“Hat blong Mifala I Filim Evri Samting,” Blong Ol Yut Oli Kam Strong, Mei 2022.
Sandei Aftenun Sesen
Hat blong Mifala I Filim Evri Samting
Samfala Pat
Blong stap olsem wan disaepol blong Jisas Kraes i no jes wan long ol plante samting we yumi mekem. Sevya i gat bigfala paoa biaen blong givim insperesen long evri samting we yumi mekem. …
?Mo olsem wanem long ol plante wok mo responsabiliti we i mekem laef blong yumi i bisi tumas? …
“Papa blong yufala long heven i save se yufala i gat nid long ol samting ia.
“Be lukaotem fastaem kingdom blong God mo stret mo gud fasin blong hem, mo evri samting ia bae hem i ademap long yufala” [3 Nifae 13:32–33; luk tu long Matiu 6:32–33].
Be hemia i no minim se hem i isi. Hem i nidim tugeta sakrifaes mo konsekresen.
Hem i nidim blong letem sam samting i go mo letem ol narafala samting i gro.
… Blong sakrifaes i minim blong yu givim aot wan samting we yu laekem tumas. …
Konsekresen i defren long sakrifaes long wan wei we i impoten. Taem we yumi konsekretem wan samting, yumi no lego i stap nomo long olta. Be, yumi putum taem blong yumi long seves blong Lod. Yumi dediketem ol samting i go long Hem, mo long ol tabu stamba tingting blong Hem. …
Taem yumi lukluk long laef blong yumi mo luk handred samting blong mekem, yumi harem se i tumas. Taem yumi luk wan samting nomo—blong lavem mo givim seves long God mo ol pikinini blong Hem, long handred defren wei—nao yumi save lukluk ol samting ia wetem glad.
Hemia i olsem wanem yumi givim ful sol blong yumi—taem yumi sakrifaesem eni samting we i stap holemtaet yumi mo stap konsekretem evri narafala samting i go long Lod mo ol stamba tingting blong Hem.