Fivoriana sabotsy maraina
Itafio Jesoa Kristy Tompo
Sombin-dahatsoratra
Te hanana fifandraisana lalina kokoa amin’ireo zanany lahy sy ny zanany vavy rehetra ny Raintsika, saingy antsika ny safidy. Rehefa misafidy ny hanakaiky Azy amin’ny alalan’ny fifandraisana ara-panekempihavanana isika dia mamela Azy hanakaiky antsika sy hanome antsika fitahiana miavosa kokoa izany.
… I Jesoa Kristy no ivon’ireo fanekempihavanana rehetra ataontsika; ary ireo fitahiana entin’ny fanekempihavanana dia misy noho ny sorona fanavotana nataony.
Ny batisa asitrika no tandindon’ny vavahady idirantsika amin’ny fifandraisana ara-panekempihavanana amin’ Andriamanitra. Ny fisitrihana ao anaty rano sy ny fitsanganana avy tao indray no tandindon’ny fahafatesan’ny Mpamonjy sy ny Fitsanganana tamin’ny maty mba hanana fiainam-baovao. … Vakintsika ao amin’ny Testamenta Vaovao ny hoe: “Fa na iza na iza hianareo no natao batisa ho an’i Kristy dia nitafy an’i Kristy.” [Galatiana 3:27]. …
Mampitodika any amin’ny Mpamonjy koa ny ôrdônansin’ny fanasan’ny Tompo. Tandindon’ny vatan’i Kristy sy ny rà nalatsaka ho antsika ny mofo sy rano. … Rehefa mihinana sy misotro ireo mariky ny nofony sy ny rany isika dia ara-tandindona no mahatafiditra an’i Kristy ao amintsika. [jereo ny Jaona 6:56]. …
Rehefa manao fanekempihavanana amin’ Andriamanitra ao amin’ny tranon’ny Tompo isika dia mampiorim-paka kokoa ny fifandraisantsika Aminy. Ny zava-drehetra ataontsika ao amin’ny tempoly dia manondro ny drafitry ny Raintsika ho antsika, izay ny Mpamonjy sy ny Sorompanavotany no ivony. …
… Mampahatsiahy antsika ny garmentan’ny tempoly anaovantsika fa ny Mpamonjy sy ireo fitahiana avy amin’ny Sorompanavotany dia manafy antsika mandritra ny androm-piainantsika. Rehefa anaovantsika isan’andro ny garmentan’ny fisoronana masina dia lasa sombiny amin’ny tenantsika izany tandindona kanto izany. …
… Mijoro ho vavolombelona aho fa mahaleo ny sarany tokoa ny vidiny raha jerena ireo fitahiana lehibe avy amin’ny fifandraisana ara-panekempihavanana.