Sesyon sa Linggo ng Umaga

Layunin ng Diyos na Iuwi Kayo

Mga Sipi

Ni Elder Patrick Kearon

Ng Korum ng Labindalawang Apostol

Lahat ng bagay tungkol sa plano ng Ama para sa Kanyang pinakamamahal na mga anak ay nilayong iuwi tayong lahat. …

Ibig bang sabihin nito ay puwede na kahit ano ang gawin natin sa ating buhay? … Hindi, siyempre hindi. … Ang pinakamahalagang ipinahihiwatig sa lahat ng Kanyang mga turo na mamuhay ayon sa mas mataas na pamantayang moral ay ang isang panawagan tungo sa personal na pag-unlad, tungo sa nagpapabagong pananampalataya kay Cristo, tungo sa malaking pagbabago ng puso. …

Kung naniniwala tayo na ang layon ng plano ng Ama para sa lahat ay iligtas tayo, tubusin tayo, kaawaan tayo, at sa gayon ay lumigaya tayo, ano ang layon ng Anak na nagsasakatuparan ng dakilang planong ito? …

Ang kalooban ni Jesus ay ang kalooban ng mabait na Ama! Nais Niyang gawing posible para sa bawat nahuhuli sa mga anak ng Kanyang Ama na matanggap ang pinakadakilang layunin ng plano—ang buhay na walang hanggan sa piling Nila. Walang sinumang hindi kasama sa banal na potensyal na ito. …

Hinahanap ng Tagapagligtas, ang Mabuting Pastol, ang Kanyang nawawalang mga tupa hanggang sa matagpuan Niya ang mga ito. …

Hindi, hindi Siya naglalagay ng mga harang at balakid; inaalis Niya ang mga iyon. Hindi Niya kayo hinahadlangang pumasok; malugod Niya kayong tinatanggap …

Ito ang mabuting balita! Lubos akong nagpapasalamat para sa mga simpleng katotohanang ito. Ang mithiin ng Ama, ang Kanyang plano, Kanyang layunin, Kanyang layon, Kanyang hiling, at Kanyang inaasam ay pagalingin kayong lahat, bigyan kayong lahat ng kapayapaan, iuwi kayong lahat, at ang mga mahal ninyo sa buhay, sa Kanyang tahanan.

Kilalanin si Elder Patrick Kearon

Isinilang noong Hulyo 18, 1961 sa Carlisle, Cumberland, England.
Nanirahan sa Arabia ng ilang taon kasama ang kanyang pamilya.
Nagsimulang mag aral sa boarding school sa England noong siya ay 10 taong gulang. “Siguradong madali lang iyon para kay Harry Potter sa Hogwarts kung ikukumpara,” sabi niya tungkol sa boarding school. “Mahirap iyon.” Pero, sa Arabia at England, sinabi niya, “Marami akong nakilalang iba’t ibang tao” at “nalaman ko ayon sa karanasan na karamihan sa mga pagkakaiba ay mabuti, at napakaganda pa nga! Ang buhay ko ay napagyaman sa hindi masusukat na paraan ng pakikipag-ugnayan sa mga taong iba’t iba ang kultura at paniniwala sa maraming panig ng mundo.”
Nakagat ng alakdan sa paa noong siya ay pitong taong gulang habang nasa camping.
Bilang siyam na taong gulang sa disyerto ng Arabia, tinuruan siya ng kanyang ama kung paano magmaneho.
Nabinyagan siya sa Bisperas ng Pasko noong 1987 sa edad na 26.
Nakilala ang kanyang asawang si Jennifer nang bumisita ito sa London para mag-aral sa ibang bansa. Ikinasal sila sa Oakland California Temple noong Enero ng 1991.
May apat na anak: Sean (na namatay noong sanggol pa lamang), Elizabeth, Susannah, at Emma.
Nagtrabaho sa United Kingdom, Saudi Arabia, at Estados Unidos sa maraming industriya. Minsan ay nagpatakbo sila ng kanyang asawa ng kanilang sariling negosyo sa komunikasyon.
Sinang-ayunan bilang General Authority noong Abril 3, 2010.
Tinawag sa Korum ng Labindalawang Apostol noong Disyembre 7, 2023. “Ang sagradong tungkuling ito ay napakahirap at nakapagpapakumbaba para sa akin,” sabi niya. “Kailangan kong ibigay ang lahat ng aking tiwala sa Tagapagligtas habang sinisikap kong maging kung ano ang kailangan niya na kahinatnan ko at ibahagi ang aking patotoo tungkol sa Kanyang pagmamahal at liwanag. … Mahal ko Siya. Sisikapin kong paglingkuran Siya sa abot ng aking makakaya.”