“Si Kristo Moayo Nianang Naguba,” Alang sa Kalig-on sa mga Kabatan-onan, Mayo 2022.
Dominggo sa Buntag nga Sesyon
Si Kristo Moayo Nianang Naguba
Mga Kinutlo
Gilitratohan ni Mark Mabry
Kita daghan og makat-onan gikan sa mga kasulatan mahitungod kon sa unsang paagi ang atong Manluluwas, si Jesukristo, motabang kanato sa malamposon nga paagi sa pag-atubang sa mga butang sa atong kinabuhi nga nangaguba, bisan unsa pay edad nato. …
Samtang ang Manluluwas nagtudlo didto sa templo, usa ka babaye ang gidala ngadto Kaniya sa mga escriba ug mga Pariseo. Kita wala nahibalo sa iyang tibuok istorya, mao lang kadto nga siya “nasakpan nga nanapaw” [Juan 8:4]. …
Ang tubag ni Kristo niining bililhon nga babaye nga anak sa Dios “Kon mao kana, bisan ako dili usab mosilot kanimo: lakaw, ug ayaw na pagpakasala” [Juan 8:11]. Laing paagi sa pagsulti og “lakaw, ug ayaw na pagpakasala” mahimong “lakaw ug pagbag-o na.” Ang Manluluwas nagdapit kaniya sa paghinulsol. …
Ang Ginoo nagtudlo kanato nga ang pagpasaylo sa uban usa ka tibuok kalibotan nga sugo: “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” [Doktrina ug mga Pakigsaad 64:10]. …
Kasagaran atong makit-an ang atong mga kaugalingon, sama sa bakol nga makililimos sa ganghaan sa templo, mapailubon—o usahay walay pailob—“[nga] mosalig sa Ginoo” [Isaias 40:31]. …
Ang paghupot og hugot nga pagtuo diha ni Kristo nagpasabot og pagsalig dili lamang sa kabubut-on sa Dios apan usab sa Iyang tiyempo. Tungod kay Siya nasayod gayod unsa ang atong gikinahanglan ug kanus-a nato kini gikinahanglan. …
… Walay butang sa inyong kinabuhi nga naguba nga dili maayo, matubos, ug mahimo sa gahom ni Jesukristo.