សារលិខិតបើក
យើងព្យាយាមគ្រប់វិធីតាមដែលយើងអាចធ្វើទៅបាន ដើម្បីស្ដាប់ព្រះយេស៊ូវគ្រីស្ទ ដែលមានបន្ទូលមកកាន់យើងតាមរយៈព្រះចេស្ដា និងការងារបម្រើនៃព្រះវិញ្ញាណបរិសុទ្ធ ។
បងប្អូនប្រុសស្រីជាទីស្រឡាញ់ នៅពេលយើងស្វាគមន៍បងប្អូនមកកាន់សន្និសីទទូទៅខែមេសា ឆ្នាំ ២០២០ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជាប្រវត្តិសាស្ត្រនេះ ខ្ញុំឈរនៅខាងមុខវិសាលដ្ឋានដែលគ្មានមនុស្ស ដោយសារមូលហេតុអ្វី បងប្អូនដឹងហើយ !
ខ្ញុំមិនសូវដឹងទេថា នៅពេលខ្ញុំបានសន្យានឹងបងប្អូននៅសន្និសីទទូទៅខែតុលា ឆ្នាំ ២០១៩ ថាសន្និសីទខែមេសានេះ នឹងជា « រឿងគួរឲ្យចងចាំ » និង « មិនអាចបំភ្លេចបាន » គឺខ្ញុំកំពុងនិយាយទៅកាន់អ្នកស្ដាប់ដែលមើលឃើញមានចំនួនតិចជាង ១០ នាក់ដែលនឹងធ្វើឲ្យសន្និសីទនេះជារឿងគួរឲ្យចងចាំបំផុត និងមិនអាចបំភ្លេចបាន ចំពោះខ្ញុំនោះ ! ប៉ុន្តែខ្ញុំបានដឹងថា បងប្អូនកំពុងចូលរួមតាមការចម្លងអេឡិចត្រូនិច និងភ្លេងដ៏ពិរោះរបស់ក្រុមចម្រៀនូវបទ « “It Is Well with My Soul, » នាំមកនូវការលួងលោមចិត្តដ៏អស្ចារ្យចំពោះព្រលឹង ខ្ញុំ ។
ដូចបងប្អូនដឹងហើយថា ការចូលរួមនៅក្នុងសន្និសីទទូទៅនេះ មានការដាក់កំហិតយ៉ាងតឹងរឹងក្នុងគោលបំណងធ្វើជាពលរដ្ឋល្អជាសាកល និងធ្វើអ្វីៗដែលយើងអាចធ្វើបានដើម្បីទប់ស្កាត់ការរីករាលដាល កូវីដ -១៩ ។ វីរុសនេះ មានឥទ្ធិពលដ៏ខ្លាំងក្លាមួយទូទាំងពិភពលោក ។ វាក៏បានការផ្លាស់ប្ដូរជាបណ្ដោះអាសន្នផងដែរចំពោះការប្រជុំក្នុងសាសនាចក្រ ការបម្រើផ្សព្វផ្សាយសាសនា និងកិច្ចការព្រះវិហារបរិសុទ្ធរបស់យើងផងដែរ ។
ការដាក់កំហិតសព្វថ្ងៃនេះ ទាក់ទងទៅនឹងវីរុសដ៏សាហាវមួយ ជាការសាកល្បងផ្ទាល់ខ្លួននៃជីវិតដែលមានហួសពីការរាតត្បាតនេះ ។ ការសាកល្បងនាពេលអនាគតអាចកើតចេញមកពីឧប្បទ្ទវហេតុមួយ គ្រោះធម្មជាតិ ឬការឈឺចាប់ផ្ទាល់ខ្លួនដែលពុំរំពឹងទុក ។
តើយើងអាចស៊ូទ្រាំនឹងការសាកល្បងដូច្នេះយ៉ាងដូចម្ដេច ? ព្រះអម្ចាស់បានមានបន្ទូលដល់យើងថា « បើសិនជាអ្នករាល់គ្នាបានប្រុងប្រៀបទុកជាស្រេច នោះអ្នករាល់គ្នានឹងមិនត្រូវខ្លាចឡើយ » ។១ ប្រាកដណាស់ ខាងសាច់ឈាម យើងអាចស្ដុកទុកអាហារ ទឹក និងការសន្សំសំចៃផ្ទាលខ្លួន ។ ប៉ុន្តែសំខាន់ដូចគ្នានេះផងដែរ គឺតម្រូវការរបស់យើងដើម្បីបំពេញឃ្លាំងខាងវិញ្ញាណ ផ្ទាល់ខ្លួនរបស់យើងដោយសេចក្ដីជំនឿ សេចក្ដីពិត និងទីបន្ទាល់ ។
ចុងបញ្ចប់នៃដំណើររបស់យើង គឺរៀបចំខ្លួនដើម្បីទៅជួបនឹងព្រះរបស់យើង ។ យើងធ្វើដូចនេះបានតាមរយៈការព្យាយាមប្រែក្លាយដូចជាព្រះអង្គសង្គ្រោះរបស់យើង ព្រះយេស៊ូវគ្រីស្ទកាន់តែខ្លាំង ។២ យើងធ្វើដូច្នោះនៅពេលយើងប្រែចិត្តប្រចាំថ្ងៃ ហើយទទួលបានការសម្អាតការព្យាបាល និងអំណាចពង្រឹងរបស់ទ្រង់ ។ បន្ទាប់មក យើងអាចមានអារម្មណ៍ភាពសុខសាន្ដ និងអំណរយូរអង្វែង ទោះជានៅគ្រាចលាចលក្ដី ។ នេះជាមូលហេតុដែលព្រះអម្ចាស់អង្វរឲ្យយើងឈរនៅក្នុងទីបរិសុទ្ធ និង« កុំរើឡើយ » ។៣
ឆ្នាំនេះ យើងប្រារព្ធខួបលើកទី ២០០ ឆ្នាំ នៃព្រឹត្តការណ៍ដ៏សំខាន់បំផុតមួយនៅក្នុងប្រវត្តិសាស្ត្រនៃពិភពលោក — គឺការលេចមករបស់ព្រះជាព្រះបិតា និងព្រះរាជបុត្រាសំណព្វរបស់ទ្រង់ គឺព្រះយេស៊ូវគ្រីស្ទចំពោះយ៉ូសែប ស្ម៊ីធ ។ អំឡុងការនិមិត្តតែមួយគត់នេះ ព្រះជាព្រះបិតាបានចង្អុលទៅកាន់ព្រះយេស៊ូវគ្រីស្ទ រួចមានបន្ទូលថា « នេះ គឺជាបុត្រសំណព្វរបស់យើង ។ ចូរស្តាប់តាមទ្រង់ចុះ ! »៤
ការដាស់តឿនដែលប្រទានឲ្យដល់យ៉ូសែប គឺសម្រាប់យើងម្នាក់ៗ ។ យើងព្យាយាមគ្រប់វិធីតាមដែលយើងអាចធ្វើទៅបាន ដើម្បីស្ដាប់ព្រះយេស៊ូវគ្រីស្ទ ដែលមានបន្ទូលមកកាន់យើងតាមរយៈព្រះចេស្ដា និងការងារបម្រើនៃព្រះវិញ្ញាណបរិសុទ្ធ ។
គោលបំណងនៃសន្និសីទទូទៅនេះ និងសន្និសីទទូទៅទាំងអស់ គឺដើម្បីជួយយើងស្ដាប់ទ្រង់ ។ យើងបានអធិស្ឋាន និងបានអញ្ជើញបងប្អូនឲ្យអធិស្ឋាន ថាព្រះវិញ្ញាណនៃព្រះអម្ចាស់ នឹងគង់នៅនឹងយើងយ៉ាងបរិបូរណ៍ ដើម្បីបងប្អូនអាចស្ដាប់ឮសារលិខិត ដែលព្រះអង្គសង្គ្រោះមានជាពិសេសសម្រាប់បងប្អូន— ជាសារលិខិតដែលនឹងនាំភាពសុខសាន្ដមកកាន់ព្រលឹងបងប្អូន ។ សារលិខិតដែលនឹងព្យាបាលរបួសដួងចិត្តបងប្អូន ។ សារលិខិតដែលនឹងបំភ្លឺគំនិតរបស់បងប្អូន ។ សារលិខិតដែលនឹងជួយបងប្អូនដឹងនូវអ្វីដែលត្រូវធ្វើ នៅពេលបងប្អូនឆ្លងកាត់គ្រាចលាចល និងការសាកល្បងក្នុងពេលនេះ និងពេលអនាគត ។
យើងអធិស្ឋានសូមឲ្យសន្និសីទនេះ នឹងជារឿងគួរឲ្យចងចាំ និងមិនអាចបំភ្លេចបាន ដោយសារតែសារលិខិតដែលបងប្អូននឹងស្ដាប់ឮ ការប្រកាសពិសេស ដែលនឹងធ្វើឡើង និងបទពិសោធន៍នានាដែលបងប្អូននឹងត្រូវបានអញ្ជើញឲ្យចូលរួម ។
ឧទាហរណ៍ នៅចុងបញ្ចប់នៃសម័យប្រជុំព្រឹកថ្ងៃអាទិត្យនេះ យើងនឹងកោះប្រជុំទូទាំងពិភពលោកជាឧឡារិក នៅពេលខ្ញុំដឹកនាំបងប្អូនឲ្យស្រែកហូសាណាដ៏ពិសិដ្ឋ ។ យើងអធិស្ឋានសូមឲ្យរឿងនេះ នឹងជាចំណុចសំខាន់ខាងវិញ្ញាណសម្រាប់បងប្អូន នៅពេលយើងបន្លឺសំឡេងព្រមគ្នានៅទូទាំងពិភពលោកថ្លែងអំណរគុណដល់ព្រះជាព្រះបិតារបស់យើង និងព្រះរាជបុត្រាសំណព្វរបស់ទ្រង់ដោយការសរសើរដល់ពួកទ្រង់តាមរបៀបដ៏ពិសេសនេះ ។
សម្រាប់បទពិសោធន៍ដ៏ពិសិដ្ឋនេះ យើងប្រើកូនកន្សែងពណ៌ស ។ ប៉ុន្តែបើបងប្អូនពុំមានទេ បងប្អូនអាចក្រវីដៃក៏បាន ។ នៅចុងបញ្ចប់នៃការស្រែកហូសាណា ក្រុមជំនុំនឹងចូលរួមច្រៀងនឹងក្រុមចម្រៀងដោយបទ « ព្រះវិញ្ញាណនៃព្រះ » ។៥
បងប្អូនប្រុសស្រីជាទីស្រឡាញ់របស់ខ្ញុំ សន្និសីទនេះ នឹងអស្ចារ្យ ។ ឆ្នាំនេះនឹងជាឆ្នាំដ៏អស្ចារ្យ នៅពេលយើងផ្ដោតយ៉ាងខ្លាំងទៅលើព្រះអង្គសង្គ្រោះ និងដំណឹងល្អដែលបានស្ដារឡើងវិញរបស់ទ្រង់ ។ ឥទ្ធិពលយូរអង្វែងដ៏សំខាន់នៃសន្និសីទជាប្រវត្តិសាស្ត្រនេះ នឹងធ្វើឲ្យដួងចិត្តយើងផ្លាស់ប្ដូរ ហើយយើងចាប់ផ្ដើមស្វែងស្ដាប់ទ្រង់ពេញមួយជីវិត ។
សូមស្វាគមន៍មកកាន់សន្និសីទទូទៅខែមេសា ឆ្នាំ ២០២០ ! ខ្ញុំដឹងថាព្រះជាព្រះវរបិតាសួគ៌របស់យើង និងព្រះរាជបុត្រាទ្រង់ ព្រះយេស៊ូវគ្រីស្ទ គឺទ្រង់ព្រះញាណដឹងអំពីពួកយើង ។ ពួកទ្រង់នឹងគង់នៅនឹងយើងនៅពេញថ្ងៃដ៍រុងរឿងទាំងពីរនេះ នៅពេលយើងព្យាយាមខិតកាន់តែជិតនឹងពួកទ្រង់ ហើយគោរពទ្រង់ ។ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕