“Blong Hilim Wol Ia,” Blong Ol Yut Oli Kam Strong, Mei 2022.
Sandei Moning Sesen
Blong Hilim Wol Ia
Samfala Pat
?Wanem hem i fridom blong relijin?
Hem i fridom blong stap wosip, long evri wei blong wosip: fridom blong kam tugeta, fridom blong toktok, fridom blong tekem aksen folem bilif blong yu, mo fridom blong ol narawan blong oli mekem semmak. Fridom blong relijin i letem wanwan long yumi blong i disaed, blong yumiwan, wanem yumi stap biliv long hem, mo hao yumi laef folem mo tekem aksen folem bilif blong yumi, mo wanem God i wantem luk yumi mekem. …
Long medel blong ol trabol long 1842, Josef Smit i bin pablisim 13 stamba pos blong Jos ia we i stap gro, mo wan i go olsem: “Mifala i talemaot we mifala i gat raet blong wosipim Hae God long wei we tingting blong mifala i wantem, mo mifala i letem evri man blong gat sem raet ia; letem olgeta blong wosip long fasin we oli wantem, long weaples we oli wantem, o wanem we oli wantem” [Ol Toktok blong Bilif 1:11].
Toktok blong Hem i tekem yu insaed, i mekem yu fri, mo i gat respek. Hemia stamba blong fridom blong relijin. …
Wetem mi, lukluk long fofala wei we sosaeti mo wanwan man mo woman i tekem samting aot long fridom blong relijin.
Faswan. Fridom blong relijin i givim ona long fas mo seken hae komanmen we i putum God long medel blong laef blong yumi. …
Seken. Fridom blong relijin i pusum man blong i talemaot ol bilif, hop mo pis. …
Nambatri. Relijin i givim insperesen long ol pipol blong helpem ol narafala man. …
Mo nambafo. Fridom blong relijin i stap wok olsem wan paoa we i joenem man mo i wok strong blong stretem ol valiu mo klin gud fasin. …
Mi stap invaetem yu blong sapotem wok blong fridom blong relijin. Hem i wei blong soemaot prinsipol blong fridom blong mekem joes, we God i bin givim.