ការទទួលបានព្រះចេស្តារបស់ព្រះតាមរយៈសេចក្ដីសញ្ញា
សេចក្តីដកស្រង់
មុនពេលផែនដីត្រូវបានបង្កើតឡើង ព្រះបានបង្កើតសេចក្ដីសញ្ញានានាជាយន្តការដែលយើងជាបុត្រាបុត្រីរបស់ទ្រង់អាចរួបរួមខ្លួនយើងទៅនឹងទ្រង់បាន ។ …
… យើងចុះសេចក្តីសញ្ញាតែនៅពេលយើងមានបំណងតាំងចិត្តខ្លួនឯងជាពិសេស ដើម្បីបំពេញតាមសេចក្តីសញ្ញានោះប៉ុណ្ណោះ ។ យើងបានក្លាយជាបុត្រាបុត្រីនៃសេចក្តីសញ្ញារបស់ព្រះ និងជាអ្នកស្នងមរតកនៃនគររបស់ទ្រង់ ជាពិសេសនៅពេលយើងស្គាល់អត្តសញ្ញាណខ្លួនយើងទាំងស្រុងជាមួយនឹងសេចក្ដីសញ្ញានោះ ។
ពាក្យថា ផ្លូវនៃសេចក្ដីសញ្ញា សំដៅទៅលើសេចក្ដីសញ្ញាជាបន្តបន្ទាប់ ពេលយើងមកចំពោះព្រះគ្រីស្ទ ហើយភ្ជាប់ទៅនឹងទ្រង់ ។ តាមរយៈចំណងនៃសេចក្ដីសញ្ញានេះ យើងអាចទទួលបានព្រះចេស្តាដ៏អស់កល្បជានិច្ចរបស់ទ្រង់ ។ ផ្លូវនេះចាប់ផ្ដើមដោយសេចក្ដីជំនឿលើព្រះយេស៊ូវគ្រីស្ទ និងការប្រែចិត្ត បន្ទាប់មកដោយការធ្វើបុណ្យជ្រមុជទឹក និងការទទួលព្រះវិញ្ញាណបរិសុទ្ធ ។ …
ផ្លូវនៃសេចក្តីសញ្ញានាំឆ្ពោះទៅកាន់ពិធីបរិសុទ្ធនៃព្រះវិហារបរិសុទ្ធ ដូចជាអំណោយទានពិសិដ្ឋនៃព្រះវិហារបរិសុទ្ធជាដើម ។ អំណោយទានពិសិដ្ឋគឺជាអំណោយនៃសេចក្ដីសញ្ញាដ៏ពិសិដ្ឋរបស់ព្រះ ដែលភ្ជាប់យើងឲ្យបានកាន់តែពេញលេញទៅនឹងទ្រង់ ។ …
ការរក្សាសេចក្តីសញ្ញាដែលបានចុះនៅឯអាងនៃពិធីបុណ្យជ្រមុជទឹក និងនៅក្នុងព្រះវិហារបរិសុទ្ធ ក៏ផ្ដល់កម្លាំងដល់យើង ដើម្បីទប់ទល់នឹងការសាកល្បង និងការឈឺចាប់ក្នុងជីវិតរមែងស្លាប់នេះផងដែរ ។ …
ពេលបងប្អូនដើរតាមផ្លូវនៃសេចក្ដីសញ្ញា ចាប់តាំងពីពិធីបុណ្យជ្រមុជទឹកទៅកាន់ព្រះវិហារបរិសុទ្ធ និងពេញមួយជីវិត ខ្ញុំសុំសន្យាថា បងប្អូនមានអំណាចដើម្បីហូរបញ្ច្រាស់នឹងលំហូរធម្មជាតិនៃលោកិយនេះ—ពោលគឺអំណាចដើម្បីរៀន អំណាចដើម្បីប្រែចិត្ត និងអំណាចដើម្បីញែកចេញជាបរិសុទ្ធ និងអំណាចដើម្បីរកឃើញសេចក្តីសង្ឃឹម ការលួងលោម និងសូម្បីតែអំណរ ពេលបងប្អូនប្រឈមនឹងឧបសគ្គក្នុងជីវិតនេះ ។ ខ្ញុំសុំសន្យាដល់បងប្អូន និងគ្រួសាររបស់បងប្អូននូវការការពារប្រឆាំងនឹងឥទ្ធិពលនៃមារសត្រូវ ជាពិសេសនៅពេលបងប្អូនផ្តោតចិត្តទុកដាក់ជាខ្លាំងលើព្រះវិហារបរិសុទ្ធនៅក្នុងជីវិតរបស់បងប្អូន ។