Dios Ta na Timon

Pa di Elder M. Russell Ballard

Di e Quorum di e Diesdos Apòstelnan

Mandamentunan i kombenionan ta bèrdatnan masha valioso i doktrinanan ku tin den e Barku Bieu di Sion kaminda Dios ta na timon.

Den e Konferensha General di òktober pasá, mi a invitá e skuchadónan pa sigui e konseho di Brigham Young pa keda riba e Barku Bieu di Sion, ku ta E Iglesia di JesuCristu di e Santunan di e Delaster Dianan, i pa tene ku tur dos man.¹ For di e ora ei, mi ta kontentu pa sa ku algun di mi famia i otronan tabata skuchando i a puntra mi e pregunta aki, “ kiko tin den e Barku Bieu di Sion ku nos mester tene duru na dje?” Mi a kòrda nan riba loke Presidente Brigham Young a bisa: “ Nos ta den e barku bieu di Sion. … [Dios] ta na timon i lo keda einan.... E ta dikta, guia i dirigí. Si hende tin konfiansa implísito den nan Dios, [i] nunka bandoná nan kombenio ni nan Dios, E lo guia nos korektamente.”²

Klaramente, nos Tata Selestial i e Señor JesuCristu a ekipá e Barku Bieu di Sion ku bèrdatnan eterno kla i simpel ku lo yuda nos pa keda riba e kurso dor di awanan intrankil di e bida mortal. Aki tin djis algun.

E Iglesia di JesuCristu semper a wòrdu guiá pa profetanan i apòstelnan. Maske mortal i suheto na imperfekshon humano, e siervonan di Señor ta inspirá pa yuda nos evitá opstákulonan ku ta menasá e bida spiritual i ku ta yuda nos pasa sigur dor di mortalidat pa nos destinashon final i definitivo selestial.

Durante mi kasi 40 aña di asosashon estrecho, mi tabata un testigu personal di tantu inspirashon ketu komo revelashon profundo ku a hiba e profetanan i apòstelnan na akshon, e otro Outoridatnan General, i e lidernan ousiliar. Maske niun no ta perfekto ni sin eror, e hòmber- i muhénan bon aki tabata perfektamente dediká na hiba e obra di Señor hibando esaki dilanti, manera E a indiká..

I no kiboká boso mes: Señor ta dirigí Su Iglesia pa medio di profetanan i apòstelnan bibiente. Esaki ta e manera ku E semper a hasi su obra. Enbèrdat, Señor a siñá, “Di bèrdat, di bèrdat, mi ta bisa boso, Esun ku risibí esun ku mi manda Esei ta risibí mi.”³ Nos no por separá Cristu for di Su siervonan, sin Su promé Apòstelnan, nos lo no tabatin un relato di testigu okular di hopi di Su enseñansanan. Su ministerio, su sufrimentu den e hardin di Getsémani, i di Su morto na e krus, sin nan testimonio, nos lo no tabatin un testigu apostóliko di e graf bashí i di e Resurekshon.

El a manda e promé Apòstelnan ei:

“P’esei, bai, i siña tur e nashonnan, batisá nan den nòmber di e Tata i di e Yu i di e Spiritu Santu:

“Siñando nan pa kumpli tur kos ku mi a manda boso.”⁴

E enkargo aki a wòrdu renová den nos tempu ora Señor a yama Jose Smith pa restourá e Iglesia, ku Apòstelnan ordená pa deklará Su Evangelio un delaster biaha promé ku E bini atrobe.

Semper tabata un desafio pa e mundu pa aseptá profetanan i apòstelnan bibiente, pero ta esensial pa hasi esaki pa asina komprondé e Ekspiashon i e enseñansanan di JesuCristu kompletamente i pa risibí e plenitut di e bendishonnan di e saserdosio ku ta wòrdu duná na esnan ku E a yama.

Hopi hende ta pensa ku lidernan i miembronan di Iglesia mester ta perfekto òf kasi perfekto. Nan ta lubidá ku Señor Su grasia ta sufisiente pa logra Su obra pa medio di mortalnan. Nos lidernan tin e mihó intenshon, pero tin biaha nos ta kometé erornan. Esaki no ta solamente pa relashonnan di Iglesia, pasó e meskos ta sosodé den nos relashonnan entre amigu, bisiñanan, i sosionan na trabou i asta entre kasánan i nan famia.

Buskando debilidat humano den otro ta hopi fásil. Sinembargo, nos ta hasi un eror serio dor di tuma nota solamente di e naturalesa humano di un otro i despues faya na mira Dios su man obrando den esnan ku El a yama.

Enfokando riba kon Señor ta inspirá Su lidernan eskohé i kon E ta move e Santunan pa hasi kosnan remarkabel i ekstraordinario no opstante nan humanidat, ta un manera ku nos ta tene na e evangelio di JesuCristu i keda sigur abordo di e Barku Bieu di Sion.

E di dos bèrdat ta e doktrina di e plan di salbashon. Dor di e Profeta Jose Smith, Dios a duna e Buki di Mormon, e Doctrina y Convenios, i hopi enseñansa adishonal na e Iglesia. Esakinan ta inkluí un konosementu di e plan di salbashon, ku ta un mapa di for di unda nos a bin, nos propósito aki na mundu, i unda nos ta bayendo ora nos muri. E plan tambe ta proveé nos ku un perspektiva úniko i eterno ku nos ta Dios su yunan spiritual. Dor di komprondé ken nos Tata Selestial ta i nos relashon ku n’E i ku Su Yu stimá, JesuCristu, nos lo aseptá Nan mandamentunan i hasi kombenionan ku Nan ku lo hiba nos bèk den Nan presensia eterno.

Kada biaha ku mi tene un resien nasí, mi ta puntra mi mes: “Ken bo ta, chikitin? Kiko lo bo bira dor di e Ekspiashon di Cristu?”

Nos ta hasi preguntanan similar reflekshonando ora un persona ku nos stima fayesé: “Unda nan ta? Kiko nan ta mira i eksperenshá? Bida ta kontinuá? Kiko lo ta e naturalesa di nos relashonnan mas apresiá den e gran mundu di e spiritunan di e mortonan?”

Den e mundu ei, nos famia tin dos ñeta, Sara i Emily, un ñetu, Nathan. Ku kada fayesimentu di nos ñetunan, nos komo famia ta tene na e bèrdatnan di e Evangelio ku dos man. Nos preguntanan a wòrdu kontestá ku konsuelo i siguransa dor di e Ekspiashon di e Salbador. Maske ku nos ta sinti falta di nos ñetunan, nos sa ku nan ta bibu, i nos sa ku nos lo mira nan bèk. Kon gradisí nos ta pa e konosementu spiritual den tempu di turbulensia personal i familiar.

Un otro bèrdat klave den e Iglesia ta ku Tata Selestial a krea Adam i Eva pa un propósito elevá. Tabata nan deber—i konsekuentemente di nan posteridat—pa krea kurpa mortal pa Dios su yunan spiritual pa asina na por eksperensha mortalidat. Dor di proseso aki, Tata Selestial ta manda Su yunan spiritual na mundu pa siña i krese dor di e eksperensha di bida na mundu. Pasó E stima Su yunan, Dios ta manda mensaheronan selestial i Apòstelnan pa siña nan di JesuCristu Su ròl sentral komo nos Salbador.

Atraves di siglonan, profetanan a kumpli ku nan deber ora nan a atvertí e hendenan di e peligernan ku ta nan dilanti. Señor Su Apòstelnan tin e deber di mira, atvertí, i ekstendé nan man pa yuda esnan ku ta buska kontesta riba preguntanan di bida.

Binti aña pasá, e Promé Presidensha i e Quorum di Diesdos Apòstelnan a emití “ E Famia: Un Proklamashon pa e Mundu.” Den e dokumento inspirá ei, nos a konkluí ku lo siguiente: “Nos ta atvertí ku individuonan ku ta violá konvenionan di kastidat, ku abusá di kasá òf yunan òf esnan ku no ta kumpli ku e responsabilidatnan familiar riba un dia lo para responsabel dilanti di Dios. Mas aleu, nos ta atvertí ku e desintegrashon di e famia lo trese riba individuonan, komunidatnan i nashonnan e kalamidatnan predesí pa profetanan antiguo i moderno.”⁵

Komo Apòstelnan, nos ke reafirmá e atvertensia solemne atrobe awe. Por fabor kòrda ku e mandamentunan i e kombenionan ta bèrdatnan masha valioso i doktrinanan ku nos ta haña den e Barku Bieu di Sion, kaminda Dios ta na timon.

Un otro doktrina importante ku nos mester gara na dje ta opservá e dia di Sabat. Esaki lo yuda nos pa keda sin mancha di e mundu, proveé nos ku un deskanso físiko, i duna kada un di nos un renovashon spiritual di adorá e Tata i E Yu tur Djadumingu.⁶ Ora nos deleitá den e dia di Sabat, e ta un señal di nos amor pa Nan.⁷

Komo parti di nos esfuerso pa hasi e Sabat un delisia, nos a puntra e lidernan lokal i miembronan di Iglesia pa kòrda ku e reunion sakramental ta di Señor i mester ta basá riba su enseñansanan. E presentashon di e ordenansanan di e santa sena ta e momentu ku nos ta renová nos kombenio i rekonfirmá nos amor pa e Salbador i kòrda Su sakrifisio i Su Ekspiashon.

E mesun spiritu di adorashon aki mester penetrá den nos reunionnan mensual di ayuno i testimonio. E reunion sakramental aki ta pa miembronan ekspresá na kòrtiku nan gratitut, amor, i apresio pa nan Tata Selestial, JesuCristu i [pa] e Evangelio restourá i duna nan testimonio personal di e kosnan aki. Reunion di ayuno i testimonio ta un tempu pa kompartí pensamentunan breve ku ta inspirá i duna un testimonio solemne. No ta tempu pa duna un diskurso.

Mucha chikitu mester entrená pa kompartí nan testimonio den Primaria i ku guia di nan mayornan den reunionnan di nochi di hogar te ora nan por komprondé e nifikashon importante di un testimonio.

E énfasis resien di hasi e Sabat un delisia ta un resultado direkto di inspirashon di Señor pa medio di Su lidernan di Iglesia. Miembronan di konseho di bario mester asistí e obispado hopi simannan di antemano pa revisá músika i tópikonan ku a wòrdu rekomendá pa kada reunion sakramental.

Nos tur ta bendishoná ora e Sabat ta yená ku amor pa e Señor den nos hogar i den e iglesia. Ora nos yunan wòrdu siña na e manera di e Señor, nan ta siña pa sinti i rospondé na Su spiritu. Nos tur lo deseá pa asistí kada djadumingu pa partisipá di e santa sena ora ku nos ta sinti e spiritu di Señor. I tur, yòn i bieu, ku tin karganan pisá, lo sinti e alivio spiritual i konsuelo ku ta bin di e dia di Sabat di kontemplashon di nos Tata Selestial i di Señor JesuCristu.

Afortunadamente, Cristu ta semper serka, sperando i dispuesto pa yuda nos si nos ta pidi pa ayudo i ta dispuesto pa arepentí i bini serka dje.

Awor, segun nos ta reflekshoná riba algun di e bèrdatnan aki ku ta eksistí den e Barku Bieu di Sion, laga nos keda abordo i kòrda ku, pa definishon, un barku ta un vehíkulo, i e propósito di un vehíkulo ta pa hiba nos na un destinashon.

Nos barku su destinashon ta e bendishonnan di e evangelio, e reino di shelu, i e gloria selestial, i e presensha di Dios!

Dios Su plan tei. E ta na timon, i Su gran i poderoso barku ta drif bai na salbashon i eksaltashon. Kòrda ku nos no por yega ei dor di bula for di e barku i trata di landa yega aya riba nos mes.

Eksaltashon ta e meta di e biahe mortal aki, i niun [hende] por yega aya sin e medionan di e Evangelio di JesuCristu: Su Ekspiashon, e ordenansanan, i e doktrina i e prinsipionan guiadó ku nos por haña den e Iglesia.

Ta e Iglesia di JesuCristu den kual nos ta siña e obranan di Dios i aseptá e grasia di e Señor JesuCristu ku ta salba nos. Ta den e Iglesia nos ta sera e kompromisonan i kombenionan di famianan eterno ku ta bira nos pasport pa eksaltashon. Ta e Iglesia ku ta proveé e saserdosio pa kondusí nos dor di e awanan inpremirabel di mortalidat.

Laga nos ta gradisí pa e Barku Bieu di Sion, pasó sin dje nos lo drif bai, nos so i impotente, lastrá sin timon òf rema, drei den e korientenan fuerte di e bientu i olanan di e atversario.

Tene duru, rumannan, i sigui nabegá den e barku glorioso, E Iglesia di JesuCristu di e Santunan di e Delaster Dianan, i nos lo alkansá nos destino eterno. Esaki ta mi testimonio i mi orashon pa nos tur den e nòmber di Esun ku e Barku Bieu di Sion ta karga Su nòmber, ku ta Señor i Salbador, JesuCristu, amèn.