem man mo woman, … hemia long laef bifo yumi kam long wol ia, long laef long wol ia, mo long laef we bae i kam afta mo from wanem hem i olsem” [“Famli: Wan Ofisol Toktok I Go long Wol,” Churchofjesuschrist.org/study?lang=bis]. …
… Be, long nara saed, ol Lata-dei Sent oli talem tru se famli ofisol toktok i stap long doktrin we oli no save sakemaot, mo i talem klia kaen famli rilesensip we bigfala pat blong divelopmen blong yumi we i no save finis, i save hapen long hem. …
… Yumi mas lukaotem mo serem ol trutok ia blong taem we i no save finis wetem ol narawan. Be wetem lav we yumi mas givim long evri neba blong yumi, yumi oltaem akseptem desisen blong olgeta. Olsem wan profet blong Buk blong Momon i tijim, yumi mas wokbaot fored wetem “wan lav long God mo long evri man” [2 Nifae 31:20].