ត្រូវការអ្នកដែលផ្សះផ្សាគេ
សេចក្តីដកស្រង់
ក្នុងនាមជាសិស្សរបស់ព្រះយេស៊ូវគ្រីស្ទ យើងត្រូវធ្វើជាគំរូពីរបៀបប្រាស្រ័យទាក់ទងជាមួយអ្នកដទៃ—ជាពិសេស នៅពេលយើងមានទស្សនៈខុសគ្នា ។ វិធីដ៏ងាយបំផុតមួយដើម្បីស្គាល់ អ្នកដើរតាមដ៏ពិត របស់ព្រះយេស៊ូវគ្រីស្ទគឺ មើលថាតើបុគ្គលនោះប្រព្រឹត្តចំពោះមនុស្សដទៃដោយចិត្តអាណិតអាសូរប៉ុនណា ។ …
… សិស្ស ដ៏ពិត របស់ទ្រង់ស្ថាបនា លើកស្ទួយ លើកទឹកចិត្ត បញ្ចុះបញ្ចូល និងបំផុសគំនិត—មិនថាស្ថានភាពលំបាកប៉ុនណាទេ ។ សិស្សដ៏ពិតរបស់ព្រះយេស៊ូវគ្រីស្ទគឺជាអ្នកដែលផ្សះផ្សាគេ ។ …
ដង្វាយធួនរបស់ព្រះអង្គសង្រ្គោះបានធ្វើឲ្យយើងអាចយកឈ្នះលើអំពើអាក្រក់ ទាំងអស់ បាន—រួមទាំងការទាស់ទែងគ្នាផងដែរ ។ …
បងប្អូនប្រុសស្រីជាទីស្រឡាញ់របស់ខ្ញុំ របៀបដែលយើងប្រព្រឹត្តចំពោះគ្នាពិតជាសំខាន់ខ្លាំងណាស់ ! របៀបដែលយើងនិយាយចំពោះ និងអំពីអ្នកដទៃនៅផ្ទះ នៅព្រះវិហារ នៅកន្លែងធ្វើការ និងនៅតាមអនឡាញ គឺសំខាន់ខ្លាំងណាស់ ។ ថ្ងៃនេះ ខ្ញុំសុំឲ្យពួកយើងប្រាស្រ័យទាក់ទងនឹងអ្នកដទៃតាមរបៀបមួយដែលខ្ពស់ជាង និងបរិសុទ្ធជាងនេះ ។ …
សេចក្ដីសប្បុរសគឺជាថ្នាំបន្សាបដល់ការទាស់ទែងគ្នា ។ សេចក្ដីសប្បុរសគឺជាអំណោយទានខាងវិញ្ញាណ ដែលជួយយើងឲ្យសម្រាតភាពជាមនុស្សខាងសាច់ឈាម ដែលអាត្មានិយម ការពារខ្លួនឯង ឆ្មើងឆ្មៃ និងច្រណែនឈ្នានីសចោលចេញ ។ សេចក្ដីសប្បុរសគឺជាចរិតលក្ខណៈដ៏សំខាន់របស់អ្នកដើរតាមដ៏ពិតរបស់ព្រះយេស៊ូវគ្រីស្ទ ។ សេចក្ដីសប្បុរសកំណត់ពីអ្នកដែលផ្សះផ្សាគេ ។
… ខ្ញុំសូមអញ្ជើញបងប្អូនឲ្យចងចាំព្រះយេស៊ូវគ្រីស្ទ ។ សូមអធិស្ឋានឲ្យមានភាពក្លាហាន និងប្រាជ្ញាដើម្បីនិយាយ ឬធ្វើអ្វីដែលទ្រង់នឹងធ្វើ ។ នៅពេលយើងធ្វើតាមម្ចាស់នៃមេត្រីភាព នោះយើងនឹងក្លាយជាអ្នកដែលផ្សះផ្សាគេរបស់ទ្រង់ ។ …
… ថ្ងៃនេះ ខ្ញុំសូមអញ្ជើញបងប្អូនឲ្យពិនិត្យមើលភាពជាសិស្សរបស់បងប្អូន ក្នុងបរិបទនៃរបៀបដែលបងប្អូនប្រព្រឹត្តចំពោះអ្នកដទៃ ។ ខ្ញុំសូមផ្ដល់ពរជ័យឲ្យបងប្អូនកែតម្រូវ ដើម្បីឲ្យឥរិយាបថរបស់បងប្អូនបានខ្ពង់ខ្ពស់ ពេញដោយការគោរព និងជាតំណាងឲ្យអ្នកដើរតាមដ៏ពិតរបស់ព្រះយេស៊ូវគ្រីស្ទ ។