ចូរស្តាប់តាមទ្រង់ចុះ
ព្រះវរបិតាយើងដឹងថានៅពេលយើងត្រូវបានហ៊ុំព័ទ្ធដោយភាពមិនប្រាកដប្រជា និងភាពភ័យខ្លាច តើអ្វីនឹងជួយយើងបំផុតដើម្បីស្ដាប់ព្រះរាជបុត្រាទ្រង់ ។
បងប្អូនប្រុសស្រីជាទីស្រឡាញ់ ខ្ញុំមានអំណរគុណណាស់ តាមរយៈការប្រើបច្ចេកវិទ្យា ដែលយើងមានដែលអាចជួបជុំគ្នាដើម្បីថ្វាយបង្គំនៅព្រឹកថ្ងៃអាទិត្យនេះ ។ យើងមានពរដើម្បីដឹងថាដំណឹងល្អនៃព្រះយេស៊ូវគ្រីស្ទត្រូវបានស្ដារឡើងវិញនៅលើផែនដី !
កាលពីជាច្រើនសប្ដាហ៍មុន យើងភាគច្រើនបានជួបបទពិសោធន៍ការរំខានក្នុងជីវិតផ្ទាល់ខ្លួនរបស់យើង ។ ការរញ្ជួយដី ភ្លើងឆេះព្រៃ ទឹកជំនន់ គ្រោះចង្រៃ និងផលវិបាកវាបានរំខានដល់ទម្លាប់ប្រចាំថ្ងៃ និងបណ្ដាលឲ្យមានការខ្វះអាហារ ផលិតផល និងការសន្សំសំចៃ ។
នៅកណ្ដាលរឿងទាំងអស់នេះ យើងសូមសរសើរ និងអរគុណចំពោះបងប្អូនដែលជ្រើសរើសស្ដាប់ព្រះបន្ទូលព្រះអម្ចាស់ អំឡុងគ្រាចលាចលនេះ ដោយការចូលរួមនឹងពួកយើងនៅក្នុងសន្និសីទទូទៅ ។ ភាពងងឹតកាន់តែច្រើនដែលកើតមានមកជាមួយនឹងការឈឺចាប់ដ៏ខ្លាំង ធ្វើឲ្យពន្លឺនៃព្រះយេស៊ូវគ្រីស្ទភ្លឺកាន់តែចែងចាំង ។ ចូរគិតអំពីសេចក្ដីល្អដែលយើងម្នាក់ៗអាចធ្វើអំឡុងគ្រានៃចលាចលជាសាកលនេះ ។ សេចក្ដីស្រឡាញ់ និងជំនឿរបស់បងប្អូនទៅលើព្រះអង្គសង្គ្រោះអាចនឹងឆាប់ធ្វើឲ្យនរណាម្នាក់ចង់ស្វែងរកការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ។
នៅកាលពីរឆ្នាំមុន ស៊ិស្ទើរ ណិលសុន និងខ្ញុំ បានជួបនឹងបងប្អូនរាប់ពាន់នាក់នៅជុំវិញពិភពលោក ។ យើងបានជួបប្រជុំនឹងបងប្អូននៅវេទិកាក្រៅអគារ និងនៅក្នុងបន្ទប់ប្រជុំក្នុងសណ្ឋាគារ ។ នៅក្នុងទីតាំងនីមួយៗ ខ្ញុំមានអារម្មណ៍ថា ខ្ញុំនៅក្នុងវត្តមានរបស់មនុស្សជម្រើសរបស់ព្រះអម្ចាស់ ហើយខ្ញុំកំពុងមើលឃើញការប្រមូលផ្ដុំអ៊ីស្រាអែលបានកើតឡើងនៅចំពោះមុខខ្ញុំ ។
យើងរស់នៅក្នុងជំនាន់នោះ ដែល « ពួកដូនតារបស់យើងបានទន្ទឹងចាំដោយអន្ទះសារ » ។១ យើងនៅកៅអីជួរមុខធ្វើជា សាក្សីនៅរស់អំពីអ្វីដែលព្យាការី នីហ្វៃបានមើលឃើញ តែនៅក្នុងការនិមិត្ត ថាព្រះចេស្ដានៃកូនចៀមនៃព្រះបានយាងចុះមក « សណ្ឋិតលើពួកបរិសុទ្ធក្នុងសាសនាចក្រនៃកូនចៀម ហើយលើរាស្ត្រដែលនៅក្នុងសេចក្ដីសញ្ញានៃព្រះអម្ចាស់ដែលបានខ្ចាត់ខ្ចាយពាសពេញលើផ្ទៃផែនដី ហើយពួកគេប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះដោយសិរីល្អដ៏អស្ចារ្យ » ។២
បងប្អូនប្រុសស្រីរបស់ខ្ញុំ បងប្អូន គឺនៅក្នុងចំណោមបុរស ស្ត្រី និងកុមារទាំងឡាយដែលនីហ្វៃបានមើលឃើញនោះ ។ ចូរគិតអំពីរឿងនេះ !
មិនថាបងប្អូនរស់នៅកន្លែងណា ឬស្ថានភាពបងប្អូនយ៉ាងណាទេ ព្រះអម្ចាស់ ព្រះយេស៊ូវគ្រីស្ទគឺជាព្រះអង្គសង្គ្រោះ របស់បងប្អូនហើយព្យាការី របស់ព្រះ យ៉ូសែប ស្ម៊ីធ គឺជា ព្យាការី របស់បងប្អូន ។ ទ្រង់ត្រូវបានតែងតាំងជាមុនពីមុនគ្រឹះនៃផែនដីនេះដើម្បីធ្វើជាព្យាការីនៃគ្រាកាន់កាប់ត្រួតត្រាចុងក្រោយនេះ ជាពេលដែល « គ្មានអ្វីណាមួយត្រូវរក្សាទុក » ៣ពី ពួកបរិសុទ្ធនោះឡើយ ។ វិវរណៈបន្ដចាក់ស្រោចមកពីព្រះអម្ចាស់អំឡុងដំណើរការបន្ដបន្ទាប់នៃការស្ដារឡើងវិញនេះ ។
តើដំណឹងល្អនៃព្រះយេស៊ូវគ្រីស្ទត្រូវបានស្ដារឡើងវិញនៅលើផែនដី មានអត្ថន័យយ៉ាងណាចំពោះបងប្អូន ?
វាមានន័យថា បងប្អូន និងគ្រួសារបងប្អូនអាចត្រូវបានផ្សារភ្ជាប់ជាមួយគ្នាជានិរន្ដរ៍ ! វាមានន័យថា ដោយសារតែបងប្អូនបានទទួលបុណ្យជ្រមុជទឹកដោយមនុស្សម្នាក់ដែលមានសិទ្ធិអំណាចមកពីព្រះយេស៊ូវគ្រីស្ទ ហើយបានបញ្ជាក់ជាសមាជិកនៃសាសនាចក្ររបស់ទ្រង់ នោះបងប្អូនអាចរីករាយនឹងភាពជាដៃគូនៃព្រះវិញ្ញាណបរិសុទ្ធដ៏ខ្ជាប់ខ្ជួន ។ ទ្រង់នឹងដឹកនាំ ហើយការពារបងប្អូន » ។ វាមានន័យថាបងប្អូននឹងមិនទុកឲ្យនៅឯកោ ឬពុំអាចទទួលបានព្រះចេស្ដានៃព្រះដើម្បីជួយបងប្អូននោះទេ ។ វាមានន័យថាអំណាចបព្វជិតភាពអាចប្រទានពរដល់បងប្អូន នៅពេលបងប្អូនទទួលពិធីបរិសុទ្ធដ៏សំខាន់ ហើយធ្វើសេចក្ដីសញ្ញាជាមួយព្រះ ហើយរក្សាសេចក្ដីសញ្ញានោះ។ ឱ សេចក្ដីពិតទាំងនេះគឺជាយុថ្កានៃព្រលឹងរបស់យើង ជាពិសេសអំឡុងគ្រាដែលមានព្យុះបោកបក់យ៉ាងខ្លាំងនេះ ។
ព្រះគម្ពីរមរមនសរសេរអំពីការលើកឡើង និងការធ្លាក់ចុះនៃអារ្យធម៌ធំពីរ ។ ប្រវត្តិនៃអារ្យធម៌ធំពីរនោះ បង្ហាញថាវាងាយស្រួលយ៉ាងណាដែល ធ្វើឲ្យមនុស្សភាគច្រើនភ្លេចព្រះ បដិសេធការព្រមានពីពួកព្យាការី របស់ព្រះ ហើយស្វែងរកអំណាច ប្រជាប្រិយភាព និងភាពសប្បាយខាងសាច់ឈាម ។ ៤ ជាថ្មីម្ដងទៀតពួកព្យាការីពីមុនបានប្រកាសថា « ការណ៍ដ៏ធំ ហើយអស្ចារ្យដល់ប្រជាជន ដែលពួកគេពុំជឿសោះ » ។៥
វាពុំខុសពីជំនាន់របស់យើងទេ ។ អស់ជាច្រើនឆ្នាំ ការណ៍ដ៏ធំ ហើយអស្ចារ្យ ត្រូវបានស្ដាប់ឮមកពីវេទិកាដែលបានឧទ្ទិសឆ្លងនៅទូទាំងផែនដី ។ ប៉ុន្ដែមនុស្សភាគច្រើន ពុំ ក្រសោបយកសេចក្ដីពិតទាំងនេះទេ — ទោះជាដោយសារពួកគេមិនដឹងកន្លែងណាដែលត្រូវស្វែងរក ៦ ឬដោយសារពួកគេកំពុងស្ដាប់ដល់អ្នកទាំងឡាយដែលពុំមានសេចក្ដីពិតពេញលេញ ឬដោយសារពួកគេបានបដិសេធសេចក្ដីពិតដោយសាររត់តាមលោកិយ ។
ពួកមារសត្រូវឆ្លាតវៃណាស់ ។ សម្រាប់សហសវត្សរ៍ វាធ្វើឲ្យសេចក្ដីល្អមើលទៅជាអាក្រក់ ហើយសេចក្ដីអាក្រក់ទៅជាល្អ ។៧ សាររបស់វាកាន់តែឮ មុតមាំ និងអំនួត ។
ទោះជាយ៉ាងណា សារលិខិតមកពីព្រះវរបិតាសួគ៌យើង គឺខុសគ្នាខ្លាំង ។ ទ្រង់ទំនាក់ទំនងដោយសាមញ្ញ ស្ងប់ស្ងាត់ និងច្បាស់លាស់ ដែលយើងមិនអាចយល់ខុសអំពីទ្រង់ ។៨
ឧទាហរណ៍ នៅពេលណាទ្រង់ណែនាំអំពីព្រះរាជបុត្រាសំណព្វរបស់ទ្រង់ទៅកាន់មនុស្សជីវិតរមែងស្លាប់នៅលើផែនដី ទ្រង់បានធ្វើឡើងដោយពាក្យពីរបីម៉ាត់ដែលអស្ចារ្យ ។ នៅលើភ្នំប្រែរូបចំពោះ ពេត្រុស យ៉ាកុប និងយ៉ូហាន ព្រះមានបន្ទូលថា « នេះជាព្រះរាជបុត្រាដ៏ស្ងួនភ្ងារបស់យើង ចូរស្ដាប់តាមទ្រង់ចុះ » ។៩ បន្ទូលរបស់ទ្រង់ទៅកាន់សាសន៍នីហ្វៃនៅបោនទីហ្វុលពីបុរាណ គឺថា « មើលន៏ បុត្រាដ៏ជាទីស្រលាញ់របស់យើង ដែលយើងគាប់ចិត្តណាស់ ដែលបានដំកើងដល់នាមរបស់យើង— ចូរស្ដាប់តាមទ្រង់ចុះ » ។១០ ហើយចំពោះយ៉ូសែប ស្ម៊ីធ នៅក្នុងការប្រកាសដ៏រុងរឿងនោះបានបើកគ្រាកាន់កាប់ត្រួតត្រានេះ ព្រះមានបន្ទូលដោយសាមញ្ញថា « នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្តាប់តាមទ្រង់ចុះ !»១១
ឥឡូវ បងប្អូនប្រុសស្រីជាទីស្រឡាញ់របស់ខ្ញុំ សូមពិចារណាអំពីធាតុពិតដែលឧទាហរណ៍ទាំងបីនេះទើបបានលើកឡើង ពីមុនព្រះបិតាណែនាំអំពីព្រះរាជបុត្រា មនុស្សដែលជាប់ទាក់ទងគឺស្ថិតនៅក្នុងស្ថានភាពភ័យខ្លាច ហើយពេលខ្លះ អស់សង្ឃឹម ។
សាវកភ័យខ្លាចពេលពួកគេមើលឃើញព្រះយេស៊ូវគ្រីស្ទត្រូវបានហ៊ុំព័ទ្ធដោយពពកនៅលើភ្នំប្រែរូប ។
ពួកសាសន៍នីហ្វៃបានភ័យខ្លាចដោយសារពួកគេបានឆ្លងកាត់ការបំផ្លិចបំផ្លាញ និងភាពងងឹតអស់ជាច្រើនថ្ងៃ មកហើយនោះ ។
យ៉ូសែប ស៊្មីធ គឺស្ថិតនៅ ក្នុងក្រញ៉ាំនៃកម្លាំងនៃសេចក្ដីងងឹតមួយពីមុនស្ថានសួគ៌បានបើកឡើង ។
ព្រះវរបិតាយើងដឹងថានៅពេលយើងត្រូវបានហ៊ុំព័ទ្ធដោយភាពមិនប្រាកដប្រជា និងភាពភ័យខ្លាច តើអ្វីនឹងជួយយើងបំផុតដើម្បីស្ដាប់ព្រះរាជបុត្រាទ្រង់ ។
ដោយសារនៅពេលយើងព្យាយាមស្ដាប់—ពិតជាស្ដាប់ឮ— ព្រះរាជបុត្រាទ្រង់ យើងនឹងត្រូវបានដឹកនាំឲ្យដឹងនូវអ្វីដែលត្រូវធ្វើនៅ ក្នុងស្ថានភាព នានា ។
ពាក្យដំបូងនៅក្នុងគោលលទ្ធិ និងសេចក្ដីសញ្ញា គឺ ប្រុងស្ដាប់១២ វាមានន័យថា « ស្ដាប់ដោយបំណងចិត្តគោរពតាម » ។ ១៣ ដើម្បីប្រុងស្ដាប់មានន័យថា « ស្ដាប់ទ្រង់ » — ដើម្បី ឮនូវអ្វីដែលព្រះអង្គសង្គ្រោះមានបន្ទូល បន្ទាប់មក ផ្ទៀងស្ដាប់ដំបូន្មានរបស់ទ្រង់ ។ នៅក្នុងពាក្យទាំងពីរម៉ាត់នេះ— « ស្ដាប់ទ្រង់ » — ព្រះប្រទានលំនាំសម្រាប់ជោគជ័យ សុភមង្គល និងអំណរនៅក្នុងជីវិតនេះ ។ យើងត្រូវ ស្ដាប់ ព្រះបន្ទូលរបស់ព្រះអម្ចាស់ ប្រុងស្ដាប់ ពួកទ្រង់ ហើយ ផ្ទៀងស្ដាប់ អ្វីដែលទ្រង់បានប្រាប់ដល់យើង !
នៅពេលយើងស្វែងរកធ្វើជាសិស្សរបស់ព្រះយេស៊ូវគ្រីស្ទ កិច្ចខិតខំរបស់យើងដើម្បីស្ដាប់ទ្រង់ចាំបាច់ត្រូវមានដោយបំណងចិត្តកាន់តែខ្លាំង ។ វាចំណាយការខិតខំដោយមនសិកា និងខ្ជាប់ខ្ជួនដើម្បីបំពេញជីវិតប្រចាំថ្ងៃរបស់យើងដោយព្រះបន្ទូលរបស់ទ្រង់ ការបង្រៀនរបស់ទ្រង់ និងសេចក្ដីពិតរបស់ទ្រង់ ។
យើងមិនអាចពឹងផ្អែកតែទៅលើព័ត៌មានដែលយើងប្រទះនៅក្នុងប្រព័ន្ធផ្សព្វផ្សាយសង្គមប៉ុណ្ណោះទេ ។ ដោយមាននៅលើអ៊ិនធើរណិតនូវពាក្យរាប់លាន ព្រមទាំងមានពិភពផ្សាយពាណិជ្ជកម្មយ៉ាងច្រើនជ្រាបចូលដោយសំឡេងអ៊ូអរ ជាការខិតខំដ៏អាក្រក់របស់មារសត្រូវ តើយើង អាចទៅស្ដាប់ទ្រង់នៅទីណា ?
យើងអាចទៅរកបទគម្ពីរទាំងឡាយ ។ បទគម្ពីរបង្រៀនយើងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ វិសាលភាពនៃដង្វាយធួនរបស់ទ្រង់ និងផែនការនៃសុភមង្គល និងប្រោសលោះដ៏មហិមារបស់ព្រះវរបិតាយើង ។ ការជ្រមុជទៅក្នុងព្រះបន្ទូលនៃព្រះជាប្រចាំថ្ងៃ គឺសំខាន់សម្រាប់ជីវិតខាងវិញ្ញាណ ជាពិសេសនៅក្នុងគ្រាដែលមានចលាចលកាន់តែខ្លាំងនេះ ។ នៅពេលយើងទទួលទានព្រះបន្ទូលនៃព្រះគ្រីស្ទជាប្រចាំថ្ងៃ ព្រះបន្ទូលនៃព្រះគ្រីស្ទនឹងប្រាប់យើងអំពីរបៀបដើម្បីឆ្លើយតបទៅនឹងការលំបាក ដែលយើងពុំធ្លាប់គិតថាយើងនឹងជួបនោះ ។
យើងក៏អាច ស្ដាប់ទ្រង់នៅក្នុងព្រះវិហារបរិសុទ្ធ ។ ដំណាក់នៃព្រះអម្ចាស់ គឺជា ដំណាក់នៃការរៀនសូត្រ ។ ព្រះអម្ចាស់បង្រៀនតាមរបៀបរបស់ទ្រង់ផ្ទាល់ ។ ពិធីបរិសុទ្ធនីមួយៗបង្រៀនអំពីព្រះអង្គសង្គ្រោះ ។ យើងរៀនអំពីរបៀបដើម្បីញែកវាំងនន ហើយទំនាក់ទំនងកាន់តែច្បាស់ជាមួយនឹងស្ថានសួគ៌ ។ យើងរៀនរបៀបឈ្នះមារសត្រូវ ហើយទាញយកអំណាចបព្វជិតភាពរបស់ព្រះអម្ចាស់មកពង្រឹងយើង និងមនុស្សដែលយើងស្រឡាញ់ ។ យើងម្នាក់ៗគួរតែស្វែងរកជម្រកនៅទីនោះឲ្យកាន់តែខ្លាំង ។
នៅពេលឈប់មានការដាក់កំហិត កូវិត-១៩ ជាបណ្ដោះអាសន្នទាំងនេះ សូមដាក់កាលវិភាគទៅថ្វាយបង្គំ និងបម្រើនៅ ក្នុងព្រះវិហារបរិសុទ្ធជាទៀងទាត់ ។ គ្រប់នាទីនៃគ្រានោះនឹងប្រទានពរបងប្អូន និងគ្រួសារបងប្អូនតាមរបៀបមួយ ដែលគ្មានរបៀបណាទៀតធ្វើបានឡើយ ។ សូមចំណាយពេលដើម្បីពិចារណាអំពីអ្វីដែលបងប្អូនស្ដាប់ឮ ហើយទទួលអារម្មណ៍នៅពេលបងប្អូននៅទីនោះ ។ ទូលសួរព្រះអម្ចាស់ឲ្យបង្រៀនបងប្អូនអំពី របៀបបើកស្ថានសួគ៌សូមពរជ័យក្នុងជីវិតបងប្អូន និងជីវិតមនុស្សដែលបងប្អូនស្រឡាញ់ និងមប្រើ ។
ខណៈដែលការថ្វាយបង្គំនៅក្នុងព្រះវិហារបរិសុទ្ធ ពុំមាននាពេលឥឡូវនេះ ខ្ញុំសូមអញ្ជើញបងប្អូនឲ្យបង្កើនការចូលរួមនៅក្នុងពង្សប្រវត្តិ រួមមានការស្រាវជ្រាវពង្សប្រវត្តិ និងការធ្វើលិបិក្រម ។ ខ្ញុំសូមសន្យាថា នៅពេលបងប្អូនចំណាយពេលច្រើននៅក្នុងព្រះវិហារបរិសុទ្ធ និងកិច្ចការពង្សប្រវត្តិ នោះបងប្អូននឹងចម្រើន និងកែលម្អសមត្ថភាពដើម្បីស្ដាប់ទ្រង់ ។
យើងក៏ ស្ដាប់ទ្រង់កាន់តែច្បាស់ផងដែរ នៅពេលយើងដុសខាត់សមត្ថភាពរបស់យើងដើម្បីស្គាល់ការខ្សឹបប្រាប់នៃព្រះវិញ្ញាណបរិសុទ្ធ ។ វាគ្មានអ្វីចាំបាច់ជាងការស្គាល់របៀបដែលព្រះវិញ្ញាណមានបន្ទូលមកកាន់បងប្អូននាពេលនេះទេ ។ នៅក្នុងក្រុមព្រះ ព្រះវិញ្ញាណបរិសុទ្ធគឺជាអ្នកបញ្ជូនសារ ។ ទ្រង់នឹងនាំគំនិតនានាចូលទៅក្នុងចិត្តដែលព្រះបិតា និងព្រះរាជបុត្រាចង់ឲ្យបងប្អូនទទួល ។ ទ្រង់ ជា អង្គ លួងលោម ចិត្ត ។ ទ្រង់នឹងនាំអារម្មណ៍នៃភាពសុខសាន្ដមកកាន់ដួងចិត្តរបស់បងប្អូន ។ ទ្រង់ថ្លែងទីបន្ទាល់អំពីសេចក្ដីពិត ហើយនឹងបញ្ជាក់នូវអ្វីជាការពិត នៅពេលបងប្អូនស្ដាប់ ហើយអានព្រះបន្ទូលរបស់ព្រះអម្ចាស់ ។
ខ្ញុំសូមធ្វើការអង្វរជាថ្មីទៅកាន់បងប្អូន សូមធ្វើ អ្វីក៏ដោយ ដើម្បីចម្រើនសមត្ថភាពខាងវិញ្ញាណបងប្អូនក្នុងការទទួលវិវរណៈផ្ទាល់ខ្លួន ។
ការធ្វើដូច្នោះនឹងជួយបងប្អូនដឹងរបៀបដើម្បីឆ្ពោះទៅមុខក្នុងជីវិតបងប្អូន អ្វីត្រូវធ្វើអំឡុងគ្រាមានវិបត្តិ និងរបៀបដើម្បីញែកដឹង ហើយចៀសវាងពីការល្បួង និងការបោកបញ្ឆោតនានារបស់មារសត្រូវ ។
ហើយទីបំផុត យើងស្ដាប់ទ្រង់ នៅពេលយើងផ្ទៀងស្ដាប់ពាក្យសម្ដី របស់ពួកព្យាការី អ្នកមើលឆុត និង អ្នកទទួលវិវរណៈ ។ ពួកសាវកដែលបានតែងតាំងឡើងដោយព្រះយេស៊ូវគ្រីស្ទ តែងតែថ្លែងទីបន្ទាល់អំពីទ្រង់ ។ ពួកគេបង្ហាញផ្លូវ នៅពេលយើងធ្វើដំណើរឆ្លងកាត់ទីខ្វែងខ្វាត់ដួងចិត្តតានតឹងនៃបទពិសោធន៍ជីវិតរមែងស្លាប់របស់យើង ។
តើអ្វីនឹងកើតឡើង នៅពេលបងប្អូនកាន់តែស្ដាប់ដោយបំណងចិត្ត ប្រុងស្ដាប់ ហើយផ្ទៀងស្ដាប់អ្វីដែលព្រះអង្គសង្គ្រោះបានមានបន្ទូល និងអ្វីដែលទ្រង់កំពុងមានបន្ទូលឥឡូវនេះតាមរយៈពួកព្យាការីរបស់ទ្រង់ ? ខ្ញុំសូមសន្យាថា បងប្អូននឹងប្រទានពរនូវអំណាចបន្ថែមទៀតដើម្បីប្រឈមនឹងការល្បួង បញ្ហា និងភាពទន់ខ្សោយ ។ ខ្ញុំសន្យាថាមាន អព្ភូតហេតុជាច្រើននៅក្នុងអាពាហ៍ពិពាហ៍ ទំនាក់ទំនងគ្រួសារ និងកិច្ចការប្រចាំថ្ងៃរបស់បងប្អូន ។ ហើយខ្ញុំសន្យាថា សមត្ថភាពរបស់បងប្អូនដើម្បីដឹងអំពីអំណរនឹងចម្រើនឡើង ទោះជាមានការវឹកវរខ្លាំងក្នុងជីវិតបងប្អូនក្ដី ។
សន្និសីទទូទៅ ខែ មេសា ឆ្នាំ ២០២០ នេះគឺជាពេលរបស់យើងដើម្បីប្រារព្ធព្រឹត្តការណ៍មួយដែលបានផ្លាស់ប្ដូរពិភពលោក ។ នៅពេលយើងចូលរួមក្នុងការប្រារព្ធខួបលើកទី ២០០ ឆ្នាំ នៃការនិមិត្តដំបូងរបស់យ៉ូសែប ស្ម៊ីធ នោះគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់បានពិចារណាអំពីអ្វីដែល យើងអាចធ្វើដើម្បីប្រារព្ធព្រឹត្តការណ៍តែមួយគត់នេះដោយត្រឹមត្រូវ ។
ការបង្ហាញអង្គរបស់ព្រះអម្ចាស់ បានចាប់ផ្ដើមនូវការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ហើយបាននាំចូលមកក្នុងគ្រាកាន់កាប់ត្រួតត្រានៃពេលពេញកំណត់ ។
យើងងឿងឆ្ងល់ថាតើគួរមានវិមានមួយត្រូវសង់ឡើងឬទេ ។ ប៉ុន្តែ នៅពេលយើងពិចារណាអំពីប្រវត្តិសាស្ត្រដ៏ពិសេស និងឥទ្ធិពលជាអន្ដរជាតិនៃការនិមិត្តដំបូង នោះយើងមាន អារម្មណ៍បំផុសឲ្យបង្កើតវិមានមួយដែលពុំមែន ធ្វើឡើងពីថ្មក្រានីត ឬសីលាទេ ប៉ុន្តែដោយពាក្យសម្ដីវិញ— ជាពាក្យនៃការប្រកាសដ៏ឧឡារិក និងពិសិដ្ឋ— ដែលបានសរសេរឡើង ពុំមែនចារនៅលើ « ផ្ទាំងថ្ម » ទេ ប៉ុន្តែត្រូវបានឆ្លាក់នៅលើ « ផ្ទាំងសាច់ » នៃដួងចិត្តរបស់យើង ។១៤
ចាប់តាំងពីសាសនាចក្រត្រូវបានរៀបចំឡើង មានការប្រកាសតែចំនួនប្រាំប៉ុណ្ណោះត្រូវបានចេញផ្សាយ ដែលមួយចុងក្រោយគេគឺ « ក្រុមគ្រួសារ ៖ ការប្រកាសដល់ពិភពលោក » ដែលបានបង្ហាញដោយប្រធាន ហ្គរដិន ប៊ី ហ៊ីងគ្លី នៅក្នុងឆ្នាំ ១៩៩៥ ។
ឥឡូវនៅពេលយើងសញ្ជឹងគិតអំពីគ្រាដ៏សំខាន់នៅក្នុងប្រវត្តិសាស្ត្រនៃពិភពលោកនេះ និងព្រះបង្គាប់របស់ព្រះអម្ចាស់ដើម្បីប្រមូលផ្ដុំពួកអ៊ីស្រាអែលខ្ចាត់ព្រាត់នៅក្នុងការរៀបចំខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ យើងជាគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់ ចេញនូវការប្រកាសដូចខាងក្រោម ។ ចំណងជើងវាគឺ « ការស្ដារឡើងវិញនៃភាព ពេញលេញនៃដំណឹងល្អនៃព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ។ វាត្រូវបាននិពន្ធដោយគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ចុះកាលបរិច្ឆេទនៅខែមេសា ឆ្នាំ ២០២០ ។ ដើម្បីរៀបចំសម្រាប់ថ្ងៃនេះ ខ្ញុំបានថតចម្លងកាលពីមុននូវការប្រកាសនេះនៅក្នុងព្រៃពិសិដ្ឋ ជាកន្លែងដែលយ៉ូសែប ស្ម៊ីធ បានឃើញព្រះបិតា និងព្រះរាជបុត្រាជាលើកដំបូង ។
« យើងសូមប្រកាសដ៏ឧឡារិកថា ព្រះស្រឡាញ់បុត្រាបុត្រីទ្រង់នៅគ្រប់ជាតិសាសន៍ក្នុងលោកិយ ។ ព្រះជាព្រះបិតា បានប្រទានដល់យើងនូវកំណើតដ៏ទេវភាព ជាជីវិតដែលឥតប្រៀបផ្ទឹម ពលិកម្មធួនដ៏និរន្ដរ៍នៃព្រះរាជបុត្រាសំណព្វទ្រង់ គឺព្រះយេស៊ូវគ្រីស្ទ ។ ដោយព្រះចេស្ដានៃព្រះបិតា ព្រះយេស៊ូវបានរស់ឡើងវិញម្ដងទៀត ហើយបានទទួលជ័យជម្នះលើសេចក្ដីស្លាប់ ។ ទ្រង់គឺជាព្រះអង្គសង្គ្រោះរបស់យើង ជាគំរូរបស់យើង និងជាព្រះប្រោសលោះរបស់យើង ។
« ពីររយឆ្នាំកន្លងទៅ នៅព្រឹកនិទាឃរដូវដ៏ស្រស់ស្អាតមួយក្នុងឆ្នាំ ១៨២០ យុវជនយ៉ូសែប ស្ម៊ីធ កំពុងស្វែងចង់ដឹងថាគួរចូលរួមព្រះវិហារមួយណា គាត់បានចេញទៅក្នុងព្រៃនៅជិតផ្ទះគាត់ នៅប៉ែកខាងជើងរដ្ឋនូវយ៉ោកសហរដ្ឋអាមេរិកដើម្បីអធិស្ឋាន ។ គាត់បានសួរសំណួរទាក់ទងទៅនឹងសេចក្ដីសង្គ្រោះនៃព្រលឹងគាត់ ហើយទុកចិត្តថាព្រះនឹងដឹកនាំគាត់ ។
« យើងសូមប្រកាសដោយរាបសារថា នៅក្នុងចម្លើយចំពោះ ការអធិស្ឋានរបស់គាត់ ព្រះជាព្រះបិតា និងព្រះរាជបុត្រាទ្រង់ ព្រះយេស៊ូវគ្រីស្ទ បានលេចមកជួបយ៉ូសែប ហើយបានផ្ដើម « ការសងនៃរឿងគ្រប់យ៉ាង »( កិច្ចការ ៣:២១ ) ដូចបានទាយទុកក្នុងព្រះគម្ពីរប៊ីប ។ នៅក្នុងការនិមិត្តនេះ គាត់បានរៀនថា បន្ទាប់ពីការស្លាប់របស់ពួកសាវកជំនាន់ដើម នោះព្រះវិហារសញ្ញាថ្មីរបស់ព្រះគ្រីស្ទត្រូវបានបាត់បង់ពីផែនដី ។ យ៉ូសែបនឹងធ្វើជាឧបករណ៍ក្នុងការនាំវាត្រឡប់មកវិញ ។
« យើងសូមអះអាងថានៅក្រោមការដឹកនាំរបស់ព្រះបិតា និងព្រះរាជបុត្រា នោះសារទូតសួគ៌ាបានយាងមកបង្រៀនដល់យ៉ូសែប ហើយបានស្ថាបនាសាសនាចក្រនៃព្រះយេស៊ូវគ្រីស្ទឡើងវិញ ។ យ៉ូហានបាទីស្ទដែលបានរស់ឡើងវិញបានស្ដារសិទ្ធិអំណាចដើម្បីធ្វើបុណ្យជ្រមុជទឹកដោយការពន្លិចសម្រាប់ការផ្ដាច់បាប ។ ពួកសាវកបីនាក់ក្នុងចំណោមពួកសាវកដប់ពីរនាក់កាលពីដើម— ពេត្រុស យ៉ាកុប និងយ៉ូហាន— បានស្ដារភាពជាសាវក និងកូនសោនៃសិទ្ធិអំណាចបព្វជិតភាព ។ អ្នកផ្សេងទៀតបានយាងមកផងដែរ រួមមានទាំង អេលីយ៉ា ដែលបានស្ដារសិទ្ធិអំណាចដើម្បីចងក្រុមគ្រួសារជាមួយគ្នាជារៀងរហូតនៅក្នុងទំនាក់ទំនងអស់កល្បជានិច្ចដែលហួសពីសេចក្ដីស្លាប់ ។
« យើងសូមធ្វើជាសាក្សីបន្ថែមថា យ៉ូសែប ស៊្មីធត្រូវបានប្រគល់អំណោយទាន និងអំណាចនៃព្រះដើម្បីបកប្រែកំណត់ត្រាពីបុរាណគឺព្រះគម្ពីរមរមន ៖ សក្ខីបទមួយ—ទៀតអំពីព្រះយេស៊ូវគ្រីស្ទ ។ ទំព័រនៃអត្ថបទពិសិដ្ឋនេះ រួមមាននូវដំណើររឿងនៃការបម្រើដោយផ្ទាល់របស់ព្រះយេស៊ូវគ្រីស្ទនៅក្នុងចំណោមរាស្ត្រនៅអឌ្ឍគោលខាងលិចភ្លាមបន្ទាប់ពីការរស់ឡើងវិញរបស់ទ្រង់ ។ វាបង្រៀនអំពីគោលបំណងជីវិត ហើយពន្យល់អំពីគោលលទ្ធិនៃព្រះគ្រីស្ទដែលសំខាន់ចំពោះគោលបំណងនោះ ។ ជាដៃគូគម្ពីរទៅនឹងគម្ពីរប៊ីប ព្រះគម្ពីរមរមនថ្លែងទីបន្ទាល់ថា មនុស្សគ្រប់រូបគឺជាបុត្រាបុត្រីនៃព្រះបិតាសួគ៌ជាទីស្រឡាញ់ ថាទ្រង់មានផែនការដ៏ទេវភាពសម្រាប់ជីវិតរបស់យើង ហើយថាព្រះរាជបុត្រាទ្រង់ ព្រះយេស៊ូវគ្រីស្ទ មានបន្ទូលនៅសព្វថ្ងៃនេះ ក៏ដូចជាពីជំនាន់មុនដែរ ។
« យើងសូមប្រកាសថា សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយបានរៀបចំឡើងនៅថ្ងៃទី ៦ ខែមេសា ឆ្នាំ ១៨៣០ គឺជាសាសនាចក្រសញ្ញាថ្មីរបស់ព្រះគ្រីស្ទដែលបានស្ដារឡើងវិញ ។ សាសនាចក្រនេះគឺជាយុថ្កានៅក្នុងជីវិតដ៏ឥតខ្ចោះនៃថ្មជ្រុងយ៉ាងឯក គឺព្រះយេស៊ូវគ្រីស្ទ និងនៅក្នុងដង្វាយធួនដ៏និរន្ដរ៍ និងការរស់ឡើងវិញដ៏ពិតរបស់ទ្រង់ ។ ព្រះយេស៊ូវ គ្រីស្ទបានហៅពួកសាវកជាថ្មីម្ដងទៀត ហើយបានប្រគល់សិទ្ធិអំណាចបព្វជិតភាពដល់ពួកគេ ។ ទ្រង់អញ្ជើញយើងទាំងអស់គ្នាឲ្យមករកទ្រង់ និងសាសនាចក្ររបស់ទ្រង់ ដើម្បីទទួលព្រះវិញ្ញាណបរិសុទ្ធ ពិធីបរិសុទ្ធនៃសេចក្ដីសង្គ្រោះ និងដើម្បីទទួលបានអំណរដ៏ខ្ជាប់ខ្ជួន ។
« ពីរយឆ្នាំបានកន្លងហួសទៅហើយ ចាប់តាំងពីការស្ដារឡើងវិញត្រូវបានចាប់ផ្ដើមដោយព្រះជាព្រះបិតា និងព្រះរាជបុត្រាសំណព្វរបស់ទ្រង់ គឺព្រះយេស៊ូវគ្រីស្ទ ។ មានមនុស្សរាប់លាននាក់នៅទូទាំងពិភពលោក បានក្រសោបយកចំណេះដឹងមួយនៃព្រឹត្តការណ៍ដែលបានព្យាករណ៍ទុកទាំងនេះ ។
« យើងរីករាយនឹងប្រកាសថា ការស្ដារឡើងវិញដែលបានសន្យាបន្ដឆ្ពោះទៅមុខតាមរយៈវិវរណៈជាបន្ដបន្ទាប់ ។ ផែនដីនឹងពុំនៅដដែលឡើយ នៅពេលព្រះនឹង « ប្រមូលរបស់របរទាំងអស់ទៅតែមួយនៅក្នុងព្រះគ្រីស្ទ » ។( អេភេសូរ ១:១០ )
« ដោយគារវភាព និងការដឹងគុណ ពួកយើងជាពួកសាវករបស់ទ្រង់សូមអញ្ជើញមនុស្សទាំងអស់ឲ្យបានដឹង—ដូចជាយើងបានដឹង—ថាស្ថានសួគ៌បានបើក ។ យើងអះអាងថាព្រះកំពុងបង្ហាញព្រះឆន្ទៈរបស់ទ្រង់ចំពោះបុត្រាបុត្រីជាទីស្រឡាញ់របស់ទ្រង់ ។ យើងថ្លែងទីបន្ទាល់ថា អស់អ្នកដែលសិក្សាសារលិខិតអំពីការស្ដារឡើងវិញប្រកបដោយការអធិស្ឋាន ហើយធ្វើសកម្មភាពដោយជំនឿ នឹងត្រូវប្រទានពរឲ្យទទួលបានសាក្សីផ្ទាល់ខ្លួនអំពីទេវភាព និងគោលបំណងរបស់វាដើម្បីរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះ ព្រះយេស៊ូវ គ្រីស្ទរបស់យើង ដូចដែលបានសន្យា » ។១៥
បងប្អូនប្រុសស្រីទាំងឡាយជាទីស្រឡាញ់ នេះគឺជាការប្រកាសខួបលើកទីពីររយឆ្នាំរបស់យើងដល់ពិភពលោក ទាក់ទងនឹងការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទនៅក្នុងភាពពេញលេញ ។ វាត្រូវបានបកប្រែជា ១២ ភាសា ។ ភាសាផ្សេងៗនឹងមានតាមក្រោយក្នុងពេលឆាប់ៗ ។ វានឹងមានភាពនៅលើគេហទំព័រសាសនាចក្រ ដែលបងប្អូនអាចទទួលបានវាមួយច្បាប់ ។ សូមសិក្សាវាជាឯកជន និងជាមួយសមាជិកគ្រួសារ និងមិត្តភក្ដិរបស់អ្នក ។ សូមពិចារណាអំពីសេចក្ដីពិត ហើយគិតអំពី ឥទ្ធិពលដែលសេចក្ដីពិតទាំងនោះនឹងមានមកលើជីវិតរបស់បងប្អូន បើបងប្អូននឹងស្ដាប់ ប្រុងស្ដាប់ ហើយផ្ទៀងសា្ដប់បទបញ្ញត្តិ និងសេចក្ដីសញ្ញាដែលមានអមជាមួយវានោះ ។
ខ្ញុំដឹងថា យ៉ូសែប ស៊្មីធ គឺជាព្យាការីដែលបានតែងតាំងពីមុនកំណើត ដែលព្រះអម្ចាស់បានជ្រើសរើសឲ្យបើកគ្រាកាន់កាប់ត្រួតត្រាចុងក្រោយនេះ ។ តាមរយៈលោក សាសនាចក្ររបស់ព្រះអម្ចាស់ ត្រូវបានស្ដារឡើងវិញមកកាន់ផែនដី ។ យ៉ូសែប បានភ្ជាប់ទីបន្ទាល់របស់លោកដោយលោហិត ។ ខ្ញុំស្រឡាញ់និងគោរពលោកណាស់ !
ព្រះមានព្រះជន្មរស់ ! ព្រះយេស៊ូវគឺជាព្រះគ្រីស្ទ ! សាសនា ចក្រ ទ្រង់ ត្រូវ បាន ស្តារ ឡើង វិញ ! ទ្រង់ និងព្រះបិតាទ្រង់ ជាព្រះវរបិតាសួគ៌យើង កំពុងទតមើលមកលើយើង ។ ខ្ញុំសូមថ្លែងទីបន្ទាល់ដូច្នោះក្នុងព្រះនាមនៃព្រះយេស៊ូវគ្រីស្ទ អាម៉ែន ។