Sesioni i Paradites të së Dielës

Pikësynimi i Perëndisë Është t’ju Çojë në Shtëpi

Pjesë të shkëputura

Nga Plaku Patrik Kirën,

i Kuorumit të Dymbëdhjetë Apostujve

Gjithçka rreth planit të Atit për fëmijët e Tij të dashur, është hartuar që ta çojë gjithkënd në shtëpi. …

A do të thotë kjo që gjithçka lejohet për sa i përket mënyrës si e jetojmë jetën? … Jo, sigurisht që jo. … Tërësisht e nënkuptuar në të gjitha mësimet e Tij për të jetuar me një standard më të lartë të sjelljes morale, është një thirrje drejt përparimit vetjak, drejt besimit shndërrues në Krisht, drejt një ndryshimi të madh të zemrës. …

Nëse besojmë se pikësynimi i planit gjithëpërfshirës të Atit është të na shpëtojë, të na shëlbojë, të na japë mëshirë dhe nëpërmjet kësaj të na sjellë lumturi, cili është pikësynimi i Birit nëpërmjet të cilit realizohet ky plan i madh? …

Vullneti i Jezusit është vullneti mirëdashës i Atit! Ai dëshiron të bëjë të mundur për çdonjërin prej fëmijëve të Atit të Tij që të arrijë synimin përfundimtar të planit, jetën e përjetshme me Ta. Askush nuk përjashtohet nga ky potencial hyjnor. …

Shpëtimtari, Bariu i Mirë, shkon në kërkim të deleve të Tij të humbura derisa t’i gjejë. …

Jo, Ai nuk vë postblloqe dhe pengesa, Ai i heq ato. Ai nuk ju lë jashtë, Ai ju mirëpret brenda. …

Ky është lajmi i mirë! Jam jashtëzakonisht mirënjohës për këto të vërteta të thjeshta. Projekti i Atit, plani i Tij, qëllimi i Tij, pikësynimi i Tij, dëshira e Tij dhe shpresa e Tij janë të gjitha për t’ju shëruar, të gjitha për t’ju dhënë paqe, të gjitha për t’ju çuar ju dhe ata që i doni, në shtëpi.

Njihu me Plakun Patrik Kirën

U lind më 18 korrik 1961 në Karlajll të Kambriës në Angli.
Jetoi në Arabi për disa vjet me familjen e tij.
Filloi të frekuentonte shkollë me konvikt në Angli kur ishte 10 vjeç. “Po t’i krahasosh, pa dyshim që më të lehtë e kishte Harri Poteri në Hoguorts”, – tha ai për shkollën me konvikt. “Ishte e vështirë.” Por, si në Arabi, ashtu edhe në Angli, tha ai, – “takova shumë njerëz të ndryshëm” dhe “mësova nga përvoja se shumica e dallimeve janë të mira, madje të mrekullueshme! Jeta ime është pasuruar tej mase nga bashkëveprimi me njerëz të kulturave dhe besimeve të ndryshme në shumë pjesë të botës.”
U pickua në këmbë nga një akrep kur ishte shtatë vjeç ndërsa ishte në një udhëtim kampingu.
Si një nëntëvjeçar në shkretëtirën arabe, i ati i mësoi si të ngiste makinën.
U pagëzua në vigjilje të Krishtlindjes në vitin 1987 në moshën 26-vjeçare.
U takua me bashkëshorten e tij, Xheniferin, ndërsa ajo vizitoi Londrën për një studim jashtë vendit. Ata u martuan në Tempullin e Oklandit në Kaliforni në janar 1991.
Ka katër fëmijë: Shoni (i cili vdiq në foshnjëri), Elizabeta, Suzana dhe Ema.
Ka punuar në Mbretërinë e Bashkuar, Arabinë Saudite dhe Shtetet e Bashkuara në shumë fusha. Ai dhe bashkëshortja e tij dikur drejtonin biznesin e tyre të komunikimeve.
U mbështetet si Autoritet i Përgjithshëm më 3 prill 2010.
U thirr në Kuorumin e Dymbëdhjetë Apostujve më 7 dhjetor 2023. “Kjo thirrje e shenjtë është me kaq shumë përgjegjësi dhe kaq shumë përulëse për mua”, – tha ai. “Do të më duhet ta vendos gjithë mirëbesimin tim te Shpëtimtari teksa përpiqem që të bëhem personi që Ai ka nevojë për mua që të jem dhe që ta shpërndaj dëshminë time për dashurinë dhe dritën e Tij. … E dua Atë. Do të përpiqem shumë që t’i shërbej Atij me më të mirën e aftësisë sime.”