“Balaanong Gugma diha sa Plano sa Amahan,” Alang sa Kalig-on sa mga Kabatan-onan, Mayo 2022.
Dominggo sa Hapon nga Sesyon
Balaanong Gugma diha sa Plano sa Amahan
Mga Kinutlo
Sa gipahiuli nga Simbahan ni Jesukristo sa mga Santos sa Ulahing mga Adlaw, kita adunay talagsaong panabot bahin sa plano sa atong Langitnong Amahan. Kini naghatag nato og lahi nga panglantaw sa katuyoan sa mortal nga kinabuhi, sa balaanong paghukom nga mosunod niini, ug sa kataposan nga mahimayaong padulngan sa tanang anak sa Dios. …
… Ang gipadayag nga doktrina sa gipahiuli nga Simbahan ni Jesukristo nagtudlo nga ang tanang anak sa Dios—nga adunay limitado lang kaayo nga mga eksepsiyon nga ikonsiderar dinhi—sa kataposan mahidangat ngadto sa usa ka gingharian sa himaya. …
… Ang kinatas-an niini mao ang kahimayaan diha sa celestial nga gingharian, diin kita mahimong sama sa atong Amahan ug Iyang Anak, si Jesukristo. …
… Ang misyon sa gipahiuli nga Simbahan mao ang pagtabang sa tanang anak sa Dios nga mahimong angayan sa unsay gitinguha sa Dios isip ilang kataposang padulngan. …
Mahinungdanon nato ang pagpadayag sa Dios nga ang kahimayaan maangkon lamang pinaagi sa pagkamatinud-anon sa mga pakigsaad sa mahangtoron nga kaminyoon tali sa usa ka lalaki ug usa ka babaye. Kanang balaanong doktrina ang hinungdan nga kita nagtudlo nga “ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay kataposan nga pag-ila ug katuyoan” [“Ang Pamilya: Usa ka Pamahayag sa Kalibotan,” ChurchofJesusChrist.org]. …
… Sa sukwahi, kita nagmatuod nga ang pamahayag bahin sa pamilya, nga gibase sa dili mausab nga doktrina, naghulagway sa matang sa mga relasyon sa pamilya diin ang labing importante nga bahin sa atong mahangtorong kalamboan mahitabo. …
… Kita magtinguha sa pagpaambit niini nga mga kamatuoran bahin sa kahangtoran ngadto sa uban. Apan uban sa gugma ngadto sa tanan natong mga silingan, atong dawaton kanunay kon unsay ilang mga desisyon. Sama sa gitudlo sa propeta sa Basahon ni Mormon, magpadayon kita sa unahan, uban sa “gugma sa Dios ug sa tanan nga mga tawo” [2 Nephi 31:20].