Naati Aine aika a Tangiraki

Iroun Bonnie H. Cordon

Beretitenti ni Kabuta n te Bootaki n Ataeinnaine

Te moan, n nuukan bwaai ni kabane ake ti karaoi n te Bootaki n Ataeinnaine bon nanora ni kan buokiko ni karekea am onimaki ae aki bwaka iroun te Uea Iesu Kristo.

Tariu aika kam tangiraki, ai kakukureira raonakimi! Ti kakoauai rokon kaotioti are e karababai maiura n tamnei ao ma ni kakukurei.

Ngkai ti waaki, N na kabwarabwarai nakoimi tabeman rao; bon ataeinaine aika a onoti n aia tarena, ni kateia, ao n aroia n onoti ao n aia utu. Ngaiia n tatabemaniia, n ai aekakimi, kam riinga nanou.

Te moan, kaitibo ma Bella. E teimatoa ni korakora ngkai bon tii ngaia te ataeinaine n ana mwaanga i Iceland.

Kaitibo ma Josephine ae kakaonimaki mai Aberika, ae e a manga motinnanoia bwa e na kamatebwaia ana Boki Moomon ni katoa bong. E kunea te mwaaka ao taian kakabwaia ake a roko man te mwakuri ae bebete aei, te mwakuri ni kakaonimaki.

Ao te kabane, kaitibo ma Ashtyn, te ataeinaine ae rianako arona are e a mate imwiin onoua te ririki ni buakanakin te aoraki ae te kaentia. Ana koaua ibukin ana Mwakuri ni Kamaiu Iesu Kristo e teimatoa n okioki i nanou.

Ngkami ni kabane bon ataeinaine aika kam kakateke. Kam onoti, ma ami bwaintituaraoi ao ami taneiai ma ti te arona ni kawai aika a kakaawaki ao n akea tokiia.

Bon naati aine ngkami n tamnei irouia ara Karo ake i Karawa, ao akea te bwai ae kona ni karaurei ngkami man Aia tangira ao ana tangira ami Tia Kamaiu.¹ Ngkai ko kaaniaki riki ma Ngaia, e ngae ngke ko toua te moan mwaneka ni waaki nako, ko kunea te rau ae teimatoa are e maeka inanom ngkai bon ngkoe ana reirei ae kakaonimaki ara Tia Kamaiu, Iesu Kristo.

Beretitenti Russell M. Nelson, ara burabeti ae tangiraki, e butia bwa N na tibwauai tabeua bitaki ake a na buokiko ni “karikirakea [am] konabwai ae onoti man tabu”² ao ni karikirakea am anainano ae raoiroi. N na maroroakin aua tein te bitaki n te tairiki aei.

Te Botoniango ibukiia Ataeinnaine

Te moan, n nuukan bwaai ni kabane ake ti karaoi n te Bootaki n Ataeinnaine bon nanora ni kan buokko ni karekea am onimaki ae aki bwaka iroun te Uea Iesu Kristo³ ao te atatai ae koaua ni kinakim mai karawa ngkai te nati te aine iroun te Atua.

N te tairiki aei, I kan katanoata te kauring nakon ana botoniango te Bootaki n Ataeinnaine. I tataro bwa kam na namakina te Tamnei ae Raoiroi ni kaotii koauan taeka aikai ngkai I taekina te botoniango ae boou:

Ngai te nati aine ae tatangiraki irouia Kaaro ake i Karawa,⁴ ma rikiu mai karawa ao tokin kawaiu ae akea tokina.⁵

Ngkai ana reirei Iesu Kristo,⁶ I kataia n riki n ai Arona.⁷ I ukoukora ao ni mwakuriia oin au kaotioti⁸ ao ni buokiia tabeman n Arana ae tabu.⁹

N na tei bwa te tia kakoaua ibukin te Atua n taainako ao ni bwaai nako ao n taabo nako.¹⁰

Ngkai I kataia ae N na tau ibukin te karietataaki,¹¹ I kawakina te bwaintituaraoi ibukin te rairannano¹² ao n ukoukora te riki n tamaroa ni katoa bong.¹³ Ma te onimaki,¹⁴ N na kakorakora mweengau ao au utu,¹⁵ ni karaoi ao ni kawakin berita aika tabu,¹⁶ ao ni karekei otenanti¹⁷ ao kakabwaia man te tembora ae tabu.¹⁸

Ataa te bitaki man “ngaira” nakon “Ngai” Koaua aikai a kaineti nakoimi n tatabemani ngkami nako. Ngkoe bon te nati te aine ae tatangiraki irouia ara Karo ake i Karawa. Ngkoe bon ana reirei ni berita ara Tia Kamaiu, Iesu Kristo. I kaoko bwa ko na kamatebwai ao n iangoi taeka aikai. I ataia bwa ngkana ko karaoia, ko na karekea am koaua ibukin koauaia. Ataakin koaua aikai a na biti kawai ake ko kaitarai iai kaangaanga. Ataakin kinaakim ao te kantaninga ibukim e na buokiko ni kaboraoa am kantaninga ma te Tia Kamaiu.

Bon am bwai te rau ao te kairiiraki ngkana ko iriira Iesu Kristo.

Aia Kiraati Kairake n Ataeinnaine

Te kauoua ni bitaki e rooti taian kiraati n te Bootaki n Ataeinnaine. E taku Unimwaane Neal A. Maxwell, “N angiin te tai te bwai ae mwaiti are a kainnanoia aomata bwa a na kamanoaki man angibuakan te maiu bon te tabo are a na kamanoaki iai.”¹⁹ Ara kiraati a na riki bwa bwaai ni katantan man taian angibuaka, taabo aika a kamanoaki raoi ibukin te tangira ao ni kawakinaki iai. Inanon te kekeiaki ni katea ni kakorakora te katiteuanaaki, ni kakorakora te aro n iraorao, ao ni karikirakea te namakin ae ko riki bwa kaain te Bootaki n Ataeinnaine, iai tabeua bitaki aika ti karaoi nakon rabwatan te kiraati.

N ae riaon riki tebubua te ririki, te bootaki n ataeinaine e a tia n tibwatibwaaki nakon teniua te kiraati. Waakinana n te tai ae waekoa, ti kaoiia taan kairiiri n te Bootaki n Ataeinnaine ao bitiobi bwa a na tataromwaaka n iangoi kainnanoia ataeinaine nako ao ni barongaiia nakon are e kainanoaki ni karaoaki n te uoote. Aikai tabeua katooto bwa e kanga aron taraakina.

• Ngkana ti tabeman ataeinnaine, ko kona ni karekea teuana te kiraatiI ibukiia Ataeinnaine ao n ikotaki ni kabane.

• Ngkana e korakora mwaitiia ataeinnaine n te ririki ae 12 ao te kurubu ae uarereke ibukiia ataeinnaine ake a ikawai riki. Baireia bwa ko na karaoa uoua te kiraati: Ataeinnaine ae 12 te ririki ao Ataeinnaine ae 13–18 te ririki.

• Ke ngkana arona bwa e bubura am uoote ma 60 ataeinnaine aika a roroko, ko na karaoa onoua te kiraati, teuana ibukin aia ririki, ae barongaki n te ririki.

E ngae ngkana e barongaaki am kiraati, ngkami ataeinnaine kam kakaawaki ni katean te katiteuanaaki. Ko na riki bwa te oota nakoia kaain rarikim. Ko na riki bwa moanibwai n tangiraki ao n tararuaki ae ko na kantaningia ni karekea mai irouia tabeman. N am tataro inanom, reitinako kaota te akoi ao n riki bwa te anainano ibukin te raoiroi. Ngkana ko karaoia, e na kaonaki maium n te akoi. Ko na karekei namakin aika a raraoi nakoia tabeman ao ni boon mwiina ko na moanna n noora tamaroaia.

Aran Aia Kiraati Ataeinnaine

Te kateniua, ni barongaakin te kiraati ae boou aei, taian kiraati ni kabane a aranaki man katiteuanaakin te ara ibukiia “Ataeinnaine.”²⁰ Ti toki man kabonganaan te ara ae “Biiaiwe,” “Mwaea Meite,” ao te ”Raurere.”

Kakorakorakiia Beretitentii n te Kiraati

Te kabanea ni bwai ae I kan maroroakinna bon kakawakiia beretitentii n te kiraati. E aki kakawaki bwa aekakira aron barongaakin taian kiraati ibukiia Ataeinnaine, e riai n iai te beretitentii n taian kiraati nako!²¹ Bon te banna mai karawa bwa a weteaki kairake n ataeinnaine bwa a na kairiiri inanon aia tai ni kairake.

Tabeia ao oin bukin te beretitentii n te kiraati e a tia ni kakorakoraaki ao n rangi ni mataata kabwarabwaraakina. Te mwakuri ni kamaiu bon teuana mai buakon katabeaki ae kakaawaki, ai moarara riki n te mwakuri n ibuobuoki, te mwakuri ni mitinare, te mwakurii ni kamarurung, ao te mwakuri n te tembora ao rongorongon te utu.²² Aei arora ni bobota Iteraera²³—te mwakuri ae mimitong ibukiia ni kabane ataeinaine ngkai kaain ana taanga n roronrikirake te Uea.

N aron waakin nako te Ekaretia, te Uea e weteiia beretitentii bwa a na kairiia Ana aomata. Ataeinnaine, n riki bwa te beretitentii n te kiraati bon am moan tai n ira waakin te banna ni kairiiri aei. Taan kairiiri aika a ikawai, karaoa nakoami ae te beretitentii n te kiraati bwa ami moanibwai ao ngkanne kairiia ni mena irarikiia, n reireiniia ao ni kairiiria bwa a aonga n tokanikai.²⁴ E aki kakawaki aekakira aron aia taneiai kaain te beretitentii n te kiraati, waaki n are a waaki mai iai ao buokiia ni karikirakea aia konabwai ao aia onimaki are e na kakabwaiaiia ngkai bon taan kairiiri. Kanii ngkami ma ngaiia, ma tai tautaekani aroia. E na kairiko te Tamnei ae Raoiroi ngkai ko kairiia.

Ni kamataata tabeia ae kakaawaki kaaro ao taan kairiiri ngkai ngaiia taan reirei, n na karaki nakoimi. E weteaki Chloe bwa e na beku bwa te beretitenti n te kiraati. Ana tia kairiiri n te nakoanibonga ae wanawana e kaunga nanona bwa e na ukoukora ana ibuobuoki te Uea n anga ana ara ibukin ana beretitentii. E tataro Chloe ao ni karekea te kairi bwa antai ae e na anga arana bwa ana kauntira nakon ae na kabaititiia. Ngkai e teimatoa n iango ao n tataroakina ana tia koroboki, e anaaki nanona iroun te Tamnei nakon te ataeinnaine are e kubanako irouna—temanna ae burenibwai rorokona n te taromauri ke waaki ni kakukurei.

N namakina te aki mweengaraoi n ana kairi te tamnei, e taetae Chloe ma tinana, are e kabwarabwara bwa teuana te kawai ae ti kona ni karekea iai te kaotioti bon rinanon iango aika a teimatoa. Ma ana onimaki ae kaboouaki, e namakinna Chloe bwa e riai n anga aran te ataeinnaine aei. E anga te wewete te bitiobi, ao e butimwaeia te ataeinnaine aei. Imwiin kamatoakina, e taku te tia koroboki ae kakateke aei, “Ko ataia, I aki te roko n namakinna bwa iai te tabo ibukiu, ke ni kainnanoaki n taabo nako. Akea au namakin ae I tau nako iai. Ma n te wewete aei, I namakinna bwa iai ana kantaninga te Uea ao te tabo ibukiu.” Ngke a kitana te bootaki Chloe ao tinana, e rairaki n taraa tinana Chloe ao e taku, ma matana aika ranran, “E koaua te kaotioti! E mwakuri te kaotioti!”

Beretitentii n te kiraati, kam a tia ni weteaki ao n onimakinaki ni kaira te kurubu ibukiia Natina aine. “E kinako te Uea. … E rineiko.”²⁵ Ko a tia ni kamatoaaki iroun temanna ae iai kariaiakana n te nakoanibonga; nanon aei bwa ngkai ko karaoi tabem n nakoam, ko kamwakura ana kariaia te nakoanibonga. Iai am mwakuri ae kakaawaki ae ko na karaoia. Bwaina te kanamakin ao mwakuri iaon ana wirikiriki te Tamnei ae Raoiroi. Ngkana ko karaoia, ko kona ni beku ma te onimaki, bwa ko aki beku n tii ngkoe!

Beretitenti n te kiraati, ti kainnanoa wanawanami, bwanaami, ao korakorami iaon te kauntira ae boou ibukin te roronrikirake n te uoote are e katanoataaki n te bong aei iroun Unimwaane Quentin L. Cook. Ngkoe te mwakoro ae kakaawaki ni katokan kainnanoia tarim ao mwaanem.²⁶

Bitaki aikai inanon bootakin te kiraati ao n nakoa ni kairiiri a na waakinaki n te tai are ngkana a tauraoi uoote ao mwaanga ma a riai ni mwakuriaki man Tianuare 1, 2020.

Tariu aika a tangiraki, I kaota au koaua bwa bitaki aikai aika I taekin n te bong aei bon kaetieti aika a roko mairoun te Uea. Ngkana ti kakaonimaki ni karin bitaki aikai, ti bia aki mwaninga ara kantaninga: ni kakorakorai ara nanomwaaka n iriira Iesu Kristo ao ni buokiia aomata n nakomai Nakoina. I kakoaua bwa aei Ana Ekaretia. I kakaitau ngkai E kariaira bwa ngaira mwakoron Ana mwakuri ae kakaawaki ao n tabu.

I tataro bwa te Tamnei naba anne e na kairii bitaki aikai ni kairiko ngkai ko waaki nako ni kawain te berita. I kakoaua n aran Iesu Kristo, amen.

Bwaai aika a na taraaki

1. Taraa I-Rom 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Riaona, Nob. 2019, iaon kawaina n roko te iteraniba.

3. Taraa Taeka n Rabakau 3:5–7; Iakobwa 7:5.

4. Taraa I-Rom 8:16–17; Reirei ao Berita aika Tabu 76:24; “Te Utu: Te Katanoata nakon te Aonaaba,” Riaona, Meei 2017, 145.

5. Taraa 2 Betero 1:3–4; Aramwa 37:44; Reirei ao Berita aika Tabu 78:18; “Te Utu: Te Katanoata nakon te Aonaaba.”

6. Taraa Ioane 13:14–15, 35.

7. Taraa Mataio 22:37–39; 25:40; 3 Nibwaai 12:48.

8. Taraa Ioane 16:13; 3 Nibwaai 14:7–8; Moronaai 7:13; 10:5; Reirei ao Berita aika Tabu 8:2; 9:8; 11:13.

9. Taraa Mataio 20:26–28; 22:37–39; 25:34–40; 3 Nibwaai 26:19.

10. Taraa Itaia 43:10; Mote 18:9; Reirei ao Berita aika Tabu 14:8.

11. Taraa I-Rom 8:17; 2 Nibwaai 9:18; 31:20; Reirei ao Berita aika Tabub84:38; 132:49; Mote 1:39.

12. Taraa Ereman 12:23; Moronaai 10:33; Reirei ao Berita aika Tabu 58:42.

13. Taraa Aramwa 34:33; Reirei ao Berita aika Tabu 82:18.

14. Taraa Ebera 11; 2 Nibwaai 31:19–20; Aramwa 32:21.

15. Taraa Iotua 24:15; Reirei ao Berita aika Tabu 109:8; 132:19.

16. Taraa Te Otinako 19:5; 1 Nibwaai 14:14; 2 Nibwaai 11:5; Reirei ao Berita aika Tabu 54:6; 66:2; 90:24.

17. Taraa Motiaea 13:30; Aramwa 30:3; Reirei ao Berita aika Tabu 84:20–22; Taekan te Onimaki 1:3.

18. Taraa Taian Areru 24:3; Itaia 2:3; Etekiera 37:26.

19. Neal A. Maxwell, All These Things Shall Give Thee Experience (1979), 55.

20. Kiraati a riai n aranaki mankatiteuanaakin te ara ae “Kairake n Ataeinnaine.” Ibukin kinaakin te kiraati ae onoti, n raonaki ma te ririki—n aron te katooto, “Kairake n Ataeinnaine 12–14”; “Kairake n Ataeinnaine 15–18” (taraa Aeniboki 2: Babairean Aron Kairan te Ekaretia, 10.1.5, ChurchofJesusChrist.org).

21. Te beretitentii n te kiraati e aki toki ni weteaki ibukin aia kiraati Ataeinnaine n tatabeua nako. Ngkana e knaa, te beretitentii ae bwanin kaaina, a riai ni weteaki ma te beretitenti, uoman kauntira, ao te tia koroboki. Ngkana e kainnanoaki, e na weteaki te beretitentii ae aki bwanin kaaina (taraa Aeniboki 2, 10.3.5).

22. Taraa Aeniboki 2, 10.3.5.

23. Taraa Russell M. Nelson, “Hope of Israel” (te bootaki n taromauri ibukiia te roronrikirake n te aonaaba, Tuun 3, 2018), HopeOfIsrael.ChurchofJesusChrist.org.

24. Rakan kaetiteti a tauraoi ibukiia taan kairiiri ibukiia Ataeinnaine aika a ikawai inanon Aeniboki 2, mwakoro 10.

25. Henry B. Eyring, “Rise to Your Call,” Riaona, Nob. 2002, 76.

26. Ngkana arona bwa tii teuana am kiraati ao teuana te beretitentii n am kiraati, te beretitentii ae bwanin kaaina a kona n ira te kauntira ni marooro ibukiia te roronrikirake n te uoote ma beretitenti n te kooram n te nakoanibonga ae te Aaron bwa e aonga n iai te booraoi irouia Ataeinnaine ao ataeinimwaane (taraa Aeniboki 2, 18.2.9).