ពររបស់លោកអយ្យកោ
ពរជ័យអយ្យកោរបស់បងប្អូន—ជាការដឹកនាំដ៏បំផុសគំនិតមកពីព្រះវរបិតាសួគ៌
ពរជ័យអយ្យកោខ្ញុំសំខាន់ណាស់ចំពោះខ្ញុំពេលខ្ញុំនៅក្មេង ព្រោះតែហេតុផលជាច្រើន ។ ទីមួយ តាមរយៈអំណាចនៃព្រះវិញ្ញាណបរិសុទ្ធ ពរជ័យអយ្យកោរបស់ខ្ញុំ បានជួយខ្ញុំឲ្យយល់ពីអត្តសញ្ញាណពិតដ៏អស់កល្បជានិច្ច—ថាខ្ញុំជានរណា ហើយខ្ញុំអាចក្លាយជានរណា ។ … ខ្ញុំបានដឹងថា ព្រះវរបិតាសួគ៌ និងព្រះអង្គសង្រ្គោះស្គាល់ និងស្រឡាញ់ខ្ញុំ ហើយទ្រង់ទាំងទ្វេទាក់ទងនឹងជីវិតរបស់ខ្ញុំផ្ទាល់ ។ រឿងនេះ បានជួយខ្ញុំឲ្យមានបំណងចង់ខិតទៅជិតទ្រង់ ហើយបង្កើនសេចក្ដីជំនឿ និងការទុកចិត្តខ្ញុំលើទ្រង់ទាំងទ្វេ ។ …
ការដឹងថាខ្ញុំជានរណាពិតប្រាកដ បានជួយខ្ញុំឲ្យយល់ និងមានបំណងប្រាថ្នាចង់ធ្វើអ្វីដែលព្រះបានរំពឹងទុកពីខ្ញុំ ។
រឿងនេះបាននាំខ្ញុំឲ្យសិក្សាអំពីសេចក្ដីសញ្ញា ដែលខ្ញុំបានធ្វើ និងពរជ័យដែលបានសន្យានៅក្នុងសេចក្ដីសញ្ញារបស់ព្រះជាមួយអ័ប្រាហាំ ។ វាបានផ្ដល់ឲ្យខ្ញុំនូវទស្សនៈវិស្ស័យដ៏អស់កល្បជានិច្ច ដែលបានបំផុសគំនិតខ្ញុំឲ្យរក្សាសេចក្ដីសញ្ញារបស់ខ្ញុំឲ្យបានកាន់តែពេញលេញ ។ …
វាសំខាន់ណាស់សម្រាប់ខ្ញុំដើម្បីទទួលបានពរជ័យអយ្យកោតាំងពីក្មេងខណៈដែលទីបន្ទាល់របស់ខ្ញុំកំពុងតែលូតលាស់ ។ …
ការស្រឡាញ់ពរជ័យអយ្យកោរបស់ខ្ញុំតាំងពីក្មេងបានផ្ដល់ពរជ័យដល់ខ្ញុំជាមួយនឹងសេចក្តីក្លាហានពេលខ្ញុំបាក់ទឹកចិត្ត វាបានលួងលោមខ្ញុំពេលខ្ញុំភ័យខ្លាច វានាំសេចក្ដីសុខសាន្តដល់ខ្ញុំពេលខ្ញុំថប់បារម្ភ វានាំក្តីសង្ឃឹមពេលខ្ញុំអស់សង្ឃឹម និងមានអំណរពេលព្រលឹងខ្ញុំត្រូវការវាបំផុត ។ ពរជ័យអយ្យកោខ្ញុំបានជួយបង្កើនសេចក្ដីជំនឿ និងទំនុកចិត្តរបស់ខ្ញុំទៅលើព្រះវរបិតាសួគ៌ និងព្រះអង្គសង្រ្គោះរបស់ខ្ញុំ ។ វាក៏បង្កើនសេចក្តីស្រឡាញ់របស់ខ្ញុំសម្រាប់ទ្រង់ទាំងទ្វេ—ហើយនៅតែបន្តជួយដល់ខ្ញុំ ។
ពេលដែលត្រូវទទួលពរជ័យអយ្យកោរបស់បងប្អូន
យុវជន យុវនារី ឪពុកម្ដាយ និងប៊ីស្សពជាទីស្រឡាញ់ ពរជ័យអយ្យកោគឺពុំមែនសម្រាប់តែការរៀបចំខ្លួនបម្រើបេសកកម្មប៉ុណ្ណោះនោះទេ ។ សមាជិកដែលបានជ្រមុជទឹក មានភាពស័ក្ដិសមអាចទទួលពរជ័យអយ្យកោបាន នៅពេលវេលាស័ក្ដិសមសម្រាប់ពួកគាត់ ។ …
បងប្អូនប្រុសស្រី ខ្ញុំសូមថ្លែងទីបន្ទាល់ថា ព្រះវរបិតាសួគ៌ និងបុត្រាដ៏ស្ងួនភ្ងា ដែលជាព្រះរាជបុត្រាបង្កើតតែមួយរបស់ទ្រង់ គឺព្រះយេស៊ូវគ្រីស្ទមានព្រះជន្មរស់ ។ ទ្រង់ទាំងទ្វេស្រឡាញ់យើង ។ ពរជ័យអយ្យកោគឺជាអំណោយដ៏ពិសិដ្ឋមកពីទ្រង់ទាំងទ្វេ ។ នៅពេលបងប្អូនទទួលពរជ័យ នោះបងប្អូននឹងដឹង ព្រមទាំងទទួលអារម្មណ៍ថា ទ្រង់ទាំងទ្វេស្រឡាញ់បងប្អូន និងយកចិត្តទុកដាក់លើបងប្អូនម្នាក់ៗរៀងៗខ្លួនប៉ុនណា ។