Naespirituan a Kabaelan
Kas napudno a disipulo ni Jesucristo, makaawatka iti bukod a pammaregta ken paltiing, a maitunos kadagiti bilinna, a naipangpangruna kenka.
Iti ipapanawko iti Young Women camp daytoy kalgaw, inyawat kaniak ti makaay-ayo a balasitang ti maysa a surat. Ditoy a dinamagna, “Kasano a maibagak no adda ibaga ti Dios kaniak?” Magustuak ti saludsodna. Tarigagayantayo a maikonektatayo iti nailangitan a pagtaengantayo. Kayattayo a marikna a kasapulan ken napategtayo. No dadduma agkarigatantayo a mangilasin iti bukodtayo a kapanunotan ken dagiti naalumamay a parikna ti Espiritu. Insuro dagiti propeta, nagkauna ken moderno, a “no adda mangawis ken manguyot nga agaramid iti nasayaat, naggapu ken ni Cristo.”
Inyawis ni Presidente Russell M. Nelson: “Patpatgek a kakabsatko, idawatko a padur-asenyo koma ti naespirituan a kabaelanyo nga umawat iti paltiing. … Pilienyo nga aramiden ti naespirituan nga aramid a kasapulan tapno mananam ti sagut ti Espiritu Santo ken mangngeg a masansan ken nalawlawag ti timek ti Espiritu.”
Tarigagayak itoy a bigat a makasaokayo a naimpusuan maipapan iti uppat a wagas a mangpadur-as iti naespirituan a kabaelanyo nga umawat iti paltiing.
1. Addaan Panggep iti Panangparnuay iti Oras ken Lugar a Dumngeg iti Timek ti Dios
No usarenyo ti karbenganyo nga agpili nga idaton ti orasyo iti inaldaw nga umasideg iti timek ti Dios, nangruna iti Libro ni Mormon, agbalinto a nalawlawag ken pamiliar ti timekna kadakayo.
Iti kasupadina, dagiti makasinga ken ariwawa a mangpunno iti lubong ken iti pagtaengantayo ti ad-adda a mangparigat a denggen ti timekna. Dagitoy a makasinga ti mangpunno iti panunot ken pusotayo nga awan lugar ti dagiti naalumamay a pannignay ti Espiritu Santo.
Insuro ni Propeta Joseph Smith a masansan nga ipakita ti Dios ti Bagina “iti tattao iti nalimed, iti siledda; iti let-ang wenno taltalon, ken gagangay nga awan ti ringgor wenno ariwawa.”
Kayat ti Satanas nga isinanatayo iti timek ti Dios babaen ti panangiruarnatayo kadagita a naulimek a lugar. No agsao ti Dios iti naalumamay, bassit a timek, umasidegtayo a dumngeg Kenkuana. Panunotenyo laeng no ania ti mapasamak no nakakumittayo nga agtalinaed a nakakonekta iti langit a kas iti panagtalinaedtayo a nakakonekta iti WI-FI! Pumili iti oras ken lugar, a dumngeg iti timek ti Dios iti inaldaw. Ket tungpalenyo nga umisu daytoy sagrado a pagrebbengan, gapu ta adu ti agpannuray iti daytoy!
Agtignay a di Agtantan
No maawatyo ti parikna ket agtignay nga addaan panggep, mausarnaka ti Apo. Ti ad-adu a tignaymo, ad-adda a pamiliar ti timek ti Espiritu. Ad-adda a mailasinmo ti tarabay ti Dios ken Isu “siaayat … a mangipalgak iti panunot ken pagayatanna.” No itantanmo, malipatam ti parikna wenno maliwayam ti tumulong iti maysa a tao para iti Dios.
Aramidem ti Imbaon ti Apo Kenka
Ti kararag a kasla nagagar a sungbatan ti Nailangitan nga Ama ket ti dawattayo a maiturong iti tao nga agkasapulan tulongtayo. Insuro ni Presidente Eyring nga agkiddawtayo iti paltiing babaen ti panagdamag iti Dios no asino ti matulongantayo para Kenkuana. “No agsaludsodka kas iti dayta, umayto ti Espiritu Santo ket mariknam dagiti banag a maaramidmo para iti dadduma a tao. No aramidem dagita a banag, addaka iti pangibaonan ti Apo, ket no addaka iti pangibaonan ti Apo, maikarika iti sagut ti Espiritu Santo.”
Mabalinmo ti agkararag ken agkiddaw iti pangibaonan ti Apo. No aramidem, mausarna dagiti gagangay a paglaingan tapno maipatungpal ti nakaskasdaaw nga aramidna.
Ti lelongko, ni Fritz Hjalmar Lundgren, pimmanaw iti Sweden idi agtawen iti 19. Simmangpet iti America nga is-isu, nga iggemna ti maleta ken nakalpas iti innem a tawen iti pagadalan. Di makapagsao iti Ingles, nagbaniaga iti Oregon ket nagtrabaho idiay a para pukan ti kayo ken kalpasanna idi agangay, kaduana ti lelangko ken ti inak, kimmappengda iti Simbaan. Di pay pulos nangidaulo iti maysa a ward, ngem kas napudno a home teacher, nangyeg iti nasurok a 50 nga agduduma a pamilia iti panagaktibo iti Simbaan. Kasano nga inaramidna daytoy?
Kalpasan ti ipupusay ni Lelong, ur-urnosek ti sangakahon a papelesna idi nakitak ti surat ti maysa a lalaki a nangsubli iti simbaan gapu iti ayat ni Lelong. Mabasa iti surat, “Patiek a ti sekreto ni Brother Fritz, ket adda a kanayon iti pangibaonan ti Nailangitan nga Ama.”
Naggapu dayta a surat ken ni Brother Wayne Simonis. Binisita ni Lelong isuna ket naam-ammona ti tunggal miembro ti pamilia. Idi agangay, imbaga ni Lelong kadakuada a kasapulan ida ket inawisna ida a makimisa. Ngem dayta a Domingo, nakariing ni Brother Simosis nga adda parikutna—dina pay nalpas a naatepan ti balayna ket umay ti tudo. Inkeddengna a di makimisa, nakilamano ken ni Lelong, sa pimmanaw ket nagawid a mangileppas iti atep. Nakadar-ay ti pamiliana iti miting ti sakramento nga awan isuna.
Nasayaat ti planona agingga nga, iti rabaw ti atep, nangngegna nga adda umul-uli iti agdan. Iti saona: “Idi tangadek, … ni Brother Fritz ti nakatakder iti ngato ti agdan. Inisemannak iti dakkel. Idi damo, nabainannak ket nariknak a kaslaak la ubing a naduktalan nga agliwat iti eskuela. Sa … nagpungtotak. [Ngem inuksob ni Brother Fritz] ti amerikanana ket insab-itna iti agdan. Idi inleslesna ti manggas ti puraw a kamisetana, sinangonak ket kinunana, ‘Brother Simosis, adda kadi pay maysa a martiliom? Nalabit a napateg unay daytoy nga aramid wenno dimo koma pinanawan ti pamiliam, ket no napateg dayta, kayatko a tulonganka.’ Idi kinitak ti matana, nakitak ti imbag ken ayat a kas ken ni Cristo. Naawan ti pungtotko … Imbabak dagiti ramitko dayta a Domingo ket sinurotko ti naimbag a gayyemko a nagsubli iti chapel.”
Inawat ni Lelong ti nangibaonan kenkuana ti Apo, ket ammona a nasken a sapulenna ti napukaw a karnero. Kas iti uppat a lallaki a nangbagkat iti gayyemda a di makapagna nga impababada iti maysa nga atep tapno agasan ni Jesucristo, inaramid met tni Lelong ti nangibaonan kenkuana a mapan iti rabaw ti atep. Mangted ti Apo iti paltiing kadagiti tumultulong iti dadduma.
4. Mamati ken Agtalek
Itay kallabes, nabasak iti nasantuan a kasuratan maipapan ti sabali pay a naindaklan a missionary nga immawat iti pangibaonan ti Apo. Isursuro ni Aaron ti ari dagiti Lamanite, a nasdaaw no apay a saan nga immay ti kabsat ni Aaron a ni Ammon a mangisuro pay kenkuana. “Ket kinuna ni Aaron iti ari: Adtoy, imbaon ti Espiritu ti Apo iti sabali a wagas.”
Nagsao ti Espiritu iti pusok: adda sabali a mision nga aramiden ti tunggal maysa kadatayo, ken no dadduma nalabit nga awagannatayo ti Espiritu iti “sabali a wagas.” Adu a wagas a mangbangon iti pagarian ti Dios kas agar-aramid ken agtungtungpal iti katulagan a disipulo ni Jesucristo. Kas napudno a disipulona, makaawatka iti bukod a pammaregta ken paltiing, a maitunos kadagiti bilinna, a napangipangruna kenka. Addaanka iti naidumduma a mision ken akem nga aramiden iti biag ket maikkankanto iti naidumduma a tarabay a mangipatungpal kadagitoy.
Ni Nephi, ti kabsat ni Jared, ken ni Moises ket adda dadakkel a danum a ballasiwenda—ket di agpapada ti inaramidda. Inaramid ni Nephi iti “kayo a naidumduma ti kinapintekna.” Nagaramid ti kabsat ni Jared kadagiti bilog a “napintekda a kas iti malukong.” Ket ni Moises “nagna iti namaga a daga iti tengnga ti baybay.”
Immawat tunggal maysa iti bukod a pangiturong, naipangruna kadakuada, ket nagtalek ken nagtignayda. Ikaso ti Apo dagiti agtulnog ken, iti sao ni Nephi, “isaganana ti maysa a wagas nga agpaay [kadatayo] a mangtungpal kadagiti banag nga imbilinna.” Kitaen a kuna ni Nephi, “maysa a wagas”— saan a “ti wagas.”
Maliwayantayo kadi dagiti pangibaonan ti Apo gapu ta insagananan ti “maysa a wagas” a sabali iti maysa a namnamaentayo?
Naiturong ni Lelongko iti maysa a karkarna a lugar—a nakakawes iti amerikana, iti rabaw ti atep, iti maysa a Domingo. Agtalekka iti Apo nga iturongnaka, uray no sabali dayta a wagas iti namnamaem wenno sabali iti dadduma.
Umay dagiti Santo iti Ud-udina nga Aldaw iti adu a sukog ken kadakkel, ngem “agpapada ti amin iti Dios”—”nangisit ken puraw, adipen ken nawaya, lalaki ken babai,” awan asawana ken naasawaan, nabaknang ken napanglaw, ubing ken lakay nabayagen a miembro ken kabumbuniag. Asinoka man wenno ania ti pagpaspasaram, maawiska iti lamisaan ti Apo.
Agbalin a pagtuladan ti biagmo ti panagsapul ken panagaramid iti pagayatan ti Ama, agpayso a maiturongkanto nga agbalbaliw ken agbabawi.
Nabangon ti baro a programa ti Simbaan para kadagiti ubbing ken agtutubo iti pundasion ti panagsursuro nga agsapul iti paltiing, panangtakuat no ania ti ipaaramid ti Apo kadatayo, ken kalpasanna panagtignay it dayta a pangiturong. Maikarigatan ti tunggal maysa kadatayo, ania man ti edad wenno kasasaad, ti agsapul, umawat, wen agtignay. No surotenyo daytoy agnanayon a pagtuladan nga inordenan ti Dios iti aldawtayo, umasidegkayto kenJesucristo—ti ayatna, ti lawagna, ti direksionna, ti kapiana, ken ti pangpaimbag ken pangpabael a bilegna. Ket dumur-askayto iti naespirituan a kabaelanyo nga agbalin nga inaldaw a ramit iti imana a mangipatungpal Iti naindaklan nga aramidna. Iti nagan ni Jesucristo, amen.