“Kita Mao Ang Simbahan ni Jesukristo sa mga Santos sa Ulahing mga Adlaw,” Alang sa Kalig-on sa mga Kabatan-onan, Mayo 2022.
Sabado sa Buntag nga Sesyon
Kita Mao Ang Simbahan ni Jesukristo sa mga Santos sa Ulahing mga Adlaw
Mga Kinutlo
Human makadawat og pagdapit sa “pagduol ug pagtan-aw” [Juan 1:46], ako mitambong sa Ang Simbahan ni Jesukristo sa mga Santos sa Ulahing mga Adlaw sa unang higayon sa edad nga 26. Ako bag-ohay lang nga nagbulag sa akong unang bana. Ako adunay tres anyos nga anak nga lalaki. Ug gibati nako ang kawalay gahom tungod sa kahadlok. Sa dihang misulod na ako sa gambalay, napuno ako sa init nga pagbati samtang akong nasabtan ang hugot nga pagtuo ug hingpit nga kalipay sa mga tawo nga nagpalibot kanako. …
Akong kauban nga mga disipulo ni Kristo, kinahanglan dili nato ipakaubos ang kahibulongan nga buhat nga gihimo sa Ginoo pinaagi kanato, ang Iyang Simbahan, bisan pa sa atong mga kakulangan. Usahay kita mga tighatag ug usahay kita mga tigdawat, apan kita tanan usa ka pamilya diha ni Kristo. …
… Ang Simbahan labaw pa kay sa mga gambalay ug sa eklesiyastikanhong estraktura; ang Simbahan kay kita, ang mga miyembro. Kita mao Ang Simbahan ni Jesukristo sa mga Santos sa Ulahing mga Adlaw, nga si Kristo ang anaa sa ulohan ug ang propeta isip Iyang tigpamaba. …
Ang atong katuyoan sa Iyang gingharian kinahanglan mao ang pagdala sa matag usa ngadto ni Kristo. …
Gikan sa usa ka batang lalaki nga nagbayad og ikapulo uban sa hugot nga pagtuo, ngadto sa usa ka inahan nga walay bana nga nagkinahanglan sa makagagahom nga grasya sa Ginoo, ngadto sa usa ka amahan nga nanlimbasog sa pagsangkap sa iyang pamilya, ngadto sa atong mga katigulangan nga nanginahanglan sa mga ordinansa sa kaluwasan ug kahimayaan, ngadto sa matag usa kanato nga nagbag-o sa mga pakigsaad uban sa Dios matag semana, nagkinahanglan kita sa matag usa, ug kita makadala sa matag usa ngadto sa makatubos nga pagkaayo sa Manluluwas.