“Kinasingkasing ang Tanan,” Alang sa Kalig-on sa mga Kabatan-onan, Mayo 2022.
Dominggo sa Hapon nga Sesyon
Kinasingkasing ang Tanan
Mga Kinutlo
Ang pagkadisipulo ni Jesukristo dili lang usa sa daghang butang nga atong buhaton. Ang Manluluwas mao ang makapadasig nga gahom luyo sa tanan nga atong buhaton. …
Ug unsa kaha ang daghang buluhaton ug mga responsibilidad nga nakapabisi pag-ayo sa atong kinabuhi? …
“Ang inyong langitnong Amahan nasayod nga kamo nanginahanglan sa tanan niini nga mga butang.
“Apan pangita una kamo sa gingharian sa Dios ug sa iyang pagkamatarong, ug kining tanan nga mga butang idugang nganha kaninyo” [3 Nephi 13:32–33; tan-awa usab sa Mateo 6:32–33].
Apan kana wala magpasabot nga kini sayon. Nagkinahanglan kini og pagsakripisyo ug pagpahinungod.
Nagkinahanglan kini nga ang pipila ka butang biyaan ug tugotan ang ubang butang nga motubo.
… Ang pagsakripisyo nagpasabot sa paghunong sa usa ka butang alang sa butang nga mas bililhon. …
Ang pagpahinungod lahi gikan sa sakripisyo sa dili moubos sa usa ka importante nga paagi. Kon kita mopahinungod og usa ka butang, dili nato kini biyaan ug kalimtan. Kondili, gamiton nato kini diha sa pagserbisyo sa Ginoo. Gipahinungod nato kini ngadto Kaniya ug sa Iyang balaan nga mga katuyoan. …
Kon motan-aw kita sa atong kinabuhi ug makakita sa gatosan ka buhatonon nga butang, mobati kita nga nabug-atan. Kon kita makakita og usa ka butang—paghigugma ug pagserbisyo sa Dios ug sa Iyang mga anak, sa gatosan ka lain-laing paagi—nan kita makahimo niadtong mga butang uban sa kalipay.
Mao kini ang paagi nga kita makahalad sa atong tibuok kalag—pinaagi sa pagsakripisyo og bisan unsa nga nakapugong nato ug sa pagpahinungod sa uban ngadto sa Ginoo ug sa Iyang mga katuyoan.