Dagiti Panagbalbaliw a Mangpapigsa kadagiti Agtutubo
Ad-adu nga agtutubo a lallaki ken agtutubo a babbai ti agballigi iti karit ket agtalinaed iti dana ti katulagan gapu iti daytoy dakkel a pokus kadagiti agtutubotayo.
Agyamanak, patpatgenmi a Presidente Nelson, iti dayta naragsak a napadtuan a pangiwanwan maipanggep kadagiti saksi iti panagbuniag ken ti panangiturong a kiniddawmo nga ibinglaymi a tumulong a mangpapigsa kadagiti agtutubo ken mangpadur-as iti sagrado a potensialda.
Sakbay nga ibinglayko dagita a panagbalbaliw, ipeksami ti napudno a panagyamanmi iti eksepsional a wagas a nagresponde dagiti miembro iti panagdur-as iti agtultuloy a Pannakaisubli ti ebanghelio. Kas insingasing ni Presidente Nelson itay naglabas a tawen, nainomyon dagiti bitaminayon!
Sirarag-o nga adalenyo ti Umaykayo, Sumurot Kaniak iti pagtaenganyo. Sinungbatanyo pay dagiti panagbalbaliw iti simbaan. Agkaykaysa dagiti miembro ti elders quorum ken Relief Society iti aramid ti pannakaisalakan.
Aglaplapusanan ti panagyamanmi. Nangnangruna nga agyamankami nga agtalinaed a napigsa ken napudno dagiti agtutubotayo.
Agbibiag dagiti agtutubotayo iti naragsak ngem mapannubok a panawen. Saan a kaano man nalablabes dagiti adda a pili. Maysa a pagarigan: mangted ti moderno a smartphone iti access iti napateg ken makaparegta nga impormasion, agraman ti family history ken ti scripture. Iti sabali a bangir, naglaon iti kinamaag, imoralidad, ken dakes nga awan pay iti napalabas.
Tapno matulongan dagiti agtutubotayo nga agpili iti umno, insagana ti Simbaan ti tallo a komprehensibo nga inisiatibo. Umuna, napapigsa ken napadakkel ti kurikulum iti pagtaengan. Maikadua, maysa a programa dagiti ubbing ken agtutubo a mairaman dagiti naragsak nga aktibidad ken bukod a panagdur-as ti indatag itay napalabas a Domingo da Presidente Nelson, Presidente M. Russel Ballard, ken dagiti Sapasap nga Opisial. Ti maikatlo nga inisiatibo ket panagbaliw iti panagbuangay tapno maaramid a dagiti agtutubo ti napatpateg a pokus dagiti bishop ken dadduma pay a lider. Nasken a nabileg iti kinaespirituan ti pokus ken matulongan dagiti agtutubotayo nga agbalin a buyot nga indawat kadakuada ni Presidente Nelson a pangbalinanda.
Dagiti Naikonekta a Pagtuladan
Dagitoy a panagkagumaan, karagpin dagiti naipakaammo bayat ti sumagmamano a naglabas a tawen ket saan a mainaig a panagbalbaliw. Tunggal maysa iti panagbalbaliw ket napateg a paset ti naikonekta a pagtuladan a mangbendision kadagiti Santo ken mangisagana kadakuada a sumabat iti Dios.
Maysa a paset ti pagtuladan ti mainaig iti tumantanor a kaputotan. Maidawat kadagiti agtutubo nga umawat iti ad-adu pay a pangrebbengan iti ub-ubing a tawenda—nga awan nagannak ken lider a mangaramid iti kabaelan nga aramiden dagiti agtutubo para iti bagbagida.
Panangipakaammo
Ita ipakaammomi ti panagbalbaliw a pannakabukel kadagiti agtutubo iti lebel ti ward ken stake. Kas inlawlawag ni Presidente Nelson, ilawlawagto ni Sister Bonnie H. Cordon dagiti panagbalbaliw iti Young Women daytoy a sardam. Maysa a panggep ti panagbalbaliw nga ilawlawagko ket mangpapigsa kadagiti Aaronic Priesthood holder, korum, ken panguluen ti korum. Mayurnos dagitoy a panagbalbaliw iti aramidtayo iti Doktrina ken Katulagan 107:15, a mabasa, “Ti bishopric ti panguluen daytoy nga [Aaronic] priesthood, nga isu ti agiggem kadagiti tulbek wenno turay daytoy.”
Maysa kadagiti pagrebbengan ti bishop ti mangimaton kadagiti priest ken makitugaw iti council kadakuada, a mangisuro kadakuada kadagiti pagrebbenganda iti takemda. Mainayon pay, ti umuna a mammagbaga iti bishopric iti addaan masinunuo a pagrebbengan para kadagiti teacher ken ti maikadua a mammagbaga para kadagiti deacon.
Ngarud, tapno mayurnos iti daytoy a paltiing iti Doktrina ken Katulagan, maisardengto dagiti panguluen ti Young Men iti lebel ti ward. Adu a kinaimbag ti naaramid dagitoy napudno a kakabsat a lallaki ket agyamantayo kadakuada.
Namnamaenmi nga ikkanto dagiti bishopric iti dakkel nga empasis ken pokus kadagiti pangrebbengan iti priesthood dagiti agtutubo a lallaki ken tulongan ida kadagiti pagrebbenganda iti korum. Maawaganto dagiti makabael nga adult Young Men adviser a mangtulong kadagiti panguluen ti korum ti Aaronic Priesthood ken ti bishopric kadagiti pagrebbenganda. Agtalekkami nga ad-adu nga agtutubo a lallki ken agtutubo a babbai ti agballigi iti karit ket agtalinaed iti dana ti katulagan iti daytoy dakkel a pokus kadagiti agtutubotayo.
Iti naparegta a pagtuladan ti Apo, pagrebbengan ti bishop ti tunggal maysa iti ward. Bendisionanna dagiti nagannak dagiti agtutubo kasta met dagiti agtutubo. Maammuan ti bishop no mangbalakad iti maysa nga agtutubo a lalaki a mangikarkarigatan nga umadayo iti pornograpia, matulonganna iti panagbabawina laeng bayat ti itutulongna iti kadagiti nagannak nga agtignay iti ayat ken pannakaawat. Ti pannnakapaimbag ti agtutubo a lalaki ket para iti pamiliana ken posible babaen ti panangitrabaho ti bishop para iti sibubukel a pamilia. Nagbalin itan ti agtutubo a lalaki a maikari a Melchizedek Priesthood holder ken full-time missionary.
Kas isingasing daytoy a pakaammo, dagitoy a panagbalbaliw ti:
-
Mangtulongto kadagiti bishop ken mamagbagada nga agpokus kadagiti kapatgan a pagrebbenganda kadagiti agtutubo ken ubbing iti Primary.
-
Maisentro ti bileg ken dagiti pagrebbengan ti Aaronic Priesthood iti bukod a biag ken panggep a tun-oyen ti tunggal agtutubo a lalaki.
Dagitoy a panagbalbaliw pay ti:
-
Mangyunay-unay kadagiti pagrebbengan ti panguluen ti korum ti Aaronic Priesthood ken ti wagas a panagreportda a direkta iti bishopric.
-
Mangparegta kadagiti adult lider a mangtulong ken mangmentor kadagiti panguluen ti korum ti Aaronic Priesthood iti panangpadakkel iti bileg ken turay ti takemda.
Kas nakita, saan a mangpabassit dagitoy a panagbalbaliw iti pagrebbengan ti bishopric para kadagiti agtutubo a babbai. Kas insuro ni Presidente Nelson, “Umuna ken kapatgan a pagrebbengan [ti bishop] ti mangaywan kadagiti agtutubo a lallaki ken agtutbo a babbai ti wardna.”
Kasano nga ipatungpal ti naayat ken nagaget a bishop daytoy a pagrebbengan? No malagipyo, idi 2018, nabaliwan dagiti korum ti Melchizedek Priesthood tapno as-asideg a makitinnulong iti Relief Society tapno dagiti elders quorum ken Relief Society, babaen ti direksion ti bishop, makatulongda a mangibaklay kadagiti napapateg a pagrebbengan a sigud a nangusar iti kaaduan nga orasna. Mairaman kadagitoy a pagrebbengan ti aramid ti misionario ken aramid iti templo ken family history iti ward—kasta met ti ad-adu a ministering kadagiti miembro ti ward.
Ti bishop dina mabalin nga idutok ti sumagmamano a pagrebbenganna, kas iti panangpapigsa kadagiti agtutubo, panagbalin a sapasap nga ukom, panangaywan kadagiti agkasapulan, ken panangkita kadagiti pakaseknan ti kuarta ken aramid a temporal. Nupay kasta, basbassit dagitoy ngem iti mabalin nga adda kadatayo iti napalabas. Kas inlawlawag ni Elder Jeffrey R. Holland itay naglabas a tawen idi naipakaammo dagiti pannakabaliw dagiti korum iti Melchizedek Priesthood: “Ti bishop agtalinaed, siempre, a presiding high priest ti ward. Daytoy baro nga alignment [dagiti elders quorum ken Relief Society] ti mangpalugod kenkuana a mangimaton iti aramid ti Melchizedek Priesthood ken ti Relief Society a dina kasapulan nga aramiden ti ania man a trabaho dagita a grupo.
Kas pagarigan, ti Relief Society president ken elders quorum president, kas nadutokan, dakdakkel ti akemda a makapagbalakad kadagiti nataengan—kasta met a makapagbalakad ti Young Women president kadagiti agtutubo a babbai. Idinto a ti bishop laeng ti makapagserbi a sapasap nga ukom, maikari dagitoy dadduma pay a lider iti paltiing manipud iti langit a tumulong kadagitoy a karit a di kasapulan ti sapasap nga ukom wenno mainaig iti abuso iti ania a kita.
Di kayat a sawen dayta a saan a mabalin wenno saan a nasken a makasao ti agtutubo a babai ti bishop wenno dagiti dadakkelna. Dagiti agtutubo ti pokusda! Ngem kayatna a sawen a kasayaatan a maited ti Young Women leader ti kasapulan ti maysa a balasitang. Pakaseknan ti bishop nga agpada dagiti agtutubo a babbai ken agtutubo a lallaki, ngem bigbigenmi ti pigsa nga agtaud kadagiti natibker, napasnek, ken nakapokus a lider ti Young Women a mangipateg, mangisuro, a saan a mangaramid kadagiti akem dagiti presidente ti klase ngem mangtultulong kadagiti agtutubo nga agballigida kadagita nga akem.
Ibinglayto ni Sister Cordon dagiti nayon a napipintas a panagbalbaliw para kadagiti agtutubo a babbain ita a sardam. Ipakaammok a dagiti Young Women president ti ward ket agreport ken makiumanda a direkta iti bishop ti ward. Iti napalabas, maidutok daytoy a pagrebbengan iti mamagbaga, ngem iti panagtultuloy, dagiti agtutubo a babbai ket direkta a pagrebbenganto ti maysa nga agiggem kadagiti pangimaton a tulbek iti ward. Ituloy ti Relief Society president ti agreportto a direkta iti bishop.
Iti sapasap ken stake level, ituloytayo nga adda dagiti panguluen ti Young Men. Iti stake level, ti high councilor ti agbalinto a Young Men president ken, addaan kadagiti high councilor a naidutok iti Young Women ken Primary, agbalin a paset ti Aaronic Priesthood–Young Women Committee ti stake. Makitnnulong dagitoy a kakabsat a lallaki iti Young Women presidency ti stake itoy a committee. Addaan mamagbaga iti stake president kas chair, dumakkel ti pateg daytoy a committee gapu ta adu kadagiti programa ken aktibidad iti baro nga inisiatibo dagiti Ubbing ken Agtutubo ti addanto iti stake level.
Dagitoy a high councilor, babaen ti direksion ti panguluen ti stake, makatulongda iti bishop ken dagiti korum ti Aaronic Priesthood iti wagas a maipada iti serbisio nga inted dagiti high councilor iti elders quorum iti ward.
Kas mainaig a banag, agserbi ti sabali pay a high councilor kas Sunday School president ti stake ken, no kasapulan, makapagserbi iti Aaronic Priesthood–Young Women committee iti stake.
Mailawlawagto dagiti nayon a panagbalbaliw iti panagbuangay iti impormasion a maipatulod kadagiti lider. Iram dagitoy a panagbalbaliw:
-
Ti bishopric youth committee meeting ket masukatan iti youth council dagiti agtutubo ti ward.
-
Ti sao a “Mutual” masiardengton ket agbalin a “dagiti aktibidad ti Young Women,” “dagiti aktibidad ti korum ti Aaronic Priesthood,” wenno “dagiti aktibidad dagiti agtutubo” ken maangay a linawas iti lugar no mabalin.
-
Ti badyet ti ward para kadagiti aktibidad dagiti agtutubo ket mabingay a patas kadagiti agtutubo a lallaki ken agtutubo a babbai a maibatay iti bilang dagiti agtutubo iti tunggal organisasion. Maited ti umdas a gatad para kadagiti aktibidad iti Primary.
-
Iti amin a level—ward, stake, ken sapasap—usarentayo ti balikas nga “organisasion” imbes a ti balikas nga “auxiliary.” Dagiti mangidaulo iti Sapasap a Relief Society, dagiti organisasion ti Young Women, Young Men, Primary, ken Sunday School ket maawaganda iti “Sapasap nga Opisial.” Dagiti mangidaulo kadagiti organisasion iti ward ken stake level ket maawaganda iti “opisial iti ward” ken “opisial iti stake.”
Dagiti panangbalbaliw a naipakaammo ita ket mabalin a mairugi a dagus apaman a nakasaganan dagiti branch, ward, district, ken stake, ngem nasken a maaramid inton Enero 1, 2020. Dagitoy a panagbalbaliw, no naikadua kadagiti immuna a panagbalbaliw, ket mangibagi iti panangkagumaan a mainaig iti naespirituan a maitunos iti doktrina a mangbendision ken mangpapigsa iti tunggal lalaki, babai, agtutubo, ken ubing, a mangtultulong iti tunggal maysa a sumurot iti pagwadan ti Mangisalakantayo, a ni Jesucristo, bayat panagtultuloytayo iti dana ti katulagan.
Patpatgek a kakabsat, ikarik ken paneknekak a dagitoy komprehensibo a pagbalbaliwan, babaen ti direksion ti naparegta a presidente ken propeta, ni Russel M. Nelson, ket mangpabileg ken mangpatibkerto iti tunggal miembro ti Simbaan. Mapapigsanto dagiti agtutubotayo ti pammatida iti Mangisalakan, masaluadanda kadagiti sulisog ti kabusor, ken nakasaganada a mangsango kadagiti karit ti biag. Iti sagrado a nagan ni Jesucristo, amen.