“Aron sa Pag-alim sa Kalibotan,” Alang sa Kalig-on sa mga Kabatan-onan, Mayo 2022.
Dominggo sa Buntag nga Sesyon
Aron sa Pag-alim sa Kalibotan
Mga Kinutlo
Unsa ang relihiyoso nga kagawasan?
Kini mao ang kagawasan sa pagsimba sa tanang matang niini: kagawasan sa pagpundok, kagawasan sa pagpahayag, kagawasan sa paglihok sa personal nga mga tinuohan, ug kagawasan sa uban sa pagbuhat sa ingon. Ang relihiyoso nga kagawasan nagtugot sa matag usa kanato nga mohukom sa atong kaugalingon unsa ang atong tuohan, sa unsang paagi kita magpakabuhi ug molihok sumala sa atong hugot nga pagtuo, ug sa unsay gilaoman sa Dios kanato. …
Taliwala sa kasamok niadtong 1842, si Joseph [Smith] mimantala og 13 ka sukaranan nga mga baroganan sa naglambo nga Simbahan, lakip niining usa: “Kami nag-angkon sa kahigayonan sa pagsimba sa Dios nga Makagagahom sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayonan, sa pagpasimba kanila sa bisan unsa nga paagi, asa, o unsa ang ilang buot simbahon” [Mga Artikulo sa Hugot nga Pagtuo 1:11].
Ang iyang pamahayag naglakip sa tanan, makapagawasnon, ug matinahoron. Mao kana ang diwa sa relihiyoso nga kagawasan. …
Ikonsiderar uban kanako ang upat ka paagi nga ang katilingban ug ang mga indibidwal makabenepisyo sa relihiyoso nga kagawasan.
Una. Ang relihiyoso nga kagawasan nagtahod sa una ug ikaduhang dagko nga mga sugo, nga nagbutang sa Dios sa sentro sa atong mga kinabuhi. …
Ikaduha. Ang relihiyoso nga kagawasan nag-awhag og mga pagpahayag sa pagtuo, paglaom, ug kalinaw. …
Ikatulo. Ang relihiyon modasig sa mga tawo sa pagtabang sa uban. …
Ug ikaupat. Ang kagawasan sa relihiyon naglihok isip usa ka makapahiusa ug makapaaghat nga pwersa sa pag-umol sa mga mithi ug moralidad. …
Ako kamong dapiton sa pagpasiugda sa kawsa sa relihiyoso nga kagawasan. Kini usa ka pagpahayag sa gihatag sa Dios nga baroganan sa kabubut-on.