“!No Fraet: Biliv Nomo!,” Blong Ol Yut Oli Kam Strong, Mei 2022.
Satedei Aftenun Sesen
!No Fraet: Biliv Nomo!
Samfala Pat
From taem blong yumi tedei, yumi andastanem se gud tingting abaot ol yangfala, i stap godaon smol. …
Plis blong mi tedei long ol yut blong yumi, mo long yufala tu ol papa mo mama, mo ol adalt we i stap givim advaes long olgeta, i blong stat blong lukaotem hapines taem yufala i akseptem ol plante samting we yumi bin kasem finis long Hem we i givim evri gudfala presen. Naoia i stap, plante long wol oli gat ol bigfala kwestin insaed long sol blong olgeta, we yumi sapos blong ansarem wetem “gud nius” ia blong gospel blong Jisas Kraes. Jos Ia blong Jisas Kraes blong Ol Lata-dei Sent, we i holem hae antap misin mo mesej blong Sevya blong wol, i givim ol bes wei we i no save finis blong faenem gud samting mo mekem gud samting long taem ia blong nid.
Long eni yut blong yumi we yu stap, we yu gat hadtaem wetem wan samting, nomata wanem wari blong yu, o samting we i had, ded tru long fasin blong tekemaot laef blong yuwan, i no ansa. Bae i no helpem harem nogud ia we yu stap filim o we yu ting se yu stap givim. Long wan wol we i nidim tumas evri laet we hem i save karem, plis, yu no daonem laet we i no save finis we God i bin putum insaed long sol blong yu bifo wol ia i stat. Toktok long wan. Askem help. Yu no aotem wan laef we Kraes i bin givim laef blong Hem blong holemtaet gud. Yu save tekem ol had samting blong laef long wol ia from se bae mifala i helpem yu blong tekem olgeta. Yu yu strong moa bitim we yu save. Help i stap, we i kam long ol narawan, mo speseli, we i kam long God. Oli lavem yu mo yu yu impoten, mo oli nidim yu. !Mifala i nidim yufala! “!No fraet: biliv nomo!” …
Yumi gat fulap samting blong stap glad from. Yumi gat wanwan long yumi, mo yumi gat Hem. Yu no karemaot janis blong mifala blong gat yu.